အဖြူရောင်လွင်ပြင်တစ်ခုဆီ

(၁)

လောကကြီးမှာ ကျွန်မမုန်းတဲ့အရာတွေ အများကြီးရှိတယ်။ ကျွန်မက ဆံပင်ရှည် ဖိုးရိုးဖားရား နဲ့ယောက်ျား တွေကိုမုန်းတယ်။ လမ်းဘေးရေအိုးစင်က သောက်ရေခွက်အပေါ် သစ္စာမဲ့ကြသူတွေကို မုန်းတယ်။ ရုပ်ရှင်ရုံတစ်ရုံရဲ့ အလင်းရောင်မဲ့မှုအပေါ် အခွင့်အရေးယူတတ်ကြသူတွေကိုမုန်းတယ်။ ဆိပ်ဖလူးပန်းနံ့ကိုမုန်းတယ်။ စာအုပ်တစ်အုပ်ရဲ့တန်ဖိုးကို ငွေကြေးနဲ့ပိုင်းဖြတ်ပြီး အလျော်အစားပေး တတ်တဲ့သူတွေကိုမုန်းတယ်။ ဒါတွေတင်မဟုတ်ပါဘူး။ ကျွန်မမုန်းတဲ့ အသေးအဖွဲအရာလေးတွေ အများကြီးရှိနေပါသေးတယ်။ အဲဒီမှာ ကျွန်မ အမုန်းတကာ့အမုန်းဆုံးအရာကတော့ သော့ခလောက်တွေ နဲ့ သော့တံတွေပဲဖြစ်တယ်။ ။

 (၂)

ကျွန်မအကြောင်းက ဝတ္ထုတစ်ပုဒ်ရေးရလောက်အောင် ခမ်းနားလိမ့်မယ်တော့မထင်ဘူး။ မြန်မာစာအဓိကနဲ့ မကွေးတက္ကသိုလ်ကဘွဲ့ရတယ်။ အသက်၂၄နှစ်မှာအိမ်ထောင်ကျတယ်။ အသက်၂၆နှစ်မှာ တစ်ခုလပ်ဖြစ် တယ်။ အသက်၂၇နှစ်မှာ မန္တလေးကနေ ဖားကန့်ကိုရောက်လာတယ်။ ကျွန်မအစ်ကိုက ဖားကန့်မှာ အခြေခိုင်နေပြီ။ အစ်ကို့မိန်းမကဆရာဝန်မ။ ကျွန်မအစ်ကိုကဆယ်တန်းကျ။ ကျန်တဲ့အစ်ကို့အရည် အချင်းတွေကို ကျွန်မပြောပြဖို့လိုမယ်မထင်ဘူး။ ရန်ကုန်ဆေးတက္ကသိုလ်ကပေးလိုက်တဲ့ ဆရာဝန်ဘွဲ့ရ အမျိုးသမီးတစ်ယောက်ကို အရယူနိုင်ခဲ့တဲ့ မကွေးမြို့သားတစ်ယောက်ရဲ့ အရည်အချင်း ဟာ ပေါ့သေးသေးမဟုတ်ဘူး ဆိုတာတော့သိမှာပါ။

ဆရာဝန်မရဲ့ ခင်ပွန်းဖြစ်တဲ့ ကျွန်မအစ်ကို အလုပ်အကိုင်က ကျောက်အရောင်းအဝယ်ပါ။ အစ်ကိုနဲ့ကျွန်မ  ကွဲသွားကြတာ ကျွန်မဆယ်တန်းစ,တက်တဲ့နှစ်ကတည်းကဆိုပါတော့။ အစ်ကိုက ခပ်ဆိုးဆိုးလူငယ် တစ်ယောက်ဘဝကနေ ကျောက်ကုန်သည်တစ်ယောက်ဖြစ်ခဲ့သူပေါ့။ ခပ်ဆိုးဆိုးဆိုတဲ့ဝေါဟာရကို သုံးလိုက်ရပေမယ့် အစ်ကိုဟာ ကျွန်မတို့မိသားစုကို ဒုက္ခပေးခဲ့သူတစ်ယောက်တော့ မဟုတ်ပါဘူး။ ဆယ်တန်း သုံးနှစ်ဆက်တိုက်ကျ၊ စီးကရက်ကို လက်ကြားကမချတမ်းသောက်၊ ညဉ့်နက်သန်းခေါင်မှ အိမ်ကိုပြန်လာ၊ သွားချင်ရာလျှောက်သွားစတဲ့ စာမွေးပွဲကျလို့ စိတ်လေနေတဲ့ လူငယ်တစ်ယောက်ရဲ့ သာမန်ဆိုးသွမ်းမှုမျိုးနဲ့ ဆိုးတေနေခဲ့သူပေါ့။ နောက် သူ ပညာရေးနဲ့ အကျိုးမပေးဘူး၊ စီးပွားပဲရှာတော့မယ်ဆိုပြီး အိမ်ကထွက်သွားလိုက်တာ ကျွန်မအိမ်ထောင်ကျပြီးတဲ့အချိန်ရောက်မှ အစ်ကို အိမ်ကိုပြန်ရောက်လာခဲ့တာ။ အစ်ကိုက ကျွန်မကို သိပ်ချစ်ခဲ့တာပါ။ အိမ်က စီးပွားရေးမပြေလည်လို့ ကျွန်မအဖေပေးစားတဲ့ ယောက်ျားတစ်ယောက်ကို ခေါင်းညိတ်လက်ထပ်လိုက်ရတယ်ဆိုတာသိတော့ အစ်ကိုက တက်တခေါက်ခေါက် နဲ့ ရင်ထုမနာဖြစ်နေခဲ့တယ်။ အစ်ကိုက မောင်နှမသုံးယောက်ထဲမှာ အငယ်ဆုံးဖြစ်တဲ့ ကျွန်မကို ပညာထူးချွန်တဲ့ ဌာနဆိုင်ရာ အရာရှိမကြီးတစ်ယောက် ဖြစ်စေချင်ခဲ့တာ။

ဒါပေမယ့် အစ်ကိုမရှိတဲ့ သုံးလေးနှစ်ကာလအတွင်းမှာ အိမ်ရဲ့စီးပွားရေးအခြေအနေက မထင်မှတ်ဘဲ ယုတ်လျော့ကျဆင်းသွားခဲ့တာဆိုတော့ ဘယ်သူ့ကိုမှ အပြစ်တင်နေဖို့ အကြောင်းမရှိတော့ဘူးလေ။ အိမ်ထောင်အစောဆုံးကျသွားတဲ့ အစ်မကလည်း ကလေးနှစ်ယောက်ရတဲ့အထိ ကျွန်မတို့မိသားစုနဲ့ မခွဲမခွာရှိနေလေတော့ ကျွန်မတို့အိမ်ရဲ့စားအိုးက သေးလှတယ်မဟုတ်ဘူးလေ။ အစ်မအမျိုးသားကလည်း ရိုးသားအေးဆေးတဲ့ သာမန်ကျောင်းဆရာတစ်ယောက်ဆိုတော့ သူလည်း ဘာတတ်နိုင်မှာတဲ့လဲ။

