ကမ္ဘာမြေကြီးပေါ်က ခြေတစ်စုံ

ရန်ကုန်မြို့ကြီးမှာ ကျောတစ်နေရာရဖို့ အသည်းအသန်ကြိုးစားနေတဲ့ မိုက်မိုက်မဲမဲလူတွေထဲမှာ ငြိမ်းမိုးဝေလို့ခေါ်တဲ့ မိန်းမတစ်ယောက်လည်း အပါအ၀င်ပေါ့။ သူက ရူပဗေဒဘာသာရပ်နဲ့ ရန်ကုန်တက္ကသိုလ်က သိပ္ပံဂုဏ်ထူးဘွဲ့ရထားတယ်။ ပြင်ပစာရင်းကိုင် သင်တန်းတက်ဖူးတယ်။ ကွန်ပျူတာ သုံးလတက်ဖူးတယ်။ အင်္ဂလိပ်စကားပြောသင်တန်း ခြောက်လတက်ဖူးတယ်။ ဂျပန်စကားပြောသင်တန်း တက်တာကတော့ နှစ်ပတ်လောက်ပါ။ ပြီးတော့ အင်္ဂလိပ်-မြန်မာ လက်နှိပ်စက် တစ်လပြတ်သင်ဖူးတယ်။ လက်ရေးတိုသင်တန်းလည်း တက်ဖူးတယ်။ သူ့ရဲ့အရည်အချင်းက အဲလောက်ပါပဲ။ 

မိန်းတစ်ယောက်ဟာ အဲဒီမပြောပလောက်တဲ့ သာမန်အရည်အချင်းလေးနဲ့ ရန်ကုန်မြို့ကြီးမှာ တိုက်ခန်းတစ်ခန်း ပိုင်ဆိုင်ခွင့်ရဖို့ သဲသဲမဲမဲကြိုးစားနေခဲ့သတဲ့။ ခု လောလောဆယ် သူမ အရူးအမူး လိုချင်နေတာက တိုက်ခန်းတစ်ခန်းပဲ ဖြစ်သတဲ့။ ဘာပစ္စည်းမှ မပါဝင်တဲ့ တိုက်ခန်းခွံတစ်လုံးကို ပိုင်ဆိုင်ပြီးတဲ့အချိန်မှာ သူဟာ သူ အင်မတန် ကြိုက်နှစ်သက်တဲ့ယောက်ျား အဆိုတော်တစ်ယောက်ရဲ့ MTV အခွေကိုဖွင့်ကြည့်ဖို့ အောက်စက်နဲ့ ရုပ်မြင်သံကြားစက်တစ်ခုလုံး ပိုင်ဆိုင်ခွင့်ရဖို့ ထပ်ကြိုးစားပါလိမ့်မယ်။ ပြီးတော့ သူ့အတွက် ရှိသင့်ရှိထိုက်တဲ့ အသေးစားရေခဲသေတ္တာတစ်လုံးရယ်၊ အ၀တ်လျှော်စက်တစ်လုံးရယ်၊ အဲသလောက်ဆိုရင် သူမရဲ့တိုက်ခန်းဟာ သူမအတွက် နေချင်စဖွယ်ဖြစ်နိုင်ပြီ ထင်ပါတယ်။ ထားပါတော့။ အဲဒါတွေအားလုံးကို သူမ ပိုင်ဆိုင်ခွင့်ရပြီပဲ။ ဆက်ဆံရေးကျဲတောက်လှတဲ့ ရန်ကုန်တိုက်ခန်းလောကထဲကို သူမက အဖော်မပါ တစ်ယောက်တည်း ခြေစုံပစ်ဝင်တော့မှာတဲ့လား။ ဖြစ်နိုင်ပါ့မလား ငြိမ်းမိုးဝေ။ လှေကားထစ်ပေါင်းများစွာကို ဖြတ်ကျော်တက်ပြီးမှ ရောက်ရတဲ့ ကန်ထရိုက်တိုက်ခန်းတစ်ခုမှာ တစ်ကိုယ်တော် လာရောက်စံမြန်းနေသူဟာ သူမ ဖတ်ဖူးတဲ့ လုံးချင်းဝတ္ထုတစ်ပုဒ်ထဲက မိန်းမနောက်ပိုးတစ်ယောက်ပါ။ ကဲ… စဉ်းစားစမ်း။ ငြိမ်းမိုးဝေရဲ့ မိဘတွေက အဲသလောက် လက်လွတ်စပယ်နိုင်တဲ့ စိတ်ဓာတ်မျိုးနဲ့ အသက်၁၈နှစ်ပြည့်ပြီမို့ ဆန္ဒရှိရာလုပ်ပေတော့ဆိုပြီး သူမကို လွှတ်ထားမတဲ့လား။ ဝေးပါသေးရဲ့။ ကျောင်းပိတ်လို့ အိမ်ပြန်နောက်ကျရင်တောင် ကြေးနန်းအခါခါရိုက်ပြီး ပြန်လာမယ့်ရက်ကို တမေးတည်းမေးနေတဲ့ မိသားစုကို တော်လှန်ရေးလုပ်ရမယ့် ကိစ္စဟာ ထင်သလောက်တော့ လွယ်မှာမဟုတ်ဘူးနော်။

ဒါပေမယ့်လို့ အပြောင်းအလဲ မြန်လွန်းလှတဲ့ မဟာရန်ကုန်ရဲ့အရိပ်အငွေ့အောက်မှာ အသားကျပျော်မွေ့နေပြီဖြစ်တဲ့ မိန်းမတစ်ယောက်မှာ တိုက်ခန်းလိုချင်တဲ့ ရောဂါတစ်ခု စွဲကပ်နေခဲ့ပြီတဲ့။

(၂)

ကိုယ့်ကိုယ်ကို အပြစ်တင်ဖို့ ဘယ်တော့မှ စိတ်ကူးလေ့မရှိတဲ့သူမဟာ နံပါတ်တစ်တရားခံအဖြစ် မိဘနှစ်ပါးကို စွဲချက်တင်လိုက်တယ်။ ဟုတ်တယ်။ ငြိမ်းမိုးဝေကို ရန်ကုန်ပို့ပေးခဲ့တာ အဖေနဲ့အမေပဲ။ ရန်ကုန်တက္ကသိုလ်မှာ ပညာသင်ခိုင်းခဲ့တာလည်း အဖေနဲ့အမေပဲ။ ဒါကြောင့် တရားခံဟာ အဖေနဲ့အမေပဲဖြစ်ရမယ်။ ဒီရောဂါဟာ အဖေနဲ့အမေက ကျေနပ်ဝမ်းသာစွာ အစပျိုးမွေးမြူပေးခဲ့တဲ့ရောဂါ။ သေချာတယ်။ မဟုတ်သေးဘူးလေ ကလေးမရဲ့။ ခေါင်းအေးအေးထားပြီး စဉ်းစားဦးမှပေါ့။ ရန်ကုန်တက္ကသိုလ်ဘွဲ့ရမိန်းမတစ်ယောက်ရဲ့ အတွေးအခေါ်တွေ တလွဲတချော်ဖြစ်နေရင် လူကြားမကောင်းဘဲ ရှိရော့မယ်။ ပထမနှစ်စတက်တယ်ဆိုကတည်းက အဖေနဲ့အမေ မှာလိုက်တဲ့စကား ပြန်ကြားကြည့်ပါဦးလား။

