ဖိနပ်စီးကြသူများ

ကျွန်မ လမ်းလျှောက်တတ်စအရွယ်တွင် စိတ်အ၀င်စားဆုံးအရာမှာ ဖိနပ်များဖြစ်ခဲ့၏။ ဖိနပ်များကို ငယ်စဉ်ကလေးဘ၀ကတည်းက ကျွန်မ စိတ်ဝင်စားခဲ့ခြင်းဖြစ်၏။ လမ်းထွက်လျှင် ဖိနပ်စီးရမည်ဟူသောအသိကို မည်သူကမှသင်ကြားမပေးဘဲ လူကြီးများကို မြင်တွေ့နေခြင်းဖြင့် အလိုလိုသိရှိခဲ့၏။ ကျွန်မ လမ်းလျှောက်တတ်စအရွယ်ကတည်းက မေမေအပြင်ထွက်မည်ဆိုလျှင် ကျွန်မဖိနပ်ကို ကျွန်မဘာသာစီးလျက် မေမေနှင့်အတူလိုက်ပါဖို့ အသင့်ဖြစ်နေတတ်သည်တဲ့။

အပြင်ထွက်တိုင်း ဖိနပ်စီးဖို့ ဘယ်အခါမှသတိပေးစရာမလိုသောကလေးမမှာ ကျွန်မဖြစ်၏။ အိမ်၌ ရှိ,ရှိသမျှ လူအားလုံး၏ဖိနပ်များကို မတန်မရာစီး၍ လမ်းလျှောက်ကြည့်တတ်သော ကလေးမမှာ ကျွန်မဖြစ်၏။ အသက်ငါးနှစ်အရွယ်လောက်ကပင် ဒေါက်မြင့်ဖိနပ်စီးချင်လွန်း၍ မိဘနှစ်ပါးကို တကျည်ကျည်ပူဆာခဲ့သော ကလေးမမှာ ကျွန်မဖြစ်၏။

ပိကျိပိကျိအသံထွက်သော နှိပ်စေ့တပ်ကြိုးသိုင်းဖိနပ်ပေါက်စလေးကို စတင်စီး၍ ဖိနပ်များနှင့် ကျွန်မ တစ်စတစ်စ ကျွမ်းဝင်လာခဲ့၏။ ပြီးတော့ နောက်ကြိုးသိုင်း၊ သားရေခြေညှပ်ဖိနပ်များ၊ ပလတ်စတစ်ကြိုးသိုင်းဖိနပ်များ၊ ဆင်ကြယ်ဖိနပ်၊ ကျွဲရိုင်းဖိနပ်၊ ကျောက်မဲခုံဖိနပ်၊ ဂွက်ဂွက်ဖိနပ်ဟုခေါ်သည့် ကော်မာဖိနပ်များ၊ ကတ္ထီပါဖိနပ်၊ ယင်းမာဖိနပ်၊ ချယ်ရီဖိနပ်၊ စိန်ဓားမောက်ဖိနပ် စသည့် မြန်မာပြည်ချုပ် သားရေဖိနပ်မျိုးစုံတို့ကို ခေတ်အလိုက် ပြောင်းလဲစီးရင်း ကျွန်မ၏ခြေအစုံကို ကမ္ဘာမြေကြီးပေါ်၌ နေရာယူစေခဲ့၏။

ကျွန်မ နှစ်,နှစ်သမီးအရွယ်မှ ယခုအချိန်ထိစီးခဲ့သောဖိနပ်များကို ပြန်လည်ရေတွက်ကြည့်လျှင် အနည်းဆုံး အရန်သုံးဆယ်ကျော်ပေလိမ့်မည်။ လူတစ်ယောက်ဟာ ဘယ်လောက်ကောင်းတဲ့ဖိနပ်နဲ့ဖြစ်ဖြစ် လူ့သက်တမ်းတစ်လျှောက်လုံးကို ဖိနပ်မလဲဘဲ ဖြတ်လျှောက်နိုင်သည်မှ မဟုတ်ပေဘဲ။