လောကကြီးဟာ ရယ်စရာကောင်းတာနော်လို့ စကားအဖြစ်ကျွန်မထည့်ပြောတတ်ခဲ့တယ်။ တကယ်လောကကြီးဟာ ကျွန်မအတွက် ရယ်စရာကောင်းခဲ့တာမဟုတ်ပါဘူး။ ငိုချင်စရာ သာကောင်းနေခဲ့တာပါ။ ဒါပေမယ့် ကျွန်မ မငိုတတ်ခဲ့ဘူး။ ကျွန်မမျှော်လင့်ခဲ့တာတွေ ဘာတစ်ခုမှဖြစ်မလာ ခဲ့တော့ ၀မ်းနည်းစရာတစ်ခုကြုံလာရင် ကျွန်မ မဲ့ပြုံး,ပြုံးတဲ့အလေ့အကျင့်တစ်ခု ရလာခဲ့တယ်။ ကျွန်မ စိတ်ထဲမှာ အကြည်လင်ဆုံးကာလတွေနဲ့ အပျော်ရွှင်ဆုံးဘဝဟာ ကျွန်မတက္ကသိုလ်ပထမနှစ်၊ ဒုတိယနှစ်တက်ခဲ့တဲ့အချိန်တွေပဲ။ အဲဒီအချိန်တွေမှာ ကျွန်မလုပ်ချင်တာတွေ လုပ်ခွင့်ရခဲ့တယ်။ ကျွန်မရဲ့ အနာဂတ်တွေ လှပနေခဲ့တယ်။ ပစ္စုပ္ပန်ဟာလည်း အေးငြိမ်းနေခဲ့တယ်။

ကျွန်မဒုတိယနှစ်စာမေးပွဲကို ဂုဏ်ထူးလေးခုနဲ့ အောင်ပြီးတဲ့အချိန်မှာ ကျွန်မမျှော်လင့်တဲ့အနာဂတ်ဟာ အစိတ်စိတ်အမြွှာမြွှာ စတင်ပြိုကွဲသွားခဲ့ရတယ်။ ကျွန်မကို ဂုဏ်ထူးတန်း တက်ခွင့်မပေးခဲ့ဘူး။ ရိုးရိုးတန်း တတိယနှစ်ကိုသာ တက်ခွင့်ရခဲ့တယ်။ စီးပွားရေးအဆင်မပြေလို့ စိတ်ဓာတ်ကျနေတဲ့ ဖေဖေ့စကားကို နားမထောင်ရင် ကျွန်မ သမီးမိုက်ဖြစ်သွားမှာပေါ့။ ဒါနဲ့ပဲ နောက်ဆုံးနှစ်မှ အထူးအောင်,အောင်ကြိုးစားပြီး မဟာဝိဇ္ဇာဆက်တက်မယ်လို့ ကျွန်မဆုံးဖြတ်လိုက်တယ်။ ကျွန်မက တက္ကသိုလ်ဆရာမ လုပ်ချင်တဲ့သူ၊ စာရေးဆရာမ လုပ်ချင်တဲ့လူဖြစ်နေတာကိုး။ ကျွန်မ တတိယနှစ်မှာ ၀တ္ထုတိုလေးတွေ စ,ရေးဖြစ်တယ်။ ကျွန်မတို့ကျောင်းကထုတ်တဲ့ နှစ်လည်မဂ္ဂဇင်းထဲမှာ ကျွန်မရေးတဲ့ ၀တ္ထုတိုလေးတစ်ပုဒ် ပုံနှိပ်ဖော်ပြခြင်း ခံရတယ်။

အဲဒီဝတ္ထုတိုလေးတစ်ပုဒ်ကြောင့် ကျွန်မမျှော်လင့်ထားတဲ့ အနာဂတ်တစ်ခုလုံး ပြိုလဲပျက်စီးသွားရလိမ့်မယ် ဆိုတာသိရင် ကျွန်မ အဲဒီဝတ္ထုလေးကို ရေးဖြစ်ခဲ့မှာမဟုတ်ပါဘူး။ ဒါပေမယ့် ကံဆိုးချင်တော့ အဲဒီ ၀တ္ထုတိုလေးဟာ ကျွန်မရဲ့ ပထမဦးဆုံးနဲ့နောက်ဆုံး ပုံနှိပ်ဖော်ပြခြင်းခံခဲ့ရတဲ့ ကျွန်မရဲ့ တစ်ပုဒ်တည်းသော ၀တ္ထု ဖြစ်သွားခဲ့တယ်လေ။ ။

 

 (၃)

ကျွန်မရဲ့ဝတ္ထုတိုလေးဟာ အချင်းချင်းလက်တို့ဝေဖန် ဆွေးနွေးရလောက်အောင် မကောင်းခဲ့ပါဘူး။ ဒါပေမယ့် အဲဒီဝတ္ထုလေးဟာ ကျွန်မရဲ့ စိတ်ဝိဥာဉ်တစ်ခုဖြစ်ခဲ့တယ်။ ကျွန်မရဲ့ကလောင်နာမည်နဲ့ ပထမဆုံးပုံနှိပ်ခြင်းခံရတဲ့ ၀တ္ထုလေးကို ထပ်ခါတလဲလဲ ပြန်ဖတ်မိရင်း ကျွန်မ ကြည်နူးမဆုံးဖြစ်နေ ခဲ့တယ်။ ကျောင်းက သူငယ်ချင်းတွေ လက်ဖက်ရည်တိုက်ခိုင်းတဲ့အခါ ကျွန်မ ကိုယ့်ကိုကိုယ် ဂုဏ်ယူကျေနပ်စွာနဲ့ မညည်းမညူ ကြည်ကြည်ဖြူဖြူ တိုက်ခဲ့တယ်။ ယောက်ျားလေးများသာ တက်ရောက် ခွင့်ရှိတဲ့ တက္ကသိုလ်တစ်ခုမှာ ရောက်ရှိနေတဲ့ ကျွန်မရဲ့ အချစ်ဆုံး သူငယ်ချင်းတစ်ယောက်ကို ကျွန်မ ၀တ္ထုတိုလေးပါတဲ့ မဂ္ဂဇင်းစာအုပ်ပို့ပေးလိုက်တယ်။ ပြီးတော့ အိမ်ကလူတွေဖတ်ဖို့ စာအုပ်တစ်အုပ် ထပ်ဝယ်လိုက်တယ်။ ကျွန်မ၀တ္ထုပါတယ်ဆိုပြီး တစ်အိမ်လုံးကို ကြွားလို့မဆုံးဖြစ်နေရတယ်။

ကျွန်မ၀တ္ထုတိုလေးကို ဖေဖေဖတ်ကြည့်တယ်။ ပြီးတော့ မေမေရယ်၊ မမရယ်၊ ကျွန်မခဲအိုရယ် အားလုံး ဖတ်ကြည့်ကြတယ်။ ဖေဖေနဲ့မေမေက ကျွန်မကို ၀တ္ထုနဲ့ပတ်သက်တဲ့ တုံ့ပြန်ချက်တစ်စုံတစ်ရာ မပေးခဲ့ဘူး။ တတိယနှစ် စာမေးပွဲဖြေခါနီး အချိန်လောက်မှာ အဲဒီဝတ္ထုနဲ့ပတ်သက်တဲ့ တုံ့ပြန်ချက်တစ်ခုကို မမဆီက ကျွန်မရခဲ့တာ။

 

'မိဝါ နင့်ကို ဖေဖေတို့က ယောက်ျားပေးစားတော့မလို့'တဲ့။ ကျွန်မ သိပ်ကိုအံ့သြသွားရတယ်။ ဖေဖေက ကျွန်မကို ဘာဖြစ်လို့ယောက်ျားပေးစားမှာတဲ့လဲ။ ကျွန်မမှာ ရည်းစားတစ်ယောက်တလေမှ မရှိဘဲ၊ ကျွန်မကို လာရောက်စေ့စပ်တောင်းရမ်းသူဆိုတာလည်း မရှိဘဲ ဘယ်က ယောက်ျားကို ကျွန်မ ယူရမှာပါလိမ့်။

'အိုး ငါ့မှာ ရည်းစားမှမရှိဘဲ'

'အေးလေ မရှိလို့၊ ရှိသွားမှာစိုးလို့ ပေးစားမှာတဲ့'