"သမီး စာကြိုးစား၊ ရသမျှပညာကိုယူ၊ ပညာပြည့်စုံတဲ့အခါ ကိုယ့်ကိုယ်ကို တန်ဖိုးရှိအောင်လုပ်၊ ပြီးတော့ မိသားစုအတွက် တန်ဖိုးရှိအောင်လုပ်၊ ပြီးရင် တိုင်းပြည်အတွက် တန်ဖိုးရှိအောင်လုပ်" တဲ့။ မမေ့ပါဘူးကွယ်။ ငြိမ်းမိုးဝေက မှတ်ဥာဏ်နည်းတဲ့သူမှမဟုတ်ဘဲ၊ ဖြစ်ရမှာပေါ့။ မိသားစုအတွက် တန်ဖိုးရှိတဲ့မိန်းမ ဖြစ်စေရမှာပေါ့။

"ဒါ ငြိမ်းမိုးဝေလုပ်အားနဲ့ ၀ယ်ထားတဲ့ တိုက်ခန်းလေ၊ အဲဒါ သူ့စိတ်ကြိုက်ဝယ်ထားတာ"

ကဲ… အဲသလို ပြောခွင့်ရရင် ငြိမ်းမိုးဝေရဲ့ မိသားစု ဂုဏ်မတက်ရပေဘူးလား။ ငြိမ်းမိုးဝေတို့ကတော့ လုပ်ချလိုက်ပြန်ပါပြီ။ မိန်းမတစ်ယောက်က တိုက်ခန်းလေးတစ်ခန်း ပိုင်ရတာနဲ့ တန်ဖိုးရှိသွားပြီတဲ့လား။ ဟုတ်ပါရဲ့။ ငြိမ်းမိုးဝေတို့ မိသားစု ပိုင်ဆိုင်တဲ့ ခြံကြီးဟာ ကြယ်ငါးပွင့်ဟိုတယ်ကြီးငါးလုံးလောက် ဆောက်လို့ရအောင် ကျယ်ဝန်းနေတယ်လေ၊ ပြီးတော့ ငြိမ်းမိုးဝေတို့မိသားစုငါးယောက်တည်းနေတဲ့ နှစ်ထပ်ပျဉ်ထောင်အိမ်ကြီးကို ဘီးတပ်ပြီး ကမာရွတ်လှည်းတန်း တစ်နေရာရာမှာ ချလို့ရရင် ဘော်ဒါဆိုင်ဖွင့်ဖို့ ဘယ်လောက်များ ကောင်းလိုက်လေမလဲ။ ခုတင်တစ်လုံးနဲ့ စားပွဲတစ်လုံးစာ အခန်းကျဉ်းလေးထဲမှာ မွန်းကျပ်ကျပ်အသက်ရှူခွင့်ရဖို့ တစ်ထောင်တဲ့။ အဲဒါတွေ အဲဒါတွေကြောင့် ရန်ကုန်မှာ တိုက်ခန်းတစ်ခန်းလိုပါတယ်လို့ ပြောရပေတာပေါ့။ 

နေစမ်းပါဦး၊ သူမရဲ့ အသက်ရှူခွင့်ပါမစ်ဟာ ရန်ကုန်မှာသာ အကျုံးဝင်တယ်လို့ ဘယ်သူက သတ်မှတ်ပေးတာလဲ။ ကော်ဖီပင်တွေကြားမှာ၊ လိမ္မော်ပင်တွေကြားမှာ၊ ပန်းနှမ်းခင်းတွေထဲမှာ အသက်ရှူရတာ ဘယ်လောက်များ ကောင်းသလဲဆိုတာ စဉ်းစားကြည့်စမ်းပါဦး။ တောင်တန်းတွေရယ်၊ စမ်းချောင်းလေးတွေရယ်၊ ပြီးတော့ ခရစ္စမတ်ပန်းနီနီတွေရယ်၊ အဲဒါတွေ ရန်ကုန်မှာရှိလို့လားတဲ့။ ညီမလေးရဲ့စကား ပြန်ကြားယောင်နေမိတယ်။ ရယ်စရာပဲကောင်းသေးတော့လို့ ငြိမ်းမိုးဝေဆိုလိုက်ချင်ရဲ့။

"တောင်တန်းတွေ၊ စမ်းချောင်းတွေတင် ဘယ်ကမလဲ၊ လိုဏ်ဂူတွေ၊ ရေတံခွန်တွေ ရန်ကုန်မြို့တော်ကြီးက ဥယျာဉ်ပန်းခြံတွေထဲမှာ အစုံအလင်အကုန်အစင်ရှိတယ်" လို့ ညီမလေးကို ပြောပြရဦးမယ်။

"တောတွေတောင်တွေကို ဒီထက်ပိုကြည့်ချင်သေးရင် လှော်ကားဥယျာဉ်ထိ လိုက်ပို့ပေးမယ်" လို့ ပြောပြတဲ့အခါ သူမရဲ့ တစ်ဦးတည်းသော ခပ်တုံးတုံးကျောင်းဆရာမက အံ့သြနေဦးတော့မှာ။ သူမနှင့်ညီမလေး ဘယ်တုန်းကမှ ခံစားချက်၊ မျှော်လင့်ချက်ချင်း မတူညီခဲ့ကြဘူးလေ။ ညီမလေးက တောင်တန်းတွေကိုကြည့်ရင်း ပျော်နေတတ်သူ၊ တောင်ခိုးတွေ မြူနှင်းတွေကို ချစ်သူ၊ ကဗျာတွေကို မြတ်နိုးသူ၊ အနံ့အသက်ဆိုးဝါးလှတဲ့ ကလေးတွေကြားမှာ ပြုံးပျော်နေနိုင်သူ၊ ၅မိုင်အကွာအဝေးလောက်ကို စက်ဘီးနဲ့ ပေါ့ပေါ့ပါးပါး ရယ်ရယ်မောမော နင်းသွားနိုင်သူ၊ သူမကတော့ တစ်မှတ်တိုင်စာလောက် လမ်းလျှောက်ရမှာကိုပင် မျက်နှာရှုံ့၊ နှုတ်ခမ်းစူချင်တတ်သူ၊ မိုးထိမတတ်မြင့်မားခမ်းနားသော အဆောက်အအုံကြီးများကို သဘောကျနှစ်သက်သူ၊ တိုက်ခန်းတစ်ခန်းပိုင်ဆိုင်ခွင့်ရဖို့ အိပ်မက်များဖြင့် ရူးသွပ်နေသူ၊ လမ်းဘေးလက်ဖက်ရည်ဆိုင်များ၊ ကက်ဆက်သံများအကြား ပျော်မွေ့ချင်သူ။ ပြီးတော့ လိုင်းကားတိုးစီးရခြင်းဒုက္ခကို လူ့ဘ၀ရဲ့ အဓိပ္ပာယ်တစ်ခုလို့ ထင်မှတ်နေသူ။ ဖြစ်ရမယ်မဟုတ်လားဟင်။ သူမရဲ့ အသက်ရှူခွင့်ဟာ ရန်ကုန်မြို့တော်ကြီးရဲ့ တစ်နေရာရာမှာပဲ။