***

ကျွန်မ၏ နှစ်ဆယ့်ငါးနှစ်တာ ကာလတစ်လျှောက် ကျွန်မစီးခဲ့သောဖိနပ်များအနက် ဖိနပ်တစ်ရန်၏ တန်ဖိုးတိုင်းသည် မြန်မာကျပ်ငွေတစ်ရာထက် ပိုမပေးခဲ့ရ။ ငယ်စဉ်က ဖိနပ်ပုံစံလှလှလေးများကို စိတ်ဝင်တစားလိုချင်မက်မောခဲ့သော ကျွန်မသည် အသက်အရွယ်ရလာသောအခါ ကိုယ့်ခြေထောက်နှင့်ထိုက်တန်သည့် ဖိနပ်များကိုသာ ရွေးချယ်စီးတတ်သည့် အလေ့အကျင့်တစ်ခု ရလာခဲ့၏။ ထိုအကျင့်ကို လည်ရှည်တောစီးဖိနပ်များသာ အများဆုံးစီးလေ့ရှိသော ဖေဖေက ပြုစုလေ့ကျင့်ပေးခဲ့ခြင်းဖြစ်၏။

ဖေဖေသည် ဖိနပ်တစ်ရန်နှင့် ဖိနပ်ပိုင်ရှင်တို့အကြားရှိ စိတ်ဓာတ်ရေးရာတို့ကို ကျွန်မသိနားလည်အောင် ကောင်းစွာသင်ကြားပေးခဲ့၏။ ကျွန်မကိုယ်တိုင် ရင်ဆိုင်ကြုံတွေ့ခဲ့ရသော အဖြစ်အပျက်များမှလည်း ဖိနပ်တစ်ရန်၏တန်ဖိုးကို မှန်းဆဆုံးဖြတ်တတ်လာခဲ့၏။ ကျွန်မ မူလတန်းကျောင်းသူဘ၀က တောင်တွင်းကြီးမြို့ရှိ မူလတန်းကျောင်းလေးတစ်ခု၌ ကျွန်မအလွန်လေးစားချစ်ခင်သော ဆရာကြီးတစ်ဦးရှိခဲ့၏။ ဆရာကြီးသည် မီးခိုးရောင်တိုက်ပုံအင်္ကျီဟောင်းကြီးကို ၀တ်ဆင်လျက် လွယ်အိတ်အမြီးပြတ်ကိုလွယ်ကာ အရောင်လွင့်နေပြီဖြစ်သော ထီးကောက်ကြီးကို ချိုင်းကြားညှပ်၍ နောက်မြီးပေါက်နေသည့် အပြာရောင်ရော်ဘာဖိနပ်စုတ်ကြီးနှင့် ကျောင်းသို့ စောစီးစွာလာလေ့ရှိ၏။ ဆရာကြီး၏ ရုပ်ပုံလွှာကို ဓာတ်ပုံရိုက်ထားသကဲ့သို့ ကျွန်မမျက်လုံးအိမ်၌ ယနေ့တိုင်စွဲထင် မြင်ယောင်ဆဲပင်ဖြစ်၏။

ကျွန်မတို့ငယ်စဉ်က ဆီးသီးထုပ်၊ မုန့်ထုပ်များ၌ပါသည့် ကော်ရုပ်ပေါက်စလေးများကို မြေကြီးတွင်ထောင်လျက် ဖိနပ်နှင့်ပစ်ပေါက်လှဲသောကစားနည်းကို ကစားလေ့ရှိရာ ဆရာကြီးက နေပူထဲ၌ ဖိနပ်မစီးဘဲမကစားဖို့ ဆူပူကြိမ်းမောင်းလေ့ရှိ၏။ ထိုအခါ ကျွန်မတို့ကလေးများက 'ဆရာကြီးဖိနပ်ကဖြင့် ဖင်မြီးတောင်ပြတ်နေပြီ၊ နေပူထဲသွားရင် ဆရာကြီးခြေထောက်တွေလည်း ပူတာပါပဲ၊ ငါတို့ ဖိနပ်မစီးတာကိုပဲ အပြစ်လုပ်ပြီး ပြော,ပြောနေတယ်' ဟု အချင်းချင်း တီးတိုးဝေဖန်မှုပြုခဲ့ကြ၏။