'ဘယ်သူ… ဘယ်သူနဲ့လဲဟင်'

'နာမည်တော့ ငါလည်း တိတိကျကျမသိဘူး။ ဒါပေမယ့် စာရေးဆရာတစ်ယောက်မဟုတ် တာတော့ သေချာတယ်'

'ဘာ…'

ကျွန်မရဲ့အာမေဍိတ်သံဟာ မမကို ဆတ်ခနဲတုန်သွားစေတဲ့အထိ ကျယ်လောင်သွားတယ်။ ကျွန်မရဲ့ အိမ်ထောင်ဖက်ဟာ ကျွန်မနဲ့စိတ်တူကိုယ်တူဖြစ်နိုင်တဲ့ စာရေးဆရာတစ်ယောက်ပဲဖြစ်ရမယ်။ အဲဒါ ကျွန်မ ၀တ္ထုတိုလေးထဲက စာကြောင်းလေးတစ်ကြောင်းပါ။ ကျွန်မရဲ့အိပ်မက်တွေထဲမှာ စာရေးဆရာတစ်ယောက် ရှိနေခဲ့တာ အမှန်ပဲ။ ဒါပေမယ့် ကျွန်မရဲ့လက်တွေ့ဘ၀ထဲမှာ စာရေးဆရာဆိုသူတွေ ရှိမနေခဲ့ ဘူး။ နောင်လည်း ရှိလိမ့်မယ်လို့ ကျွန်မမထင်ဘူး။ ကျောင်းမှာ ကျွန်မကိုမေတ္တာကမ်းလှမ်းဖူးတဲ့လူတွေထဲမှာ စာရေးဆရာယောင်ယောင်၊ ကဗျာ ဆရာယောင်ယောင် ယောက်ျားမျိုးတစ်ယောက်မှမပါခဲ့ဘူး။ ကျွန်မကို ချစ်ခွင့်ပန်ဖူးကြတဲ့ လူတွေဟာ မန်ကျည်းပွဲစား၊ ကြည်သွန်ပွဲစားတွေ၊ အစိုးရ အရာရှိကြီးတွေရဲ့သား ရှိုးခပ်များများကောင်ကလေးတွေ၊ ပြီးတော့ အလုပ်မရလို့ကျောင်းတက်ဖြစ်သွားတာပါလို့ ဆိုတဲ့ အလုပ်တစ်ခုရဖို့ စိတ်ပျက် လက်ပျက်စောင့်စားနေတဲ့ ကောင်ကလေးတွေပဲ များပါတယ်။ ကျွန်မသူတို့ကို ဘယ်လိုမှ ရင်ခုန်ကြည့်လို့ မရတဲ့အတွက် သူတို့အားလုံးဟာ ကျွန်မရဲ့ မိတ်ဆွေတွေပဲဖြစ်နေခဲ့တယ်။

 

ချစ်သူအဖြစ်နေရာပေးမယ်ဆိုရင်ဖြစ်နိုင်လောက်တဲ့ ကျွန်မရဲ့ သူငယ်ချင်းတစ်ယောက်ကတော့ လူတော်တော်များများ ကြိုက်ကြပေမယ့် ကျွန်မမကြိုက်တဲ့ဘ၀တစ်ခုထဲမှာ ကျွန်မနဲ့ စည်းခြားသွားခဲ့ပါပြီ။ သူ့ရဲ့ရွေးချယ်မှုနဲ့ လုပ်ရပ်ဟာ ဘယ်တော့မှ မမှားနိုင်တဲ့ မှန်ကန်ခြင်းလို့ ကျွန်မလက်မခံနိုင်ပေမယ့် သူ့ရဲ့ဘေးမှာမလိုက်ပါနိုင်တာ ကျွန်မရဲ့သေချာခြင်းဖြစ်နေတာမို့ သူနဲ့ကျွန်မဟာ ရာသက်ပန် သူငယ်ချင်းတွေသာ ဖြစ်သွားဖို့ရှိတယ်။ 

'အစွန်းသိပ်ရောက်လွန်းရင်လည်း မကောင်းဘူးပေါ့' ဆိုတဲ့စကားမျိုးနဲ့ မိတ်ဆွေတချို့ရဲ့ ဝေဖန်မှုကို ခံရ တတ်တဲ့ ကျွန်မဟာ ကိုယ့်ရဲ့ခံစားချက်၊ ခံယူချက်၊ မျှော်လင့်ချက်တွေနဲ့ လုံးဝဆန့်ကျင်ဘက်ဖြစ်နေ တဲ့ ယောက်ျားတစ်ယောက်ကို မဖြစ်မနေယူရမယ်မှန်းသိခဲ့ရင် ကျွန်မချစ်တဲ့သူရဲ့လက်ကိုတွဲပြီး ကျွန်မမနေချင်တဲ့ဘ၀ထဲမှာ နေနိုင်ခဲ့မယ်လို့ထင်တယ်။ ဒါပေမယ့် အဲဒီအချိန်မှာ ကျွန်မ ကျောင်းပြီးသွား ခဲ့ပြီလေ။

(၄)

အဲဒီနေ့ကလေးတစ်နေ့ကတော့ ကျွန်မဘ၀မှာ မမေ့နိုင်တဲ့နေ့ကလေးတစ်နေ့အဖြစ် ထာဝရရှိနေဦးမှာပါ။ ကျွန်မ,အိမ်ထောင်မပြုခင် တစ်လလောက်အလို နွေကာလရဲ့ ညနေခင်းတစ်ခုမှာပေါ့။ ကျွန်မတို့ရပ်ကွက် စာအုပ်ဆိုင်လေးမှာ ကျွန်မစာအုပ်သွားငှားပြီးပြန်လာတဲ့အချိန်။ သူ (သူဆိုတာ ကျွန်မကိုစွဲစွဲလမ်းလမ်း ချစ်ခင်နေတဲ့ ကျွန်မရဲ့ တစ်ဦးတည်းသော ယောက်ျားလေးသူငယ်ချင်းပါ)က ကျွန်မနဲ့ ဆန့်ကျင်ဘက် လမ်းတစ်ခုကလာနေတာ။ ကျွန်မတို့နှစ်ယောက်ဆုံတဲ့အချိန်မှာ သူက ကျွန်မစက်ဘီးကယ်ရီယာခုံ ကိုနောက်ပြန်လှမ်းဆွဲရင်း မိဝါလို့ခေါ်လိုက်တယ်။ ကျွန်မစက်ဘီး ယမ်းခါသွားလို့ ကျွန်မ လည်းကြောက်ကြောက်လန့်လန့်နဲ့ စက်ဘီးပေါ်ကဆင်းလိုက်မိတယ်။ သူကတော့ စက်ဘီးပေါ်ကမဆင်း ဘဲ မြေပြင်ကို ခြေလှမ်းထောက်ပြီး ရပ်နေတယ်။ သူပြန်ရောက်နေတယ်ဆိုတာ ကျွန်မသိမထားတော့ အရမ်းအံ့သြသွားရတယ်။ 'နင် ဘယ်တုန်းကရောက်လဲ' လို့ ကျွန်မမေးလိုက်မယ့်ဆဲဆဲမှာပဲ 'နင် လက်ထပ်တော့မလို့ဆို' ဆိုတဲ့ မေးခွန်းကို သူကစ,မေးခဲ့တာ။ ကျွန်မ ဘာပြန်ဖြေရမှန်း မသိအောင် ကြောင်စီစီဖြစ်နေခဲ့တယ်။ 'ဟုတ်တယ်' ဆိုတဲ့ စကားဟာ သူမေးတဲ့မေးခွန်းရဲ့ အဖြေမှန်ပဲ။ ဒါပေမယ့် ကျွန်မ မဖြေချင်ခဲ့ဘူး။