(၃)

အတွင်းရေးမှူးသင်တန်း တက်နေတယ်ဆိုတဲ့ အကြောင်းပြချက်နဲ့ ရန်ကုန်မှာရှိနေတဲ့ သူမဟာ အိမ်ကိုပြန်ရမယ်ဆိုတာသိလျက်နဲ့ မေ့နေခဲ့တယ်။ သင်တန်းပြီးရင် သူမ အိမ်ပြန်ရတော့မယ်။ ပြန်မယ်လေ၊ ခဏတစ်ဖြုတ်ပေါ့။ ပြီးတဲ့အခါ အလုပ်ဝင်၊ လောလောဆယ် အဆောင်မှာပဲဆက်နေ၊ တဖြည်းဖြည်းပိုက်ဆံစု၊ သူမက စိတ်ကူးယဉ်အိပ်မက်လှလှလေးတွေနဲ့ ပြုံးနေမိတယ်။ အားလုံးလိုလိုပါပဲ။ သူမရဲ့ သူငယ်ချင်းမတွေလည်း အဲဒီရောဂါတစ်ခုနဲ့ ရန်ကုန်မြို့ထဲမှာ ရှိနေကြတာ။ ကျောင်းတွေတက်၊ သင်တန်းတွေမျိုးစုံတက်၊ အဲဒီလိုတက်နေတာဟာ ရန်ကုန်မြို့ကြီးထဲ ၀င်ဆန့်နိုင်ဖို့ပဲမဟုတ်လား။ ရန်ကုန်မြို့ကြီးထဲက မထွက်ခွာချင်သူတွေဟာ ဒီနည်းနဲ့ပဲ ကုပ်တွယ်နေကြမှာမဟုတ်လား။ အထူးသဖြင့် သူမတို့လို ဘွဲ့ရပညာတတ် အမျိုးကောင်းသားသမီးတွေလေ။ ဒါမှသာ ငြိမ်းမိုးဝေဟာ ကိုယ့်ဘ၀ကိုယ် ထူထောင်နိုင်သူ၊ တန်ဖိုးရှိသူ အမျိုးသမီးဖြစ်ရမှာ မဟုတ်လားကွဲ့။ သူမ ကျေနပ်နေတယ်။ ညီမလေး ခမ်းဆီ စာပြန်ရဦးမယ်၊ သင်တန်းပြီးရင် ပြန်လာခဲ့မယ်။ အလုပ်လုပ်ဖို့ စုံစမ်းထားတယ်။ ဒီမှာပဲ အလုပ်ဝင်တော့မယ်လို့။ ငြိမ်းမိုးဝေဆိုတဲ့ မိန်းမတစ်ယော်ကို လူဖြစ်ခွင့်ပေးခဲ့တဲ့ ဆောင်းရာသီမှာ ရေခဲလုနီးပါးအေးတဲ့ ဒေသလေးကို သူမ စွန့်လွှတ်ရတော့မယ်၊ အဖေနဲ့အမေရယ်၊ ပြီးတော့ ကိုကိုကြီးနဲ့ ခမ်းရယ်။

အို… သူတို့ကို ဘယ်အချိန်သွားတွေ့တွေ့ရနိုင်တာပဲဟာ။ လူ တစ်ယောက်နဲ့တစ်ယောက် ခွဲခွာနေထိုင်ရတဲ့ ကိစ္စဟာ ဆန်းတာမှမဟုတ်ဘဲ။ နွားခြေရာခွက်ကို သမုဒ္ဒရာထင်နေလို့ ငြိမ်းမိုးဝေဘ၀ တိုးတက်လာမတဲ့လား။ တန်ဖိုးရှိလာမတဲ့လား။ ကိုယ့်ကိုယ်ကို တန်ဖိုးရှိလှပြီလို့ထင်နေတဲ့ မိန်းမတစ်ယောက်ဟာ ရန်ကုန်မြို့ကြီးက သူတစ်ယောက် လျော့သွားရင် ရန်ကုန်မြို့ကြီးတစ်ခုလုံး တန်ဖိုးလျော့သွားတော့မယ်ဟန်နဲ့ ကော်လံတောင်ထောင်လို့။ ရန်ကုန်မြို့အတွင်းမျာ တစ်နေ့ထက်တစ်နေ့ သူလိုလူမျိုးတွေ များများလာလို့ အောက်စီဂျင်တွေ လျော့နည်းလာလိမ့်လို့တော့ မထင်မိပါဘူး။ ရန်ကုန်မြို့တော်ကြီးဟာ ဥယျာဉ်မြို့တော်ကြီး ဖြစ်နေတာပဲမဟုတ်လား။ အဲသလောက် အတွက်အချက် မကောင်းစမ်းပါနဲ့ဦး။ တစ်ခုပဲစဉ်းစား၊ ရန်ကုန်တက္ကသိုလ်ကြီးက မွေးထုတ်ပေးလိုက်တဲ့ လူ့အဖိုးတန် အမျိုးကောင်းသားသမီးတွေ အားလုံးနီးပါးဟာ ငြိမ်းမိုးဝေကို AIDS ထက် ကုရခက်တဲ့ ရောဂါသစ်တစ်ခုနဲ့ မြို့တော်မဟာရန်ကုန်ကိုပဲ ဖက်တွယ်နေမယ်ဆိုရင် ဘုရားရေ… ဘတ်(စ်)ကားပေါ်မှာမဟုတ်ဘဲ အသက်ရှူကျပ်နေပြီ။

(၄)

"ငြိမ်းမိုးဝေ၊ အမေ အသည်းအသန်ဖြစ်၊ အမြန်ပြန်လာ"

ထူးအိမ်သင်ရဲ့ အမေ့အိမ်သီချင်းကိုညည်းရင်း မှောင်မည်းမည်းလှေကားထစ်ကလေးတွေကို နင်းပြီး အဆောင်ပြန်လာတဲ့ ငြိမ်းမိုးဝေကို အခန်းဝသော့ချက်ကြားက ကြေးနန်းတိုကလေးက ကြိုနေခဲ့တယ်။ ဘယ်တုန်းကမှ မလင်းခဲ့တဲ့ သူမရဲ့အခန်းလေး မှောင်အတိကျသွားတယ်။ မြတ်စွာဘုရား ကယ်မစောင့်ရှောက်တော်မူပါ၊ အမေ ဘာမှမဖြစ်လိုက်ပါနဲ့။ မမေ့ဘူး အမေ၊ မေ့နေခဲ့တာမဟုတ်ပါဘူး။ အမေ့ကို ပြုစုလုပ်ကျွေးဖို့ ငြိမ်းမိုးဝေဆိုတဲ့မိန်းမ ဘယ်တော့မှ မမေ့ခဲ့ပါဘူး။ အစီအစဉ်ရှိတယ်လေ။ အမေ အသက် ၇၀ ပြည့်တဲ့အခါ ငြိမ်းမိုးဝေ အမေ့အနားမှာ ရှိနေမှာ။ အဖေနဲ့အမေကို ခြေဆုပ်လက်နယ် ပြုစုပေးမှာ။ ခု ဘယ်လောက်လဲဟင် အမေ့အသက်။