ကျွန်မတို့ နေပူထဲကစားနေလျှင်သော်လည်းကောင်း၊ ဖိနပ်မပါဘဲ ပြေးလွှားနေရင်သော်လည်းကောင်း ဒေါသတကြီး အော်ဟစ်ဆူပူလေ့ရှိသော ဆရာကြီးသည် နောက်မြီးတိုဖိနပ်လေးကို စီးလျက်ပင် ဖိနပ်မပါဘဲ ကျောင်းလာရသော ကျောင်းသားလေးတစ်ယောက်ကို ဖိနပ်သစ်တစ်ရန် အလျင်အမြန်ဝယ်ပေးခဲ့လေ၏။ သူကိုယ်တိုင်က နောက်မြီးတိုဖိနပ်စုတ်ကိုစီးလျက် တပည့်များခြေပူမှာ၊ ဆူးစူးမှာကို စိုးရိမ်ကြီးစွာ မေတ္တာထားခဲ့သော ဆရာကြီး၏ စေတနာ၊ ကရုဏာတို့ကား မေ့လျော့နိုင်စရာမရှိတော့ချေ။

ကွယ်ရာ၌ 'ထီးစုတ်ကြီးနဲ့ဆရာကြီး' ဟု လည်းကောင်း၊ 'ဖိနပ်မြီးတိုနဲ့ဆရာကြီး' ဟုလည်းကောင်း ခေါ်ဝေါ်ခြင်းခံရသော ဆရာကြီးသည် နွမ်းပါးချို့တဲ့လွန်းသော တပည့်လေးများအတွက် လိုအပ်သမျှ တတ်စွမ်းသလောက်ဖြည့်ဆည်းပေးဖို့နှင့် စာတော်သော ကျောင်းသားများအား ခဲတံ၊ပေတံ၊စာအုပ် စသဖြင့် သူ့ ကိုယ်ပိုင်ငွေလေးမှ ခွဲဝေဆုချဖို့ ဘယ်တော့မှ မမေ့လျော့။ ဆရာကြီးအကြောင်းကို ဖေဖေ့အား ကျွန်မပြောပြတော့ ဖေဖေက 'အဲဒီ အဖြစ်အပျက်မျိုးတွေကို သမီး အမြဲအမှတ်ရနေရမယ်။ လူတစ်ယောက်ရဲ့စိတ်ဓာတ်နဲ့ လုပ်ရပ်ကို ဘာတစ်ခုမှမလေ့လာဘဲ အပေါ်ယံအပြင်အဆင်ကိုကြည့်ပြီး တန်ဖိုးဖြတ်လို့မရဘူးဆိုတာကို သမီးမှတ်ထား။ ဆရာကြီးရဲ့ ဖိနပ်နောက်မြီးဟာ ပါးချင်ပါးမယ်၊ ပေါက်ချင်ပေါက်မယ်၊ ဆရာကြီးဆောင်းတဲ့ထီးဟာလည်း ပြဲချင်ပြဲမယ်၊ စုတ်ချင်စုတ်မယ်။ အေး… ဒါပေမယ့် ဆရာကြီးရဲ့ စိတ်ထားမြင့်မြတ်မှုဟာ ဘယ်အခါမှလျော့ပါးသွားမှာမဟုတ်ဘူး။ ဆရာကြီးရဲ့ ရိုးသားတဲ့ဂုဏ်နဲ့ ဖြူစင်တဲ့စေတနာ၊ မေတ္တာတွေဟာလည်း ဘယ်တော့မှယုတ်လျော့စုတ်ပြတ်သွားမှာမဟုတ်ဘူး'ဟု စံနမူနာပြ၍ ပြောဆိုဆုံးမခဲ့ဖူး၏။

ကျွန်မတို့သည် ဆရာကြီး၏ကျောင်းအရိပ်ကို အေးမြစွာခိုလှုံရင်း ဆရာကြီးသင်ကြားပေးလိုက်သော အခြေခံပညာများ၏ တန်ဖိုးဖြင့် လောကအလယ်တွင် ရဲဝံ့စွာခြေချနိုင်ခဲ့လေပြီ။ တကယ်တော့ အဖိုးတန်ဖိနပ်တစ်ရန် စီးထားရုံဖြင့် လောကအလယ်၌ ကျွန်မတို့ နေရာကောင်းရ ခြေချနိုင်သည်မှမဟုတ်ဘဲ။