ကျွန်မရဲ့ရင်ခုန်သံတွေယောက်ယက်ခတ်ဆူညံနေတယ်။ ခုချိန်မှာ သူလိုချင်တဲ့အဖြေပေးလိုက် ရင်ကောင်းမလားလို့ စဉ်းစားနေမိတယ်။ ကျွန်မအသေအလဲကြောက်လန့်နေရတဲ့ ဖေဖေက သူနဲ့ကျွန်မကို သဘောတူနိုင်ပါ့မလား။ သူနဲ့ကျွန်မချစ်သူတွေဖြစ်ခဲ့ပြီးသားဆိုရင် ဖေဖေသဘောတူလိမ့်မယ်လို့ ခုချိန်ကျမှ ကျွန်မဘာလို့တွေးဖြစ်ရတာတဲ့လဲ။ ကျွန်မ သူ့ကို ချစ်နေခဲ့မိတာကိုး။ ကျွန်မ သူ့နောက်လိုက် သွားရင် ဖြစ်နိုင်သေးတာပဲလို့ မိုက်မိုက်မဲမဲတွေးမိရင်း ရယ်စရာကောင်းလောက်အောင် တိုကပ်နေတဲ့ သူ့ဆံပင် ထိုးထိုးထောင်ထောင်လေးတွေကိုကြည့်နေဆဲမှာ -

'ငါကတော့ လေးနှစ်လုံးလုံး နင့်ကို မျှော်လင့်နေလိုက်ရတာ၊ နင်ကတော့ ဆောရီးပဲ မိဝါ၊ ငါ မှားသွားတယ်ဟာ၊ ဒီအချိန်မှာ ဒါတွေပြောနေဖို့မှ မလိုတော့တာ၊ ငါ ကျေနပ်ပါတယ်ဟာ၊ ဘာပဲဖြစ်ဖြစ် နင် ဆုံးဖြတ်တာကို ငါ ကျေနပ်ရမှာပေါ့'

အသံအတက်အကျ အပြောင်းအလဲမြန်ဆန်လွန်းလှတဲ့ သူ့စကားသံတွေကြားမှာ ကျွန်မ ခေတ္တသေဆုံး သွားရတယ်။ 'သွားတော့လေ မိဝါ၊ မှောင်နေလိမ့်မယ်'  သူကျွန်မကို ဘယ်လောက်ကြာအောင် ကြည့်နေခဲ့ တယ်မသိဘူး။ ကျွန်မရဲ့ စိတ်ဝိဥာဉ်တွေ ဘယ်ကမ္ဘာထိ ပြေးထွက်သွားရတယ်ဆိုတာလည်း မသိဘူး။ သူက ကျွန်မ စက်ဘီးဘဲလ်ကိုတီးပြီး နှုတ်ဆက်တော့မှ 'အိမ်ကို လာလည်ဦးလေ' ဆိုတဲ့ စကားတစ်ခွန်း ကို ပြောမိပြီး ကျွန်မ သူ့ကို ကျောခိုင်းလိုက်မိတာ။

ခါတိုင်းဆိုရင် ကျွန်မစာအုပ်ဆိုင်သွားတိုင်း သူနဲ့ဆုံရင် သူ့စက်ဘီးနောက်က ကျွန်မထိုင်လိုက်နေကျ။ သူကအပြန် ကျွန်မကအသွားဖြစ်နေရင်တော့ 'ငါ့ကိုပြန်လိုက်ပို့' ဆိုပြီး ခိုင်းနေကျလေ။ သူနဲ့ကျွန်မ ဘယ်တုန်းကမှ ဆန့်ကျင်ဘက်မသွားခဲ့ကြဖူးဘူး။ အင်းလေ… အရင်က ကျွန်မဘေးမှာ စက်ဘီးတစ်စီးမှ ရှိမနေခဲ့တာပဲ။ ကိုယ်တိုင်က စက်ဘီးစီးနေလျက် သူများ စက်ဘီးကယ်ရီယာပေါ်မှာ ထိုင်လိုက်ချင်တဲ့ ကိစ္စဟာ သဘာဝမကျတဲ့ ကိစ္စတစ်ခုပဲနော်။ ကျွန်မတို့မြို့ကနေ သူ အလုပ်တာဝန်ကျတဲ့မြို့ကို ထွက်ခွာ သွားပြီး ၃၄ ရက်မြောက်နေ့မှာ ကျွန်မ လက်ထပ်ဖြစ်ခဲ့တယ်။

(၅)

အဲဒီနောက်ပိုင်းကစလို့ သော့ခလောက်တွေနဲ့ သော့တံတွေ ကျွန်မဘ၀ထဲကို စတင်ရောက်ရှိလာတော့တာ ပါပဲ။ ကျွန်မလည်း သော့ဆိုရင် စက်ဘီးသော့ကိုတောင် အဖွင့်အပိတ်လုပ်တတ်ခဲ့သူမဟုတ်ဘူး။ အိမ်မှာ လည်း ကျွန်မပိုင် သေတ္တာနဲ့ ဗီရိုနှစ်မျိုးစလုံးမှာ သော့မရှိဘူး။ သော့ခတ်ဖို့ကိစ္စက ကျွန်မဦးနှောက်ထဲ ဘယ်လိုမှကို ရောက်မလာခဲ့တာ။ ကျွန်မ အစ်မကတော့ ကျွန်မငယ်ငယ်ကတည်းက သူ့ရဲ့ စိမ်းပြာရောင် သံသေတ္တာကြီးကို တစ်ချိန်လုံး သော့ခတ်ထားတတ်တာ။ သူ့မှာက ဖေဖေ၊မေမေတို့မသိအောင် ခိုးထားတဲ့ ရည်းစားတစ်ယောက် ရှိနေခဲ့တာကိုး။ သူ့ရဲ့ ရည်းစားစာတွေ လုံခြုံစိတ်ချနိုင်ရေးအတွက် သော့ခလောက် တစ်လုံးက မရှိမဖြစ်လိုအပ်နေမှကိုး။ ကျွန်မအတွက်တော့ ဘာသော့ခလောက်မှမလိုအပ်ခဲ့ဘူး။ လိုလည်း မလိုချင်ဘူး။ အ၀တ်တစ်စုံဝတ်ရဖို့ ခတ်ထားတဲ့သော့ကို ပြန်ဖွင့်ယူရတဲ့အလုပ်ကို ကျွန်မဘယ်လိုမှ စိတ် မရှည်နိုင်ဘူးလေ။

အဲဒီလိုမိန်းမတစ်ယောက်ဟာ သော့တွေကို အထူးတလည် ဂရုစိုက်လွန်းတဲ့ ယောက်ျားတစ်ယောက်ရဲ့ ဇနီးမယား ဖြစ်လာခဲ့ရတာတော့ ကျွန်မရဲ့ ကံဆိုးမှုတစ်ခုပဲ ဖြစ်ပါလိမ့်မယ်။ သေတ္တာပေါင်းများစွာ၊ ဗီရို အံဆွဲပေါင်းများစွာအပြင် အိမ်ခန်းတံခါးတွေကိုပါ သော့အထပ်ထပ်ခတ်ရတဲ့အလုပ်ကို သူက သင်ပေးတော့ ကျွန်မအတော်စိတ်ပျက်လက်ပျက်ဖြစ်သွားရတယ်။ 'ကျွန်မ မခတ်ချင်ဘူး၊ ရှင့်ဘာသာရှင်ခတ်' လို့ ပြောဖြစ်တော့မလိုဖြစ်ပြီးမှ ကျွန်မကိုကျွန်မ တားဆီးလိုက်နိုင်ခဲ့တယ်။ ဘာပဲဖြစ်ဖြစ် ကျွန်မဟာ သူ့ရဲ့ တရားဝင် ဇနီးသည်တစ်ယောက်ဖြစ်လာခဲ့ပြီပဲ မဟုတ်လား။