အမေ့အသက် အခုမှ ၅၆ နှစ်သာမဟုတ်လား။ ဖြစ်မှဖြစ်ရလေတယ်။ လူတစ်ယောက်ရဲ့သက်တမ်းကို အခိုင်အမာတွက်ချက်သူကများ စီမံကိန်းချမှတ်လို့။ လာပါပြီအမေ။ အတောင်ပံမရှိတဲ့ အမေ့သမီး လေယာဉ်ကြီးစီးလို့ ပြန်လာခဲ့ပါမယ်။ စပယ်ရှယ်ဖလိုက်နဲ့ဖြစ်ဖြစ်၊ အက်ဖ်အီးစီဖလိုက်နဲ့ပဲဖြစ်ဖြစ်၊ အို… ဘယ်ဟာရရ ခုံတစ်နေရာရဖို့ပါပဲ။ ဘယ်လောက်ပဲကုန်ကုန် ကုန်စေရမှာပေါ့။ ခုတင်အောက်က သံသေတ္တာလေးကို ဖွင့်နေတဲ့ သူမရဲ့လက်တွေ တုန်ယင်နေပုံက နတ်ဝင်သည်တစ်ယောက်လို ဖြစ်နေခဲ့တယ်။ အဖေနဲ့အမေ တစ်လတစ်လပို့နေတဲ့ ကျောင်းစရိတ်နဲ့ သင်တန်းကြေးတွေကို အတတ်နိုင်ဆုံး ချွေတာသုံးလို့ သူမ စုဆောင်းထားခဲ့တာ လူတကာပြောင်းပြောင်းပြေးတဲ့ အမှောင်ခန်းလေးထဲက မထွက်နိုင်တဲ့အထိပေါ့။ အောက်စီဂျင်နည်းပါးတဲ့အခန်းလေးရဲ့ ပုံမှန်ဝန်ဆောင်နိုင်မှုက အမျိုးသမီးသုံးယောက်စာတဲ့။ ဒါပေမယ့် ငြိမ်းမိုးဝေရယ် နီနီနိုင်ဆိုတဲ့ ကောင်မလေးတစ်ယောက်သာ ဒီအခန်းကို အပိုင်စားရထားတာ။ ကျန်တဲ့ ခုတင်တစ်လုံးကတော့ ငြိမ်းမိုးဝေတို့နှစ်ယောက် စုံစီနဖာတွေတင်ဖို့အဖြစ်သာ ရှိနေလေရဲ့။ ငြိမ်းမိုးဝေတို့နှစ်ယောက်ကတော့ ဘယ်သူတွေပြောင်းပြောင်း ကိုယ်မပြောင်းတဲ့မူနဲ့ဒီအခန်းလေးကို သံယောဇဉ်ကြီးနေခဲ့ကြတယ်။ ဒါဟာ ငြိမ်းမိုးဝေလိုချင်တဲ့ တိုက်ခန်းတစ်ခုရဲ့အရင်းအနှီးတစ်ချို့တစ်ဝက် ဖြစ်ခဲ့တယ်မဟုတ်လား။ ခြစ်ခြုတ်သိမ်းဆည်းထားခဲ့တဲ့ သူမပိုင် ငွေစက္ကူတချို့နဲ့ တစ်စုံတစ်ယောက်ကို ပစ်ပေါက်ပြီးတဲ့အခါ သူမ အမေနား ရောက်သွားတော့မှာ။

(၅)

"နင်က စောစောမှ ပြန်မလာခဲ့တာ" သူမရဲ့ လုပ်ရပ်တွေအပေါ် ဘယ်တော့မှ ဝေဖန်အပြစ်တင်လေ့မရှိတဲ့ ညီမလေးရဲ့စကားက ငြိမ်းမိုးဝေကို ဆောက်တည်ရာမဲ့စေခဲ့တယ်။ အကြောင်းမရှိအကြောင်းရှာပြီး သင်တန်းမျိုးစုံနဲ့ ပညာတွေရှာနေခဲ့တဲ့ သူမရဲ့ အိမ်ပြန်ချိန်တွေ အမြဲနောက်ကျခဲ့တာကို ရည်ရွယ်လိုက်တာများလား။

"အမေက နင်ပြန်လာမလားလို့ အကြာကြီးစောင့်နေခဲ့တာ။ ဒါပေမယ့် အသက် ၇၀ ပြည့်တဲ့အထိတော့ စောင့်မသွားနိုင်ခဲ့ဘူးပေါ့လေ"

တော်တော့… တော်ပါတော့…ခမ်း။ ကဗျာဆရာမပီပီ စကားလုံးလှလှတွေနဲ့ မပစ်ပေါက်ပါနဲ့တော့။ အမေ့ရဲ့အသက်ရှူခွင့်ကို မတားဆီးနိုင်ခဲ့တဲ့အတွက် တရားခံဟာ ငြိမ်းမိုးဝေပဲဖြစ်ရမှာပါ။ နင်လိုတရားရှိတဲ့၊ တရားသိတဲ့ လူတစ်ယောက်တောင် အမေ့ကိုဆုံးရှုံးလိုက်ရတဲ့အတွက် ဖြေမဆည်နိုင်အောင် ကြေကွဲနေသေးရင် အရာရာကို အချိန်တွေ၊ တန်ဖိုးတွေနဲ့ တွက်ချက်ကြည့်တတ်တဲ့ ငြိမ်းမိုးဝေဆိုတဲ့ မိန်းမဟာ သူမျှော်လင့်ထားတဲ့ စီမံကိန်းတစ်ခု တစ်စစီ ပြိုပျက်သွားရတဲ့ အဖြစ်အပေါ် ဘယ်လောက်နာကျင်ကြေကွဲနေမယ်ဆိုတာ နားလည်ပေးလိုက်ပါလား ခမ်း။