***

လူများစွာတို့၏ခြေထောက်အစုံမှ ဖိနပ်များကို အလေးထားကြည့်မိသည့်အကျင့်ကို ဘယ်အချိန်ကကျွန်မစ၍ ရခဲ့သည်တော့မသိ။ လူတစ်ယောက်ကိုမြင်သည်နှင့် ဖိနပ်ကိုဦးစွာ ကြည့်မိတတ်သည်ကတော့ ကျွန်မအတွက် အလေ့အထတစ်ခုဖြစ်နေလေ၏။ ဖိနပ်များအားလုံးကို ကျွန်မစိတ်ဝင်စား၏။ ဖိနပ်ချည်းသက်သက်ရောင်းသော ဖိနပ်ဆိုင်များစွာမှ ဖိနပ်တွေ၊ စတိုးဆိုင်များ၌ တင်ရောင်းလေ့ရှိသော ဖိနပ်တွေ၊ စူပါမားကတ်ကြီးများ၌ ခမ်းနားစွာ နေရာပေးခင်းကျင်းထားသော ဖိနပ်တွေ၊ နံပါတ်မျိုးစုံသောလိုင်းကားများပေါ်ရှိ လူများစွာ၏ ခြေထောက်များအောက်က ဖိနပ်တွေ၊ ချောမွေ့သန့်ရှင်းသော နိုင်လွန်ကတ္တရာလမ်းမကြီးများ၌သော်လည်းကောင်း လမ်းလျှောက်နေသည့်လူတို့၏ ခြေထောက်များအောက်က ဖိနပ်တွေ… ဖိနပ်များအားလုံးကို ကျွန်မ အလေးထားကြည့်မိတတ်သည်ချည်း။

ကျွန်မက ဖိနပ်တစ်ရန်၏တန်ဖိုးကို ခန့်မှန်းတွက်ချက်ရင်း ဖိနပ်ပိုင်ရှင်၏တန်ဖိုးနှင့်အရည်အချင်းကို မှန်းဆကြည့်ဖို့ ၀ါသနာပါလှ၏။ နာမည်ကြီးမော်တော်ကားပြင်အလုပ်ရုံပိုင်ရှင် ဦးလေးကြီးတစ်ယောက်စီးသည့် အနက်ရောင်ကားတာယာဖိနပ်ကို ကျွန်မစိတ်ဝင်စား၏။ ဆိုင်ကယ်တစ်စီးဖြင့် လတ်လျားလတ်လျား လမ်းသလားနေသော ကောင်လေးတစ်ယောက်စီးသည့် သောင်းကျော်တန်ရှူးဖိနပ်တစ်ရန်ကို ကျွန်မ စိတ်ဝင်စား၏။ ဆယ်ဘီးကားကြီးခြောက်စီးပိုင်ဆိုင်သော ပွဲစားကြီးတစ်ယောက်စီးသည့် နောက်မြီးခွက်နေသော အနီရောင်သည်းကြိုးတပ် စင်ကြယ်ဖိနပ်တစ်ရန်ကို ကျွန်မစိတ်ဝင်စား၏။

အထူးကုဆရာဝန်ကြီးတစ်ယောက်စီးသည့် လေးညှင်းရောင်ကတ္ထီပါသည်းကြိုးတပ် နာမည်ကြီးမန္တလေးဖိနပ်တစ်ရန်ကို ကျွန်မစိတ်ဝင်စား၏။ စကတ်နှင့်အပေါ်ဝတ်ကုန်အင်္ကျီတွဲဖက်ဝတ်ဆင်ရသော ကုမ္ပဏီတစ်ခုမှ အမျိုးသမီးဝန်ထမ်းတစ်ဦးစီးသော နိုင်ငံခြားဖြစ်ဦးချွန်ထိပ်ပိတ် ခဲတံဒေါက်မြင့်ဖိနပ်ကို ကျွန်မ စိတ်ဝင်စား၏။ အစိုးရရုံးတစ်ရုံးမှ အမျိုးသမီးငယ်တစ်ယောက်စီးသော မြန်မာပြည်ချုပ် အနက်ရောင်ခုံမြင့်ဖိနပ်တစ်ရန်ကို ကျွန်မစိတ်ဝင်စား၏။ ဆိုက်ကားသမားဦးလေးကြီးစီးသည့် ပလတ်စတစ်ကွင်းထိုးဖိနပ်တစ်ရန်ကို ကျွန်မစိတ်ဝင်စား၏။