ဒီလိုနဲ့ပဲ ကျွန်မဟာ မုန်းတီးလှတဲ့ သော့တွေနဲ့ ရင်းနှီးသွားဖို့ ကျွန်မကြိုးစားခဲ့တယ်။ ခက်တာက ကျွန်မဟာ ဘယ်တုန်းကမှ သော့ကိုင်ဖူးသူမဟုတ်တဲ့အတွက် ပစ္စည်းအထုတ်အသွင်း၊ ငွေအထုတ်အသွင်းလုပ်တိုင်း သူနဲ့ကျွန်မ ပြဿနာတက်ရတော့တာပဲ။ တချို့သေတ္တာနံပါတ်တွေကို ကျွန်မ မမှတ်မိဘူးလေ။ ထစ်ခနဲဆို စိတ်တိုတတ်တဲ့သူက ကျွန်မကို ဒီလောက်တောင် တုံးရ,အရသလားဆိုတဲ့ အကြည့်မျိုးနဲ့ကြည့်လာ တယ်။ နောက်တော့ ပါးစပ်ကပါ ထုတ်ဖော်ပြောလာတယ်။ လျှို့ဝှက်နံပါတ်တွေနဲ့ဖွင့်ရတဲ့ သေတ္တာမျိုးဆိုရင် ကျွန်မ ကိုင်မကြည့်ချင်လောက်အောင်ကို မုန်းလာတယ်။ အဲဒီတော့ သူက ကျွန်မကို အပြစ်လုပ်လာ တာပေါ့။ သူ့ရဲ့ မိန်းမတစ်ယောက်လုပ်နေပြီး သူ့စီးပွားရေးကို စိတ်ဝင်စားမှုမရှိရကောင်းလားရယ် လို့ ဒေါသူပုန်ထတယ်။

သူကဆိုလာတယ်။ မယားလုပ်သူဟာ လင့်ရဲ့စီးပွားရေးကို အမြဲစိတ်ပါဝင်စားနေရမယ်တဲ့။ ကျွန်မရဲ့စိတ်တွေကိုပါ သူက သော့ခတ်ဖို့ ကြိုးစားလာတယ်။ ကျွန်မဟာ အိမ်ထောင်ပြုပြီးတဲ့နောက် လင်ရှိမယားတစ်ယောက်  စောင့်ထိန်းရမယ့်ကျင့်ဝတ်တွေကို လိုက်နာခဲ့သားပဲ။ ချွင်းချက်အားဖြင့် သူ့ရဲ့ စီးပွားရေးလုပ်ငန်းကိုတော့ ကျွန်မစိတ်မ၀င်စားခဲ့ဘူးပေါ့။ ဒါပေမယ့် ကျွန်မ ထိန်းသိမ်းပေးခဲ့သားပဲလေ။ အကြံဥာဏ်မပေးနိုင်တာတော့ စီးပွားရေးသမားလုပ်ဖို့ အိပ်မက်တောင် မမက်ဖူးခဲ့တဲ့ ကျွန်မရဲ့ ညံ့ဖျင်းအားနည်းမှုပေါ့။

ကျွန်မရဲ့မြတ်နိုးခြင်းတွေထဲမှာ ငွေစက္ကူမပါဘူး။ အံ့ဘွယ်ဘနန်းဖြစ်ရလောက်တဲ့ တိုက်တာအဆောက် အအုံတွေ မပါဘူး။ ရင်သပ်ရှုမောငေးရလောက်အောင် ဆန်းသစ်လှပတဲ့ ရတနာစိန်ကျောက်တွေ မပါဘူး။ တစ်မျိုးပြီးတစ်မျိုးမရိုးနိုင်အောင် ပေါ်နေတဲ့ ဒီဇိုင်းလှလှအ၀တ်အထည်တွေ မပါဘူး။ လောကကြီးမှာ ရှိနေတဲ့ မိန်းမတိုင်း မိန်းမတိုင်း မြတ်နိုးမက်မောလေ့ရှိတဲ့ အရာတွေအပေါ် လိုလားတောင့်တမှုမရှိတဲ့ မိန်းမတစ်ယောက်ကိုပြပါဆိုရင် မကွေးမြို့က ရွှေဝါခိုင်ဆိုတဲ့ မိန်းမတစ်ယောက်ကို လက်ညှိုးထိုးပြနိုင်ပါ တယ်။

ကျွန်မ အမြတ်နိုးဆုံး သက်မဲ့ပစ္စည်းတွေဟာ စာအုပ်တွေပဲဖြစ်တယ်။ အောင်မြင်တဲ့ စီးပွားရေးသမား တစ်ယောက်ရဲ့ ဇနီးသည်တစ်ယောက်ဖြစ်နေလျက် ကျွန်မဟာ စာအုပ်စင်မှာ တစ်နေ့ထက်တစ်နေ့ စာအုပ်တွေတိုးပွားလာဖို့လောက်ကိုသာ စိတ်ဝင်စားနေခဲ့တယ်။ အခန်းတံခါးပိန်ပြီး စာအုပ်တွေကိုသာ တစ်ယောက်တည်း သဲကြီးမဲကြီး ဖတ်နေခဲ့တယ်။ ဘယ်မဂ္ဂဇင်းတိုက်ကိုမှ မပို့ဖြစ်တဲ့ ၀တ္ထုတွေကို စိတ်ကူးတည့်သလို ထိုင်ရေးနေခဲ့တယ်။ ကျွန်မရေးတဲ့ ၀တ္ထုတွေဟာ တစ်ပုဒ်မှ ပြီးဆုံးသွားတယ်ဆိုတာ မရှိဘူး။

စာရေးဆရာမတစ်ယောက်ဖြစ်ဖို့ သိတတ်တဲ့အရွယ်လောက်ကတည်းက စိတ်ကူးယဉ်ခဲ့ဖူးတဲ့ ကျွန်မဟာ 'ဘယ်လိုလဲ မင်းဝတ္ထုတွေကို ကိုယ်ထုတ်ပေးရတော့မလား' ဆိုတဲ့ သူ့ရဲ့ ခနဲ့တဲ့တဲ့ စကားကို ကြားတိုင်း ဘာဖြစ်လို့ နာကျင်ခဲ့တယ်မသိဘူး။ 'ရှင့်မှာ ပိုက်ဆံရှိတိုင်း ကျွန်မစာရေးဆရာမ ဖြစ်နိုင်လိမ့်မယ်ထင်လား' ဆိုတဲ့ စကားကို စိတ်ထဲကသာ ပြန်ပြောနေမိခဲ့တယ်။ သူနဲ့ကျွန်မ ဆယ်မိနစ်ပြည့်အောင် စကားများ ရန်ဖြစ်ဖူးတဲ့အချိန် မရှိပါဘူး။ စကားများရန်ဖြစ်တာမရှိသလို အေးအေးဆေးဆေး စကားပြောနေဖြစ်တယ် လို့လည်း မရှိပြန်ဘူးလေ။ သူက မိုးလင်းမိုးချုပ် အလုပ်,လုပ်၊ ည ၇ နာရီ ၈ နာရီလောက်မှပြန်လာ၊ အရက်သောက်၊ ထမင်းစား၊ အိပ်ရာဝင် ဒါပဲလေ။ များသောအားဖြင့်တော့ သူ အိမ်ပြန်လာတဲ့အချိန်တွေဟာ ည ၁၁ နာရီနောက်ပိုင်းပဲ ဖြစ်နေတတ်တယ်။