အမေ့ရဲ့ ဈာပနဟာ ငြိမ်ငြိမ်သက်သက်ပဲ ပြီးဆုံးသွားခဲ့တယ်။ စေတနာ၊ မေတ္တာတရား ကြီးမားလွန်းလှတဲ့ ရပ်ရွာအကျိုးကို ဆောင်တတ်တဲ့ လူချစ်လူခင်များတဲ့ အမေ့ရဲ့နောက်ဆုံးခရီးကို လိုက်ပါပို့ဆောင်သူတွေက အမေ့ရဲ့ဂုဏ်ပုဒ်ကို စီကာပတ်ကုံး တဖွဲ့တနွဲ့တ,ပြီး မငိုကြတဲ့ သမီးနှစ်ယောက်ကို အပြစ်တင်လိုတဲ့ မျက်လုံးတွေနဲ့ ကြည့်နေခဲ့ကြတယ်။ ငြိမ်းမိုးဝေကိုကြည့်တဲ့ မျက်လုံးတေါက ပိုလို့အရောင်တောက်နေခဲ့တယ်ထင်တယ်။ အမေ မရှိတဲ့နောက်ပိုင်း သူမနဲ့ညီမလေး စကားလေးလုံးကွဲအောင် မပြောဖြစ်ခဲ့ကြဘူး။ အစ်ကိုကြီးကတော့ သူမပြန်လာတဲ့အတွက် ထုံးစံအတိုင်း သူမအကြိုက်တွေကို တစ်ခုပြီးတစ်ခု ၀ယ်ကျွေးပြီး ပြုံးနေခဲ့တယ်။ အဖေကတော့ အတိုင်းအဆမရှိတဲ့ ပီတိတွေနဲ့ပေါ့။ အမေ့ကိုသေတဲ့အထိ စကားမာမာမပြောဖူးဘဲ ချစ်မြတ်နိုးခဲ့တဲ့ အဖေဟာ အမေမရှိပေမယ့် အမေ့နေရာမှာ ၀င်လာမယ့် သမီးကြီးရောက်လာပြီမို့ အားတက်လာရပါသတဲ့။ သူမရဲ့ စီမံကိန်းတွေချပြဖို့ အစည်းအဝေးအတွက် သူမ ဖိတ်စာမရိုက်ရဲဘူး ဖြစ်နေခဲ့ရတယ်။ ဒါပေမယ့် တက်ရောက်သူနှစ်ဦးတည်းရှိတဲ့ အရေးပေါ်ဆွေးနွေးပွဲလေးတစ်ခုကို အမေ့အုတ်ဂူဆီ သွားကန်တော့ပြီး ပြန်လာတဲ့ ညနေခင်းလေးတစ်ခုမှာ မထင်မှတ်ဘဲ ကျင်းပဖြစ်ခဲ့တယ်။ ကဗျာဆရာမတစ်ယောက် စ,ဖွင့်လိုက်တဲ့ လျှပ်တစ်ပြက်ဆွေးနွေးပွဲလေးရဲ့ နိဒါန်းက အတော့်ကိုအရုပ်ဆိုး အကျည်းတန်ပါတယ်။ "မမငြိမ်း… နင် ရန်ကုန်မှာ သေမှာလားဟင်" တဲ့။ အဲဒီလို စကားမျိုးကို အင်မတန်နူးညံ့တဲ့လေသံမျိုးနဲ့ ပေါ့ပေါ့လေး ပြောနိုင်ခဲ့တာ ငြိမ်းမိုးဝေရဲ့ ညီမတစ်ယောက်တည်း ဖြစ်ပါလိမ့်မယ်။

"လူတွေဟာ ကိုယ့်သင်္ချိုင်းကို ကိုယ် ရွေးချယ်တတ်ကြတယ်တဲ့။ ငါလည်း ငါ့သင်္ချိုင်းကို ငါ့ဘာသာရွေးထားတယ်"

ပါးအို့နှစ်ဖက်မှာ ပန်းနီရောင်ဆိုးထားသလို နီရဲပြောင်လက်နေတဲ့ မျက်နှာနုနုလေးနဲ့ ကောင်မလေးတစ်ယောက်က ပြောလိုက်တာလို့ တကယ်ကိုမထင်ရတာပါ။

"ဘယ်မှာလဲလို့တော့ မေးဦးမှပေါ့ မမငြိမ်းရယ်"

"ဘယ်မှာလဲ"

ငြိမ်းမိုးဝေ ကယောင်ကတမ်း ထ,မေးလိုက်မိတယ်။

"ဒီမှာပဲလေ၊ အမေ့ရဲ့ ဘေးမှာပေါ့"

သူမ ညီမလေးကို ပြူးကြောင်ကြောင် လှမ်းကြည့်နေမိတယ်။ ခမ်းရဲ့ မျက်လုံးလေးတွေက ကြည်လို့ပြုံးလို့။ ငြိမ်းမိုးဝေမျက်လုံးတွေလို ကစဉ့်ကလျား ကြောင်စီစီမနိုင်ခဲ့ဘူး။

"မမငြိမ်း ကိုကိုကြီးကို လေယာဉ်လက်မှတ် လုပ်ခိုင်းပြီးပြီလား"

"ဟင့်အင်း၊ ငါ ဘာမှမှမပြောရသေးတာ"

"ဒါပေမယ့် သူတို့သိပါတယ်၊ မမငြိမ်း ရန်ကုန်ကို ပြန်ဦးမှာဆိုတာ"

"ငါ.. ငါ… မပြန်သင့်ဘူးလားဟင်"

"နင်က ငါ့ထက် ပညာတွေအများကြီးပိုသင်ထားတာပဲ မမငြိမ်းရယ်၊ သင့်တော်တာတွေ မသင့်တော်တာတွေကို ငါ့ထက် ပိုသိမှာပါ။ ပြီးတော့ တန်ဖိုးရှိတဲ့ လူတစ်ယောက်ဖြစ်နေပြီလို့ နင့်ကိုယ်နင် ယုံကြည်နေပြီပဲ မဟုတ်လား"

ဘုရားရေ.. သူ ဘာတွေပြောနေတာလဲ။ လမ်းပန်းဆက်သွယ်ရေး ညံ့ဖျင်းလွန်းလှတဲ့ တောကောင်းက ကျောင်းဆရာမတစ်ယောက်ဟာ ရန်ကုန်လူမှုဆက်ဆံရေးနယ်ပယ်ထဲမှာ ကျင်လည်နေပြီဖြစ်တဲ့ ခပ်ထက်ထက် မိန်းမတစ်ယောက်ကို စကားစစ်ထိုးဖို့ စိန်ခေါ်လိုက်တာများလား။

"ငါ သိသလောက်တော့ လူ့တန်ဖိုးဆိုတာကို အဲဒီလူရဲ့ ပတ်ဝန်းကျင်က သတ်မှတ်ပေးတာပါ။ အဖေနဲ့အမေကိုကြည့်စမ်း။ အတန်းပညာအနေနဲ့ ကိုးတန်းထိပဲ စာသင်ခဲ့ရတဲ့ တောကျောင်းလေးတစ်ခုရဲ့ ကျောင်းအုပ်ဆရာကြီးဖြစ်ခဲ့တဲ့ အဖေဟာ တို့တွေအပါအ၀င် အမေမွေးထုတ်ပေးတဲ့ လူငယ်တွေအများကြီးကို အသိဥာဏ်ပညာရှိတဲ့လူတွေဖြစ်အောင် ပြုစုပျိုးထောင်ပေးခဲ့တယ်။ (၇)တန်းပညာပဲတတ်တဲ့ အမေက လူ့လောကကြီးထဲကို လူသားအသစ်တွေ ချောချောမောမောရောက်လာဖို့ သူ့ရဲ့လက်နှစ်ဖက်နဲ့ ဆွဲခေါ်ပေးခဲ့တယ်။ အဖေနဲ့အမေရဲ့ တန်ဖိုးက ဟောဒီက လူတွေအားလုံး သိကြတယ်။ ဆယ်တန်းမအောင်ခဲ့တဲ့ ကိုကိုကြီးက ဒီခြံကြီးထဲက အလုပ်သမားတွေရဲ့ ကျေးဇူးရှင်၊ ထမင်းရှင်ဖြစ်ခဲ့တယ်။