ဖိနပ်တစ်ရန်စီ၌ ဖိနပ်ပိုင်ရှင်၏ ဘ၀တစ်စိတ်တစ်ပိုင်း အရိပ်ထင်လျက်ရှိတတ်သည် မဟုတ်ပါလား။ သို့ပေမယ့် လူတစ်ယောက်စီးထားသည့် ဖိနပ်တစ်ရန်၏တန်ဖိုးကိုတွက်ဆကာ ထိုသူ၏တန်ဖိုးကို ပုံသေကားကျ ပိုင်းဖြတ်ခွဲခြားလို့တော့ မရနိုင်ဘူးပေါ့။ ကျွန်မ၌ တန်ဖိုးကြီးဖိနပ်များအပေါ် အထင်ကြီးမက်မောသောစိတ် ဘယ်တုန်းကမှမရှိခဲ့။ ထို့ကြောင့် ကျွန်မစီးသောဖိနပ်များ၌ ငွေကြေးတန်ဖိုးကြီးမားသည့် ဖိနပ်အမျိုးအစားများ မပါဝင်ခဲ့ပေ။

ကျောင်းတက်စဉ်ကလည်း သည်းကြိုးချောင်ကာ အတော်ကလေးအရောင်လွင့်နေပြီဖြစ်သော မြန်မာပြည်ဖြစ် ဖိနပ်တစ်ရန်ကို မစွန့်ပစ်နိုင်စွာ လအတန်ကြာ စီးနေခဲ့သည့်အတွက် (စီး၍ရသေးသဖြင့်) ကျွန်မ အပေါင်းအသင်းတစ်ချို့၏ မကျေမချမ်း ဝေဖန်ပြစ်တင်မှုတွေကို ခံခဲ့ရဖူး၏။

"နင်ဟာလေ လွန်ကိုလွန်ပါတယ်။ ဒီလောက် မတတ်နိုင်တာလည်း မဟုတ်ဘဲနဲ့၊ အပေါစားဖိနပ်ကကို မတက်တော့ဘူး၊ တစ်ခါတလေများ ဖိနပ်အကောင်းစားလေးဘာလေး ၀ယ်စီးဖို့ စိတ်ကူးပါဦး" ဟူသော အပြောမျိုးကိုလည်း ခံခဲ့၏။ တကယ်တော့ သူတို့ခံယူသတ်မှတ်သည့် အပေါစားဆိုတာက ငွေကြေးတန်ဖိုးနည်းခြင်းသာဖြစ်ပြီး အကောင်းစားဆိုတာက မတန်တဆ ငွေပေးဝတ်ရသည့်အရာကို ခေါ်တာပါပဲ။

တစ်ရာတန်ဖိနပ်တစ်ရန်၏ခိုင်ခံ့မှုနှင့် တစ်ထောင်တန်ဖိနပ်တစ်ရန်၏ခိုင်ခံ့မှု၊ အရည်အသွေးကောင်းမွန်သမျှတို့ အတူတူပဲဆိုလျှင် တစ်ရာတန်ဖိနပ်ရဲ့အရည်အချင်းက အပေါစားဖြစ်သင့်ရဲ့လား။ သို့ပေမယ့် လူတွေက ငွေကြေးတန်ဖိုးများစွာပေးဝယ်ရသည့် ပစ္စည်းတို့ကို သုံးစွဲရခြင်းဖြင့် အလိုလိုနေရင်း ၀မ်းမြောက်ဝမ်းသာဖြစ်ကာ ကိုယ့်ကိုယ်ကိုဂုဏ်ယူကျေနပ်နေတတ်တာ သဘာဝတစ်ခုလို ဖြစ်နေတော့လည်း မခက်လားနော်။