သူ ဘယ်အချိန်ပြန်လာလာ ကျွန်မ ထူးထူးခြားခြား ခံစားချက်ဖြစ်မလာခဲ့တဲ့အတွက် ဘာဖြစ်လို့ ညဉ့်နက်မှပြန်လာတာလဲဆိုတဲ့ မေးခွန်းကို ကျွန်မ မမေးဖြစ်ခဲ့ဘူး။ အိမ်ပြန်မအိပ်ဘူးလို့မပြောဘဲ သူ ပြန်မရောက်လာတဲ့နေ့မျိုးတွေမှာတော့ ကျွန်မ စိတ်ကသိကအောက်ဖြစ်ရတယ်။ တစ်ခါမက နှစ်ခါမက အကြိမ်ကြိမ်ဖြစ်လာတော့ ' ရှင် ညအိမ်ပြန်မအိပ်ဘူးဆိုရင် ကျွန်မကို ဖုန်းဆက်အကြောင်းကြားထားပါ' လို့ ကျွန်မ ပြောတော့ 'ညဘက် ကိုယ်ပြန်မလာတာ မင်း စိတ်အနှောင့်အယှက်ဖြစ်လို့လား' တဲ့။ ကျွန်မ ခေါင်းခါပြလိုက်တယ်။

'မဖြစ်ပါဘူး။ ရှင် ပြန်မလာရင် ညစာအတွက် စီစဉ်ထားစရာမလိုဘူးလေ'

'သြော… ကိုယ်ပြန်မလာတော့ မင်း ညစာစီစဉ်ပေးရတာ သက်သာတယ်ပေါ့ ဟုတ်လား'

'ကျွန်မအတွက် မီးဖိုချောင်အလုပ်က အပန်းမကြီးပါဘူး။ ဒါပေမယ့် ချက်ပြုတ်ထားပြီးမှမစားတော့ အလကားဖြစ်ကုန်တာပေါ့။ မစားမှန်းသိရင် ကျွန်မ စီစဉ်ထားစရာမလိုဘူးလေ'

ကျွန်မ အဲ့ဒီလိုပြောပြီးနောက်ပိုင်း ညပြန်မအိပ်တဲ့နေ့တွေမှာ ကျွန်မကို ကြိုတင်အကြောင်းကြား ထားတတ်ခဲ့တယ်။ တစ်ခါတလေကျပြန်တော့ သူက အိမ်ပြန်မအိပ်တဲ့အကြောင်းကို သုံးလေးရက်စာ ခွင့်တိုင်သွားတတ်တယ်။ ကျွန်မရဲ့ နံဘေးမှာ တဖူးဖူးဟောက်ပြီး အိပ်တတ်တဲ့ ယောက်ျားတစ်ယောက် ရှိမနေတဲ့ညတွေမှာ ကျွန်မပိုပြီး လွတ်လွတ်လပ်လပ်အိပ်ရတာပေါ့။ ဒီလိုနဲ့ပဲ သူနဲ့ကျွန်မ မင်္ဂလာသက် တစ်နှစ်ရလာခဲ့တယ်။

(၆) 

သူနဲ့ကျွန်မကြားမှာ အကြီးမားဆုံးပြဿနာတစ်ခု စ,ဖြစ်ခဲ့တာက ကျွန်မစာအုပ်စင်က စာအုပ် တစ်အုပ်ပျောက်သွားတဲ့ကိစ္စပဲ။ ကျွန်မနဲ့ကျောင်းနေဖက်သူငယ်ချင်း တစ်ယောက်ကို ငှားပေးဖို့ စာအုပ် ရှာကြည့်တော့မှ သိရတာ။ စာအုပ်က ကျွန်မသိပ်ကြိုက်တဲ့ စာရေးဆရာမကြီး ဂျာနယ်ကျော်မမလေးရဲ့ 'သူလိုလူ' စာအုပ်ပါ။ စီးပွားရေးမဂ္ဂဇင်းနဲ့ သတင်းစာလောက်သာ ဖတ်လေ့ရှိတဲ့ သူ့ကို ကျွန်မစာအုပ် ဖတ်နေသလားလို့ မေးတော့ သူက အနီရောင်ရဲရဲစိုစို ကျောက်ကလေးတစ်လုံးကို မျက်မှန်တစ်လက်၊ ဓာတ်မီးသေးသေးတစ်လက်နဲ့ စူးစူးစိုက်စိုက်ကြည့်နေရင်းက မဖတ်ပါဘူးတဲ့။ ကျွန်မ ဦးနှောက်ခြောက် သွားတယ်။ ဒီအိမ်မှာ သူနဲ့ကျွန်မ နှစ်ယောက်တည်းရှိတာ။ အိမ်အလုပ်ကူလုပ်ပေးဖို့ ခေါ်ထားတဲ့ အမျိုးသမီးတစ်ယောက်ကလည်း ညနေ လေးနာရီခွဲရင် သူ့အိမ်သူပြန်ပြီ။ ဒီမိန်းမကလည်း ခပ်ရိုးရိုးရယ်ပါ။ ကျွန်မစာအုပ်တစ်အုပ်ကို ခိုးဝှက်ယူပြီး ရောင်းစားမယ့်မိန်းမမျိုးမဟုတ်ပါဘူး။

ကျွန်မ စဉ်းစားမရဖြစ်နေရတယ်။ ခြေထောက်မပါတဲ့စာအုပ်က ကျွန်မစာအုပ်စင်ပေါ်ကနေ ဘယ်ကို ဆင်းသွားလို့လဲ။ စာအုပ်စင်တစ်ခုလုံးကို မွှေနှောက်ရှာဖွေတဲ့အချိန်မှာ သူက လှမ်းပြောတယ်။ 

"မင်းစာအုပ်စင်က စာအုပ်တစ်အုပ် တလောကကိုယ့်မိတ်ဆွေတစ်ယောက် ယူသွားတယ်။ ရထားပေါ်မှာဖတ်ဖို့ထင်ပါတယ်"

ကျွန်မ ဒေါသထောင်းခနဲထွက်သွားတယ်။ သူ့စာအုပ်မဟုတ်ဘဲနဲ့ ပိုင်ရှင်ကိုအသိမပေးဘဲ ခွင့်ပြုစရာ လိုသလား။ စာအုပ်ငှားတဲ့လူကိုရော စာအုပ်ငှားပေးတဲ့လူကိုပါ ကျွန်မ စိတ်ဆိုးသွားမိတယ်။ စာအုပ်ငှားသူ တစ်ယောက်ဟာ စာအုပ်ပိုင်ရှင်ရဲ့ ခွင့်ပြုချက်မရဘဲ မငှားရဘူး။ သူ အလွန်ဖတ်ချင်နေတဲ့ စာအုပ်ဖြစ်နေဦးတော့ ပိုင်ရှင်ခွင့်ပြုမှသာ ယူသွားရမယ်။ ပိုင်ရှင်မသိဘဲ လက်ဆင့်မကမ်းရဘူး။ စာအုပ်ကိုရေစိုစုတ်ပြဲခြင်းမဖြစ်အောင် တာဝန်ယူဖတ်နိုင်ရမယ်။ ဒါဟာ စာပေကို မြတ်နိုးသူတစ်ယောက်မှာ ရှိကိုရှိရမယ့်စိတ်ပဲ။