ပညာတတ်လာတဲ့လူတွေက ကိုယ့်ရွာကို ဘယ်တော့မှ ပြန်လာလေ့မရှိဘူးတဲ့။ အဲဒါ ဘာကြောင့်ဖြစ်မလဲဟင် မမငြိမ်း။ ငါ ထင်တာတော့ သူတို့တတ်ထားတဲ့ပညာကို ဖြန့်ဝေအသုံးမချတတ်လို့ပဲလို့ ထင်တယ်။ ကွန်ပျူတာနဲ့ အသက်မွေးချင်တဲ့လူတစ်ယောက်က လက်နှိပ်စက်တောင်မရှိတဲ့အရပ်မျိုးမှာ အသက်မရှူနိုင်တာ အဆန်းတော့ မဟုတ်ဘူးပေါ့လေ။ အဲဒီလို ကွန်ပျူတာမရှိတဲ့ အရပ်တစ်ခုကို ကွန်ပျူတာတစ်လုံးလောက် ပို့နိုင်သူတွေရှိလာရင် ကွန်ပျူတာစက်တစ်လုံးရဲ့ တန်ဖိုးကို နားလည်အောင် ရှင်းပြနိုင်သူတွေများလာရင် တို့တိုင်းပြည်ကြီးက ဘယ်နေရာမှာဖြစ်ဖြစ် ရယ်စရာကောင်းလာမှာပါ။

မြို့ပြကို အရူးအမူးတွယ်ဖက်နေချင်ကြတဲ့ လူအယောက်တစ်ရာထဲက တစ်ယောက်လောက်ဖြစ်ဖြစ် သူ့ရဲအတ္တကို လျှော့ချပြီး ကျေးလက်တောရွာတွေကို ဆင်းလာခဲ့ရင် တို့လို တောမှာနေတဲ့ လူတွေအတွက် ဘယ်လောက်များ တန်ဖိုးရှိလိုက်မလဲ"

ညီမလေးမျက်နှာကို သူမ ခပ်ကြောင်ကြောင်ကြည့်မိသွားတယ်။ ပြီးတော့ သူမ မရည်ရွယ်ဘဲ စကားပြောဖြစ်လိုက်တယ်။

"လူတွေဟာ ကိုယ့်ခြေထောက်ပေါ်မှာကိုယ် ရပ်တည်ခွင့်ရဖို့ စွန့်လွှတ်သင့်တဲ့အရာတွေကို စွန့်လွှတ်ပစ်ကြရတယ်လေ၊ အဲဒီစွန့်လွှတ်မှုတွေထဲမှာ ကိုယ်ချစ်တဲ့လူတွေလည်း ပါရင်ပါမယ်၊ နေရာဒေသတွေလည်း ပါရင်ပါမယ်"

ညီမလေးက သူမရဲ့စကားကို သဘောကျဟန်နဲ့ ပခုံးလေး လှုပ်ယမ်းသွားတဲ့အထိ ရယ်နေတာကတော့ သူမကို အခံရခက်စေပါတယ်။

"ကိုယ့်ခြေထောက်ပေါ်ကိုယ် ရပ်နိုင်ဖို့လေးအတွက် စွန့်လွှတ်ရတာချင်းအတူတူ အဲဒီစွန့်လွှတ်မှုဟာ ပတ်ဝန်းကျင်ကိုပါ အကျိုးပြုနိုင်တဲ့ စွန့်လွှတ်ခြင်းမျိုးဖြစ်ရင် ပိုမကောင်းဘူးလားဟင်။ ကိုယ့်ရဲ့တိုးတက်အောင်မြင်မှုအတွက် ကိုယ့်မိသားစုကို စွန့်ခွာရတယ်။ ကိုယ်နေထိုင်ခဲ့တဲ့ အရပ်ဒေသတွေကို စွန့်ခွာရတယ်။ ပြီးတော့ ကိုယ့်ရဲ့တိုင်းပြည်ကိုပါ စွန့်ခွာနေတဲ့လူတွေ ရှိလာကြပြီ။ အဲဒီလို စွန့်လွှတ်မှုမျိုးတွေအတွက် ကိုယ်ပြန်ရတဲ့ တန်ဖိုးကရော ကိုယ်ပေးဆပ်လိုက်ရတာတွေထက် ပိုအဖိုးတန်ရဲ့လားဆိုတာတော့ စဉ်းစားကြည့်ဖို့ ကောင်းတာပေါ့နော် မမငြိမ်း"

ခမ်းက သူမ မျက်လုံးများကို စိုက်ကြည့်ပြီးမှ ခြံထောင့်ရှိ သရက်ပင်အိုးကြီးဆီ အကြည့်လွှဲခဲ့တယ်။

"မမငြိမ်းကို ရန်ကုန်မပြန်ပါနဲ့လို့ ခမ်း တားနေတာမဟုတ်ဘူးနော်၊ ဘယ်နေရာမှာပဲနေနေ လူမှုပတ်ဝန်းကျင်ကို အနည်းနဲ့အများ အကျိုးပြုနိုင်တဲ့ လူတစ်ယောက်ဖြစ်ဖို့သာ အရေးကြီးတယ်ဆိုတာ သတိပေးတာပါ။ ခမ်းတို့က အဖေနဲ့အမေ့သမီး ပီသဖို့ လိုတယ်မဟုတ်လားဟင်။ မမငြိမ်း စဉ်းစားကြည့်ဦးပေါ့။ ညနေ စာပေဟောပြောပွဲရှိတယ်။ ငါ ဧည့်ခံပေးရဦးမှာ၊ စက်ဘီးနင်းရမှာနဲ့ စောစောသွားမှဖြစ်မယ်၊ ကဲ… ငါသွားတော့မယ်နော်"

ပြောပြောဆိုဆိုပဲ သူမဘေးကနေ ခမ်း ထွက်သွားခဲ့တယ်။ ကြည့်စမ်း… အဲဒါ ချောင်ကျကျ နယ်ကောလိပ်လေးတစ်ခုမှာ အဝေးသင် ဒုတိယနှစ်တက်နေတဲ့ ကောင်မလေးတစ်ယောက်တဲ့။ တွဲလောင်းကျနေတဲ့ ရှောက်ပန်းသီးစိမ်းစိမ်းကြီးတွေကိုကြည့်ရင်း ခြံထဲမှာပဲ ငြိမ်းမိုးဝေ အချိန်အတော်ကြာ တွေးနေမိတယ်။ မိသားစုကို စွန့်ခွာပြီး ကိုယ့်ဘ၀ကိုယ် ထူထောင်ဖို့ကြိုးစားနေတဲ့ မိန်းမတစ်ယောက်နဲ့ မိသားစုနဲ့အတူနေရင်း သူတစ်ပါးဘ၀တွေကို ထူထောင်ပေးနေတဲ့ မိန်းမတစ်ယောက်ရဲ့ တန်ဖိုးဆိုတာကို။

(၆)

"ငါ တကယ်ဆုံးဖြတ်လိုက်တာ နီ၊ ငါ ဒီအလုပ်က ထွက်တော့မယ်"