တန်ဖိုးကြီးပစ္စည်းများ ၀ယ်ယူသုံးစွဲရခြင်းအပေါ် ဂုဏ်ယူတတ်လွန်းသောလူတစ်ချို့၏ စိတ်ထားများကို ကျွန်မကတော့ တိတ်တခိုးကျိတ်၍ ရယ်မောမိတတ်၏။ ကျွန်မမိတ်ဆွေအပေါင်းအဖော်တွေထဲ၌ပင် အဲဒီလိုလူမျိုးတွေ အများအပြားရှိသေး၏။ ကျောင်းသူဘ၀က အဖြစ်လေးတစ်ခုကို ပြောပြချင်ပါသည်။ ကျွန်မသည် အသင့်ချုပ်ပြီးသား ရှစ်ရာတန်အင်္ကျီသစ်ကိုဝတ်ကာ ကျောင်းတက်ခဲ့၏။ ကျွန်မသူငယ်ချင်းတစ်ယောက်က တန်ဖိုးမေးသောအခါ ကျွန်မကလည်း အမှန်အတိုင်းပင် ရှစ်ရာပေးရကြောင်း ပြောပြခဲ့၏။ ထိုအင်္ကျီ၏ အမှန်တကယ်တန်ဖိုးမှာ ပေါ်ခါစကလည်း ရှစ်ရာ ကျွန်မ၀ယ်ဝတ်သည့်အချိန်အထိလည်း ရှစ်ရာသာဖြစ်၏။

ဒါကိုပင် သူငယ်ချင်းမသည် "ဟဲ့ ရှင့်အင်္ကျီက ဟုတ်ရောဟုတ်ရဲ့လား။ ကျွန်မ၀ယ်တုန်းက တစ်ထောင့်ငါးရာတောင် ပေးရတာ၊ ပေါ်ခါစမို့ထင်ပါရဲ့နော်၊ ကျွန်မလည်း ပေါ်တယ်ဆိုချက်ချင်းဝတ်ချင်တာ။ ခုတော့လည်း ဈေးကျသွားလိုက်တာတအားပဲ။ ၀တ်ချင်စိတ်တောင် မရှိတော့ဘူး" တဲ့။ ကဲ…ကြည့်လိုက်စမ်း။ ဘယ်လောက်ရယ်မောစရာကောင်းလိုက်သည့် လူ့သဘောလဲဆိုတာ။ ငွေကျပ်ရှစ်ရာထက် တစ်ပြားမှ ပိုမပေးသင့်သည့် ပစ္စည်းတစ်ခုကို တစ်ထောင့်ငါးရာပေးကာ ၀ယ်ခဲ့သည့် သူ၏ညံ့ဖျင်းမှု၊ မိုက်မဲမှု၊ အသုံးမကျမှုတို့ကို တွေးခေါ်ဆင်ခြင်နိုင်စွမ်းမရှိဘဲ တန်ဖိုးကြီးပစ္စည်းကို ပေါ်ဦးပေါ်ဖျားသုံးစွဲနိုင်သူအဖြစ် ကိုယ့်ကိုယ်ကို ဂုဏ်ယူကျေနပ်နေခြင်းက ကျွန်မအတွက်တော့ ရယ်မောစရာတွေပဲ ဖြစ်လေ၏။ အဲဒီလို လူမျိုးတွေကိုတော့ သနားသောအားဖြင့် ဗြောင်ကျကျ သရော်လှောင်ပြောင်လိုစိတ်ကိုချိုးနှိမ်ကာ 'ဟုတ်မှာ ဟုတ်မှာ၊ ပေါ်ခါစဆိုတော့ဈေးကြီးပေးရမှာပေါ့။ ကိုယ်ကတော့ ဈေးကျမှပဲ ၀ယ်နိုင်တော့တာပဲ။ တစ်ထောင်ကျော်ရင် ကိုယ်က စိတ်ကိုမကူးရဲဘူး' ဟူသောစကားမျိုးဖြင့် တစ်ဖက်လူကျေနပ်သွားအောင် နှစ်သိမ့်ပြောဆိုကာ စိတ်ထဲကကျိတ်လို့ ရယ်မောရလေ၏။ ကုန်ပစ္စည်းတွေ မတန်တဆ ဈေးတက်နေတဲ့အကြောင်းအရာတွေထဲမှာ အဲဒီလိုလူမျိုးတွေ ပေါပေါများများရှိနေခြင်း အချက်တစ်ချက်လည်း ပါသည်ထင်ရဲ့နော်။