ကျွန်မ စာအုပ်ငှားရမှာ တွန့်တိုတတ်သူတစ်ယောက် မဟုတ်ပါဘူး။ စာအုပ်ကောင်းတစ်အုပ်ကို ဖတ်မိရင် သူများတွေကိုလည်း ဖတ်ဖြစ်စေချင်တဲ့ စေတနာနဲ့ တိုက်တွန်းတတ်တဲ့ဝါသနာ ကျွန်မမှာရှိပြီးသားပါ။ စာအုပ်ကောင်းတစ်အုပ်ဟာ စာအုပ်စင်ပေါ်မှာ ငြိမ်ငြိမ်သက်သက်ရှိနေတာထက်စာရင် တစ်ယောက်ယောက်လက်ထဲမှာ ရှိနေတာက ပိုအကျိုးဖြစ်စေနိုင်တာမဟုတ်လား။ ဒါပေမယ့် မီးရထားပေါ်မှာ ဟိုလှန်ဒီလှန် လုပ်ဖို့လောက်အတွက်နဲ့ ကျွန်မရဲ့အဖိုးတန်စာအုပ်တစ်အုပ်ကို အဆုံးမခံနိုင် ဘူး။ မဖြစ်ဘူး။ ကျွန်မ ကြမ်းမှဖြစ်မယ်။

သူ့အပေါင်းအသင်းတွေအကြောင်းကိုလည်း ကျွန်မသိနေပြီးသားလေ။ စာအုပ်တစ်အုပ်ရဲ့အရသာဆိုတာကို နည်းနည်းလေးမှ နားမလည်ကြတဲ့လူစားမျိုးတွေ။ စာအုပ်ကောင်းတစ်အုပ်ဖတ်ရဖို့ထက် ဘီယာ တစ်ငုံလောက် သောက်ရဖို့ကိုသာ စိတ်ဝင်စားတတ်ကြသူတွေ။ ကာရာအိုကေစင်မြင့်ပေါ်က ရုပ်ချောချော အမျိုးသမီးငယ်လေးတွေရဲ့ လည်တိုင်မှာ ရောင်စုံပန်းကုံးတွေ သူ့ထက်ငါ ပိုစွပ်နိုင်ဖို့ ရူးရူးမူးမူးကြိုးစားနေ ကြသူတွေ။ ကျွန်မ အထင်ကြီးလို့ရတဲ့လူ သူ့အပေါင်းအဖော်တွေထဲမှာ မရှိဘူးလို့ထင်တယ်။

'ကျွန်မစာအုပ်ကို တစ်ပတ်အတွင်း ပြန်တောင်းပေးပါ။ ကျွန်မစာအုပ်တွေကို ကျွန်မဆီမှာ ခွင့်မတောင်းဘဲ ငှားတာ ကျွန်မမကြိုက်ဘူး'

'နေပါဦး၊ မင်းစာအုပ်က ဘယ်လောက်တန်တဲ့ စာအုပ်မို့လို့ ဒီလောက်အဖြစ်သည်းနေရတာလဲ'

ကျွန်မစွေ့စွေ့ခုန်သွားခဲ့ရတယ်။ ဒီစာအုပ်ဟာ အသစ်ပြန်ရိုက်ထားတဲ့ စာအုပ်မဟုတ်ဘူး။ ပထမဆုံးအကြိမ် ပုံနှိပ်ထားတဲ့ ခပ်ဟောင်းဟောင်းစာအုပ်ပါ။ စာအုပ်ဟောင်းကိုသာ လိုချင်တယ်ဆိုရင် လည်း ပြန်ရှာဝယ်ရင် ဖြစ်နိုင်ပါလိမ့်ဦးမယ်။ ကျွန်မစာအုပ်ကို ယူဖတ်ပြီး ဖျောက်ပစ်လိုက်ဦးတော့ ဒီလောက် စိတ်ဆိုးမိမှာမဟုတ်ဘူး။ ကျွန်မ မြတ်နိုးတာ စာအုပ်ရဲ့ငွေကြေးတန်ဖိုးမဟုတ်ပါဘူး။ စာအုပ်ထဲက စာတွေရဲ့ တန်ဖိုးပါ။ ခုတော့ ကျွန်မ စာအုပ်ကို လက်လွတ်စပယ်လည်း လုပ်ခဲ့တယ်။ ကျွန်မကို လည်း စော်ကားသေးတယ်။ ကျွန်မ သူ့ကို မီးဝင်းဝင်းတောက်နေတဲ့ မျက်လုံးမျိုးနဲ့ကြည့်ပြီး သူ့ရှေ့ကနေ ချာခနဲလှည့်ထွက်ခဲ့မိတယ်။ အဲဒီကစလို့ သူနဲ့ကျွန်မ တစ်ယောက်ကိုတစ်ယောက် အခဲမကျေနိုင် ဖြစ်သွား ခဲ့ကြတာပါပဲ။

(၇)

ယောက်ျားတစ်ယောက်ဟာ အိမ်ထောင်ရေးမသာယာရင် အပြင်မှာ အပျော်ရှာတတ်ကြတယ်ဆိုတာကို ကျွန်မသိထားပေမယ့် အဲဒီလိုမဖြစ်အောင်ကာကွယ်ဖို့ ကျွန်မစိတ်မ၀င်စားခဲ့ဘူး။ 'ငါ မိန်းမတွေ အများကြီးနဲ့ တွဲခဲ့ဖူးတယ်။ အေး… ဒါပေမယ့် ငါ တရားဝင်လက်ထပ်ယူခဲ့တဲ့ မိန်းမဟာ မင်းတစ်ယောက်တည်းပဲရှိတယ်' ဆိုတဲ့ သူ့ရဲ့စကားဟာ ကျွန်မအတွက်တော့ ကျေနပ်ဂုဏ်ယူစရာ ဖြစ်မလာနိုင်ခဲ့ဘူး။ စီးပွားရေးလုပ်ငန်း တစ်ခုအတွက်တော့ ပေါင်နှံထားတဲ့ ကျွန်မတို့ရဲ့ အိမ်နဲ့ခြံကို တစ်စုံတစ်ယောက်လက် ရောက်မသွားအောင် ကယ်တင်ပေးခဲ့တဲ့ သူ့ကျေးဇူးတွေအတွက် ဖေဖေက ပြန်လည်ပေးဆပ်လိုက်ရတာဟာ ရွှေဝါခိုင်ဆိုတဲ့ သမိးတစ်ယောက်ပေါ့။

ဒါပေမယ့် သူ့ကို 'ရှင်ဟာ ကျွန်မကိုအကြွေးနဲ့ သိမ်းခဲ့တဲ့လူကြီး' လို့ လက်ညှိုးထိုးစွပ်စွဲ ရန်တွေ့ပြီး ပေါက်ကွဲခွင့်မရခဲ့ဘူး။ ဘာကြောင့်ဆိုတော့ သူက ကျွန်မကို ဖေဖေ့ဆီမှာ တောင်းယူခဲ့တာ မဟုတ်ဘဲ ဖေဖေကသာ သူ့ဆီမှာ ကျွန်မကို ထိုးအပ် ခဲ့တာဖြစ်နေတာကိုး။ ဒီအတွက် ဖေဖေ့ကိုလည်း ကျွန်မ အပြစ်မတင်လိုတော့ပါဘူး။ ဖေဖေဟာ ကံတရားကြောင့် ကျဆုံးခဲ့ရပေမယ့် အရာရာ အပေါ် လေးလေးနက်နက် တွေးခေါ်စဉ်းစားတတ်တဲ့လူတစ်ယောက်ဆိုတာ ကျွန်မ သိနေတယ်လေ။ အကောင်းဆုံးရွေးချယ်မှုတစ်ခုကို ဖေဖေ ရွေးချယ်လိုက်တာပဲဖြစ်မှာပါ။ ဘာပဲဖြစ်ဖြစ် ကျွန်မ ကိုယ့်ကိုယ် ကိုတောင် ကျေနပ်ဂုဏ်ယူနေသင့်သေးတာ မဟုတ်လား။ ရွှေဝါခိုင်ဆိုတဲ့ မိန်းမဟာ သိန်း ၅၀ လောက်တန်တဲ့ တန်ဖိုးကြီး မိန်းမတစ်ယောက်အဖြစ်လေ။