သူမစကားကို နီ အံ့သြတကြီး ဖြစ်သွားတယ်။ စိတ်မကောင်းဖြစ်နေတဲ့မျက်လုံးတွေနဲ့ ကြည့်နေတယ်။ ဒေါ်လာ ၁၅၀ ရတဲ့ ဂျပန်ကုမ္ပဏီတစ်ခုကနေ အလုပ်ထွက်ပြီး ဒေါ်လာ ၂၀၀ ရတဲ့ ကုမ္ပဏီအသစ်ကို ပြောင်းအလုပ်လုပ်နေတဲ့ သူမရဲ့ အခန်းဖော်သူငယ်ချင်းမဟာ သူရတဲ့လစာနဲ့ ငြိမ်းမိုးဝေရတဲ့လစာကို နှိုင်းယှဉ်ကြည့်ပြီး "လစာနည်းလို့လားဟင်" ဆိုတဲ့ မေးခွန်းကိုမေးမှန်း သူမ သိလိုက်ပါတယ်။ ရုက္ခဗေဒဘာသာရပ်နဲ့ အဝေးသင်တက္ကသိုလ်က ဘွဲ့ရထားတဲ့ မိန်းမတစ်ယောက်ရဲ့ တစ်လစာဝင်ငွေနဲ့ ရန်ကုန်တက္ကသိုလ်မှာ နေ့ကျောင်း၅နှစ်တက်ပြီး ဘွဲ့ရထားတဲ့ မိန်းမတစ်ယောက်ရဲ့ လစာဝင်ငွေကွာဟမှုဟာ အချိုးအစား မမျှတလွန်းဘူးဆိုတာ သူမ သိခဲ့သားပဲ။ ဒါ ဆန်းတဲ့ကိစ္စမှ မဟုတ်တာ။

"ဒီလိုပါပဲ ငြိမ်းရယ်၊ ငါ ရန်ကုန် စ,ရောက်လာတုန်းကဆိုရင် အဒေါ်ဝမ်းကွဲအိမ်မှာ မကြည်မဖြူ ကပ်နေခဲ့ရတာ၊ အသက်ကလည်း ငယ်၊ အတွေ့အကြုံကလည်းမရှိဘဲ ဆယ်တန်းအောင်တယ်ဆိုတဲ့ အရည်အချင်းလေးတစ်ခုတည်းနဲ့ အရဲစွန့်ပြီး အလုပ်ရှာခဲ့ရတာ။ ကိုယ့်ဘ၀မပျက်စီးအောင် သတိကြီးကြီးနဲ့ နေလာခဲ့တော့ စ,ရတဲ့အလုပ်ရဲ့လစာက ကားစီးရတာနဲ့ လက်ဖက်ရည်ဖိုးလောက်နဲ့တင် ကုန်ရော။ ဒီလိုနဲ့ပဲ လူဝင်ဆန့်လာမှ ကောင်းနိုးရာရာ အလုပ်တွေပြောင်းလုပ်ရင်း ဒီလိုအခြေအနေရောက်လာခဲ့တာ။ လစာကောင်းတာတော့ လူတွေမြင်တာပေါ့။ ငါ ဘယ်လောက်စိတ်ပင်ပန်း လူပင်ပန်းရတယ်ဆိုတာ နင်သိပါတယ် ငြိမ်းရယ်၊ ဒါပေမယ့် ငါ့ ကိုယ်ကျင့်တရားကို ငါ နည်းနည်းလေးမှ အထိခိုက်မခံခဲ့ဘူးငြိမ်း။ သူတို့ဆီက ထိုက်သင့်တဲ့ငွေကြေးကိုရဖို့ ငါလည်း ငါ့ဦးနှောက်ကိုရော လုပ်အားကိုပါ အပြည့်အ၀ပေးထားခဲ့ရတာပါဟာ"

အသက် ၂၄ နှစ်ဆိုတဲ့ အရွယ်နဲ့မလိုက်အောင် ရင့်ကျက်တည်ငြိမ်လွန်းတဲ့ နီ့ရဲ့ မျက်နှာဖြူဖြူလေးကို သူမ ကြည့်လိုက်မိတယ်။ နီ အလုပ်လုပ်တဲ့ ကုမ္ပဏီက ၀န်ထမ်းအလွန်နည်းတဲ့ ကုမ္ပဏီဖြစ်တယ်။ အဲဒီမှာ နီက နိုင်ငံခြားသားတွေနဲ့ တိုက်ရိုက်ဆက်ဆံရတဲ့လူဖြစ်လို့ ပိုပြီး ဦးနှောက်ခြောက်ရသူဖြစ်တယ်ဆိုတာ သူမ သိထားပါတယ်။ ဒါပေမယ့် နီဟာ သူ့ရဲ့လစာတော်တော်များများကို နယ်က သူ့မိသားစုဆီ ပို့ပြီး အဆောင်မှာ ဖြစ်သလိုစားနေတဲ့ ငြိမ်းမိုးဝေနဲ့ ဘ၀တူ မိန်းမတစ်ယောက်ပါ။ နီနီနိုင်ရဲ့မျှော်လင့်ချက်နဲ့ ငြိမ်းမိုးဝေရဲ့ မျှော်လင့်ချက်ကတော့ ပြဒါးတစ်လမ်း သံတစ်လမ်းပါ။

"ငါ ရန်ကုန်မှာ မနေချင်ဘူး ငြိမ်းရဲ့၊ အခြေအနေအရ နေနေရတာ၊ အိမ်မှာ အဆင်ပြေရင် ငါ နယ်မှာပဲ ပြန်နေရမှာ။ ငါ့မိသားစုအတွက် အလုပ်လုပ်နေရတာမို့ ငါ့စိတ်တွေကို တင်းထားရတာ၊ ငါက စိုက်ပျိုးရေးဝါသနာပါတာ ငြိမ်းရဲ့။ စိုက်ပျိုးရေးတက္ကသိုလ်တက်ဖို့ဟာ အခြေအနေမပေးခဲ့လို့ မတက်လိုက်ရဘူးလေ" နီ ပြောခဲ့ဖူးတဲ့စကားတွေကို သူမ ပြန်ကြားယောင်မိရင်း စိတ်မကောင်းဖြစ်သွားရတယ်။ နီ့လက်ကလေးတစ်ဖက်ကိုဆုပ်ပြီး -

"စိတ်မကောင်းမဖြစ်ပါနဲ့ နီရယ်၊ နင်ပြောပေးတဲ့အလုပ်က လစာနည်းလို့မဟုတ်ပါဘူး၊ သုံးထောင်ဆိုတဲ့လစာဟာ အရာရှိလစာထက်တောင် များနေပါသေးတယ် နီရဲ့၊ ငါ့အပေါ်ထားတဲ့ နင့်စေတနာကို ငါ ယုံပြီးသားပါ။ ခုချိန်မှာ လစာသုံးထောင်မကလို့ သုံးသောင်းပေးမယ်ဆိုရင်တောင် ငါ့ ဆုံးဖြတ်ချက်ကို မပြင်တော့ပါဘူး နီ"

"နင် လစာများများ လိုချင်တယ်ဆို ငြိမ်း"