ကျွန်မလုပ်ငန်းခွင်ဝင်သောအခါ၌လည်း ကျောင်းတက်တုန်းကလိုပင် ကျွန်မ၏ဖိနပ်များကို တန်ဖိုးဖြတ်ဝေဖန်တတ်သော လူများနှင့် ကြုံရပြန်၏။ ငွေတစ်ရာကျပ်ပင်မပေးရသော ဖိနပ်တစ်ရန်ကို လအတော်ကြာစီးနေသည့်အတွက် တစ်ရုံးတည်းနေအမျိုးသမီးတစ်စု၏ စကားတင်းဆိုမှုတွေကို ခံရပြန်၏။ ဘွဲ့ယူစဉ်အချိန်ကလည်း နိုင်ငံခြားဖြစ်ခုံမြင့်ဖိနပ်မစီးသည့်အတွက် အံ့သြမဆုံးဖြစ်ကာ ဝေဖန်ရှုတ်ချလိုသော မျက်လုံးများအောက်၌ ကျွန်မ စိတ်ပျက်လက်ပျက်ဖြစ်ခဲ့ရဖူး၏။

မြန်မာပြည်ချုပ်ခုံမြင့်ဖိနပ်များမှာ ကျွန်မ၀ယ်စီးနိုင်သည့် တန်ဖိုးပမာဏအတွင်းရှိသော်လည်း အရပ်မြင့်မားသော ကျွန်မအတွက် ခုံမြင့်ဖိနပ်များမလိုအပ်သဖြင့် မစီးခဲ့ခြင်းဖြစ်၏။ အမှန်က ခုံမြင့်ဖိနပ်စီး၍ သတိကြီးစွာထားလျက် ဟန်ရေးပြလမ်းလျှောက်နေရခြင်းထက် ဖိနပ်ပါးလေးစီးကာ ဣနြေ္ဒရရ ခပ်သွက်သွက် လမ်းလျှောက်ရခြင်းက ပို၍ အလုပ်ဖြစ်သည်မဟုတ်ပါလား။

***

ဖိနပ်တစ်ရန်ကို လူတစ်ယောက်စီးရသည့်ရည်ရွယ်ချက်မှာ ခြေဖဝါးအစုံအား အန္တရာယ်အမျိုးမျိုးမှ အကာအကွယ်ပေးရန်အတွက်သာ ဖြစ်၏။ ကားတာယာဖိနပ်ဖြစ်ဖြစ်၊ ရော်ဘာဖိနပ်ဖြစ်ဖြစ်၊ သားရေတု ဖိနပ်ဖြစ်ဖြစ်၊ အကောင်းစားသားရေစစ်စစ်ဖိနပ်ဖြစ်ဖြစ် ဖိနပ်တစ်ရန်ရဲ့ ဖြည့်ဆည်းပေးနိုင်မှုဟာ ခြေဖဝါးတစ်စုံသာပါပဲ။

လူ့တစ်ကိုယ်လုံးရဲ့ အောက်ဆုံးခြေဖဝါးမှာ ချနင်းခံရတဲ့ ဖိနပ်တစ်ရန်ရဲ့တန်ဖိုးအနည်းအများဟာ လူတစ်ယောက်၏ ဂုဏ်သိက္ခာမဟုတ်ဟု ကျွန်မယုံကြည်၏။ ဖိနပ်ပေါ်က ခြေထောက်အစုံရဲ့အရည်အချင်းသာလျှင် ထိုသူ၏ ဂုဏ်သိက္ခာကို မြှင့်တင်ပေးနိုင်လိမ့်မည်။ တကယ်တမ်း အစစ်အမှန် လိုအပ်တာက ကိုယ့်ခြေထောက်ပေါ်မှာ ဂုဏ်သိက္ခာရှိစွာ မားမားမတ်မတ်ရပ်နိုင်သည့် လူတစ်ယောက် ဖြစ်ဖို့သာမဟုတ်လား။