"ဟုတ်တယ်၊ ငါ လစာများများ လိုချင်ခဲ့တယ်၊ ရန်ကုန်မြို့မှာ တိုက်ခန်းတစ်ခန်း ပိုင်ဆိုင်ရဖို့ ငမ်းငမ်းတက် ဖြစ်နေခဲ့တယ်၊ ငါ့မှာ နေစရာအိမ်ကောင်းကောင်းတစ်လုံး ရှိနေလျက်နဲ့ နေစရာရှာမရအောင် ဖြစ်နေခဲ့တယ်၊ တကယ်တော့ ငါတို့သာ တကယ်နေချင်တယ်ဆိုရင် မြန်မာပြည်ကြီးထဲမှာတင် နေစရာနေရာတွေ အများကြီးရှိနေတာကို ငါ မေ့နေခဲ့တယ် နီ၊ ရန်ကုန်မြို့ကြီးထဲမှာ နေရာရဖို့ ကြိုးစားနေတာချင်းတူပေမယ့် နင်နဲ့ငါ့ရဲ့ ရည်ရွယ်ချက်က အဖြူနဲ့အမည်းလိုကွာခြားနေတာပါ။ နင်က သူတစ်ပါးဆီမှာ ပေါင်နှံထားရတဲ့ နင်တို့အိမ်နဲ့ခြံကို ပြန်ရွေးဖို့အတွက် မနေချင်တဲ့နေရာမှာနေပြီး အလုပ်လုပ်နေခဲ့ရတာ၊ ငါကတော့ ငါလိုချင်တယ်ဆိုရင် ငါတစ်ဦးတည်းတောင် ပိုင်ဆိုင်ခွင့်ရတဲ့ အိမ်ကြီးတစ်လုံးရှိနေပါလျက်နဲ့ ငါ မရှိလည်း ဖြစ်တဲ့နေရာတစ်ခုကို ဇွတ်တိုးဝင်နေရာယူချင်ခဲ့တာ၊ ရန်ကုန်မှာ တိုက်ခန်းတစ်ခန်းပိုင်ရတော့ရော၊ ဒါနဲ့တင် ငါ့ရဲ့လိုချင်ရမ္မက်တွေက ဆုံးသွားမှာမို့လား၊ မဆုံးပါဘူး နီ၊ ငါ့အတွက်ပြီးရင် ငါ့ရဲ့ သားသမီးတွေအတွက် တစ်နေ့တခြား လိုချင်ရမ္မက်တွေ များများလာရမယ်၊ အဲဒီကလေးတွေ ကျောင်းကောင်းကောင်းမှာ စာသင်ရဖို့၊ နေရာဌာနကောင်းကောင်းမှာ အလုပ်လုပ်ဖို့ ဘယ်မျက်နှာကိုမှ မထောက်ဘဲ တိုက်ကြခိုက်ကြရမယ်၊ နောက်ဆုံးတော့ သူတို့လည်း ငါသွင်းတဲ့ ပုံစံခွက်ထဲမှာဝင်ပြီး ငါလိုလူမျိုးပဲ ဖြစ်သွားလိမ့်မယ် နီ"

"အဲဒီတော့ နင် ဘာလုပ်မလို့လဲဟင် ငြိမ်း"

"ရန်ကုန်မှာ နောက်ထပ်အလုပ်ရဖို့ ငါ မကြိုးစားတော့ဘူး နီ၊ ရန်ကုန်မြို့ရဲ့ တိုးတက်မှုတွေဟာ ငါမရှိတဲ့အတွက် ဆုတ်ယုတ်သွားမှာမှ မဟုတ်ဘဲ၊ ငါတစ်ယောက်ရှိတဲ့အတွက် တိုးတက်လာမယ့်နေရာတွေကို ငါသွားမယ် နီ၊ သူများတွေအတွက်တော့ ငါ့စကားဟာ ဟာသပြက်လုံးတစ်ခု ဖြစ်ချင်ဖြစ်နေမယ်။ ဒါပေမယ့် ငါလိုလူမျိုးတွေ တစ်ယောက်ထက်တစ်ယောက် ပိုများလာလေလေ ငါ့ရဲ့ မျှော်မှန်းချက်တွေ တစ်စထက်တစ်စ အောင်မြင်လာလေလေ ဖြစ်လိမ့်မယ်လို့ ငါ ယုံတယ် နီ၊ ငါ့ကို နင် ရယ်ချင်နေပြီ မဟုတ်လားဟင်"

ပြုံးပြုံးလေးငြိမ်နေတဲ့ နီ့မျက်လုံးတွေက ငြိမ်းမိုးဝေကို သရော်လှောင်ပြောင်နေတာတော့ မဟုတ်ဘူးထင်ရဲ့နော်။

"ဘာဖြစ်လို့ ရယ်ချင်ရမှာလဲ ငြိမ်းရယ်၊ ငါ ၀မ်းသာနေတာ၊ ကျေနပ်နေတာပါ ငြိမ်းရာ၊ ငါ့မှာ အဲဒီမျှော်မှန်းချက်မျိုးတွေ ရှိနေပေမယ့် နင့်လိုအကောင်အထည်ဖော်ဖို့ အခြေအနေမပေးသေးဘူး ငြိမ်းရယ်၊ ငါ့မှာက ပြန်ကြည့်ရမယ့် မိသားစု ရှိနေသေးတယ်။ ငါက သမီးအကြီးဆုံး ဖြစ်နေတယ်လေ"

"ဒီအတွက် ၀မ်းမနည်းပါနဲ့ နီ၊ နင် ဆန္ဒရှိရာ လုပ်ချင်ရာကို အခွင့်အခါမပေးသေးလို့ မလုပ်နိုင်သေးပေမယ့် နင်ဟာ နင့်မိသားစုအတွက် အခိုင်အမာအကျိုးပြုနေတဲ့ မိန်းကလေးတစ်ယောက်ပါ၊ အဲဒီအတွက် နင့်ကိုယ်နင် လိပ်ပြာသန့်စွာ ဂုဏ်ယူနေနိုင်ပါတယ် နီရယ်"

"အဲဒီ အားပေးစကားအတွက် ကျေးဇူးတင်ပါတယ် ငြိမ်း"

နီက သူမရဲ့လက်ဖ၀ါးနှစ်ဖက်ကို တင်းတင်းကျပ်ကျပ် ဆုပ်ကိုင်ပြီးပြုံးနေတယ်။ နီရဲ့နွေးထွေးတဲ့ လက်တွေဟာ သူမရဲ့ရွေးချယ်မှုကို လှိုက်လှိုက်လှဲလှဲ ဂုဏ်ပြုအားပေးတဲ့လက်တွေဆိုတာ ငြိမ်းမိုးဝေ ယုံတယ်။

လောကကြီးရဲ့တစ်နေရာက တစ်နေကုန် လျှပ်စစ်မီးထွန်းထားရတဲ့ ခပ်မှောင်မှောင် အခန်းကျဉ်းလေးတစ်ခုထဲက မိန်းမနှစ်ယောက်ရဲ့ ကိုယ့်ကိုယ်ကို ဂုဏ်ယူကျေနပ်နိုင်မှုတွေကို မြင်တွေ့လိုက်ကြသူတွေ ရှိမနေခဲ့ဘူး။ ဒါပေမယ့် သူတို့နှစ်ယောက် ပျော်နေခဲ့ကြတယ်။

နောင်တစ်ချိန် တစ်နေရာရာမှာ သူမတို့နှစ်ယောက် ပြန်ဆုံတွေ့ပြီး ဒီလိုနွေးထွေးတဲ့ လက်နှစ်ဖက်နဲ့ တစ်ဦးကိုတစ်ဦး နှုတ်ဆက်ခွင့်ရတဲ့အခါ သူမတို့ဘေးမှာ သောင်းသောင်းဖျဖျ လက်ခုပ်တီးပေးနေတဲ့လူတွေ ရှိမနေဘူးလို့ ဘယ်သူငြင်းနိုင်မှာတဲ့လဲ။  ။

မေတ္တာဖြင့် - ယုဒါ

ရွှေအမြုတေ

မေလ၊ ၁၉၉၈