ပြီးခဲ့သည့်လအတန်ကြာက နာမည်ကြီးစူပါမားကတ်တစ်ခုရှိ ဖိနပ်များချည်းသက်သက် ခင်းကျင်းထားသော မှန်ဗီရိုကြီးများရှေ့တွင်ရပ်ကာ ဖိနပ်တန်ဖိုးများကို ဖတ်ကြည့်လျက် ကျွန်မရင်သပ်ရှုမောဖြစ်ခဲ့ရ၏။ ဖိနပ်တစ်ရန်၏ တန်ဖိုးတိုင်းသည် ကျွန်မရသော တစ်လတွက်လစာငွေ၏ နှစ်ဆအထက်မှ ဆယ်ဆကျော်အထက်၌သာ ရှိနေ၏။ ကျွန်မနှင့် အတူလာသူတစ်ရုံးတည်းနေ သူငယ်ချင်းက ဖိနပ်များကို မက်မောစွာငေးကြည့်ရင်း "ကိုယ်တို့တော့ ဒီတစ်သက် ဒီလိုဖိနပ်မျိုးတွေ စီးရမယ်မထင်တော့ပါဘူး" ဟု ဝမ်းနည်းကာ ဆိုခဲ့၏။ သူငယ်ချင်းမကို နှစ်သိမ့်ခြင်းမဟုတ်ဘဲ ကျွန်မစကားတစ်ခွန်း ရုတ်တရက် ဆိုမိခဲ့၏။

"ကိုယ်တော့ ဒီလောက်တန်ဖိုးကြီးတဲ့ဖိနပ်တွေ မစီးချင်ပါဘူး။ ငွေတွေသိပ်ပေါနေရင်တောင် တခြားနေရာမှာပဲ သုံးချင်တယ်။ ဖိနပ်တစ်ရန်ကို အဆမတန်ငွေတွေပေးပြီးစီးရတာ ကိုယ့်လုပ်အားတွေကို ခြေထောက်နဲ့ချနင်းပစ်လိုက်တာနဲ့ တူတူပါပဲ။ ဘယ်လောက်တန်ဖိုးကြီးတဲ့ဖိနပ်ဖြစ်ဖြစ် လူတစ်ယောက်ရဲ့ ဘဝတစ်လျှောက်လုံးကို ဖြတ်သန်းနိုင်လောက်အောင်တော့ အသုံးမဝင်နိုင်ပါဘူးကွာ"

ကျွန်မစကားကို သူငယ်ချင်းမက နားလည်ရခက်သောမျက်လုံးများဖြင့် နားထောင်နေခဲ့၏။ အဲဒီနောက်ပိုင်း တစ်ရုံးလုံးမှလူများက ကျွန်မစီးသောဖိနပ်များအား ခါတိုင်းထက်ပို၍ စိတ်ဝင်စားလာကြလေသည်။ တစ်ခါတလေကျတော့ လူတွေဟာ ဟန်ဆောင်တာကို တကယ့်အစစ်အမှန်သဘာဝလို့ထင်ပြီး စစ်မှန်တဲ့သဘာဝအရှိတရားကို အတုအယောင်ဟန်ဆောင်နေခြင်းဟု မြင်တတ်ကြပြန်သည်မဟုတ်လား။ ဘာပဲဖြစ်ဖြစ် ကျွန်မကတော့ ကျွန်မနှင့်ထိုက်တန်သော ဖိနပ်များကို ရွေးချယ်စီးနင်းကာ ကျွန်မလမ်းကိုကျွန်မ ဆက်လျှောက်သွားမှာပဲဖြစ်၏။

တောင်တွင်းကြီးမြို့ရှိ ဆရာကြီးများအား အစဉ်ဂါရဝပြုလျက် - 

ရုပ်ရှင်တေးကဗျာရသစုံမဂ္ဂဇင်း

ဇူလိုင်လ၊ ၁၉၉၈

မေတ္တာဖြင့် - ယုဒါ

31072015 (11:11 AM)