ကျွန်မ ထင်တော့ မထင်ခဲ့မိဘူး။ ချစ်ခြင်းမေတ္တာဆိုတဲ့ အကြောင်းအရာတစ်ခုကို ကျွန်မနဲ့တစ်ခါမှ မဆွေးနွေးဖူးခဲ့တဲ့ သူစိမ်းယောက်ျားတစ်ယောက်ဟာ ကျွန်မနဲ့ အမိုးတစ်ခုတည်းအောက်မှာ အတူနေထိုင်ရတဲ့ လင်ယောက်ျားဖြစ်လာလိမ့်မယ်လို့လေ။ အချစ်ဆိုတာ လုံးဝမပါခဲ့တဲ့ သူစိမ်း မိန်းမတစ်ယောက်နဲ့ ယောက်ျားတစ်ယောက် နှစ်,နှစ်တာကာလကြာအောင် ပေါင်းသင်းနေနိုင်ခဲ့တာပဲ အံ့သြစရာပဲနော်။ ည,ည သူပြန်မအိပ်တဲ့ နေ့တွေမှာ သူ ဘယ်မိန်းမအိမ်မှာ အိပ်တာပါလိမ့်လို့ ကျွန်မစဉ်းစားလာတတ်ခဲ့ပေမယ့် ဒါဟာ မနာလိုမှုမဟုတ်ဘဲ နာကြည်းမှုသက်သက်ပဲဆိုတာ ခွဲခြား နားလည်နေခဲ့တယ်။

ကျွန်မ သူ့အပေါ် စွဲလမ်းတပ်မက်စိတ် ဖြစ်နေပြီလားလို့ ကိုယ့်ကိုယ်ကိုပြန်မေးကြည့်မိတော့ ကျွန်မရင်ထဲကို ပထမဆုံးတိုးဝင်လာတဲ့ ခံစားမှုက ရှက်ရွံ့ခြင်းဆိုတဲ့ ခံစားမှုသာ ဖြစ်နေတယ်။ သူ့အပေါ် ကျွန်မဘက်က တစ်စတစ်စဖွဲ့တည်လာတဲ့ လျော့ရဲရဲ သံယောဇဉ်ကြိုးဟာ သူ မကြာခဏထုတ်ဖော်ပြောတတ်တဲ့ အမျိုးသမီးနာမည်တွေရဲ့အောက်မှာ အပိုင်းပိုင်း ပြတ်ထွက်ကုန်ကြတယ်။ ကျွန်မတို့နှစ်ယောက် ကြားက အေးစက်တဲ့ ဆက်ဆံရေးကို ပြန်လည်နွေးထွေးလာအောင် ဖန်တီးပေးနိုင်တဲ့ သားသမီးရတနာ ကျွန်မ၀မ်းကြာတိုက်မှာ ၀င်ရောက်မခိုလှုံခဲ့တဲ့ အချက်ကလည်း ကျွန်မတို့နှစ်ယောက်ကို အပြီးတိုင် ဝေးကွာ သွားစေဖို့ တွန်းအားပေးခဲ့တဲ့ အချက်တစ်ချက်ဖြစ်ပါလိမ့်မယ်။

မိုက်မဲတဲ့ ရွှေဝါခိုင်ဆိုတဲ့ အမျိုးသမီးကတော့ သားသမီးမရတော့လည်း ငါနဲ့သူ ကွဲကွာကြမယ် ဆိုရင် ထောက်ထားနေစရာမလိုတော့ဘူးပေါ့ဆိုတဲ့ အတွေးမျိုးနဲ့ ကျေနပ်နေခဲ့တယ်။ ကျွန်မက အဆိုးဆုံးဖြစ်လာမယ့် အနာဂတ်ကို ကြိုတင်မျှော်လင့်ထားခဲ့ပြီးသားလေ။ တစ်ခုလပ်ဆိုတဲ့ ရပ်တည်မှု နဲ့ လောကကို ကြိုတင်ရင်ဆိုင်ပြီးသား ဖြစ်နေတော့ ကျွန်မဘာကိုမှ တုန်လှုပ်စရာ မရှိနိုင်တော့ဘူး မဟုတ်လား။

သူနဲ့ကျွန်မကြားက နောက်ဆုံးပေါက်ကွဲမှုကတော့ ကျွန်မ တစ်သက်နဲ့တစ်ကိုယ် ကျွန်မစိတ်နဲ့ကျွန်မ ခတ်ခဲ့တဲ့ သော့တစ်လုံးက စတင်ခဲ့တာ။ ကျွန်မ စာရေးစားပွဲအံဆွဲထဲက စာအုပ်တစ်အုပ်ကို သူ ကျွန်မကို လာပြခဲ့တယ်။ သူ စိတ်ဝင်တစားယူလာပေးတဲ့ စာအုပ်က ကျွန်မ ကိုးတန်းနှစ်ကတည်းက ပိုင်ဆိုင်ခဲ့တဲ့ မှတ်တမ်းစာအုပ်လေးတစ်အုပ်ပါ။ အဲဒီစာအုပ်ကို ကျွန်မ သော့ခတ်ထားခဲ့တာကြာပြီ။ ကျွန်မ အိမ်ထောင်မကျခင် တစ်လအလိုကတည်းက အဲဒီစာအုပ်ကို မဖွင့်ဖြစ်တော့တာ။

'ကိုယ် ဒီစာအုပ်ကို ဖတ်ခွင့်ရှိမလား' လို့ သူကမေးတော့ 'ဖတ်ချင်တယ်ဆိုရင်လည်း ဖတ်ပေါ့။ ဒါပေမယ့် အဲဒီစာအုပ်ရဲ့ သော့ ကျွန်မမှာမရှိတော့ဘူး' လို့ ခပ်အေးအေးပဲ ပြန်ဖြေလိုက်တယ်။ အဲဒီစာအုပ်ထဲမှာ ကျွန်မရဲ့ ကြေမွခဲ့ပြီဖြစ်တဲ့ အနာဂတ်တွေပါတယ်။ ကျွန်မရဲ့ ရှင်သန်ခဲ့ဖူးတဲ့ ၀ိညာဉ်တစ်ခု ပါတယ်။ တေဇာဆိုတဲ့ နာမည်တစ်လုံးပါတယ်။ ဒါပါပဲ။ ကျွန်မအတွက် အဲဒီစာအုပ်ဟာ ရာသက်ပန် ဖွင့်စရာမလိုတော့တဲ့ စာအုပ်တစ်အုပ်အဖြစ် သတ်မှတ်လိုက်ပြီမို့ သော့ကို ကျွန်မ လွှင့်ပစ်လိုက်ပြီ။ အဲဒီသော့ဟာ ဧရာဝတီမြစ်ရဲ့ တစ်နေရာရာမှာ စီးမျောကွယ်ပျောက်သွားခဲ့ပြီ။ 

 

 

'သော့တွေကို ဒီလောက်မုန်းတဲ့သူက ဒီစာအုပ်ကိုမှ ဘာဖြစ်လို့ ထူးထူးခြားခြား သော့ခတ်ထားရတာလဲ ဆိုတာ ကိုယ် သိချင်တာ၊ သော့ခတ်တယ်ဆိုကတည်းက လုံခြုံစိတ်ချရအောင် ခတ်တယ်ဆိုတာတော့ သိပါတယ်'

'သော့ခတ်တာချင်းတူပေမယ့် သော့ခတ်တဲ့ ရည်ရွယ်ချက်ချင်းကတော့ တူချင်မှတူမှာပေါ့။ ရှင့်အတွက်က ခတ်ပြီးသားသော့ခလောက်တစ်လုံးကိုပြန်ဖွင့်ဖို့ သော့တံတစ်ခု မရှိမဖြစ်လိုတယ်မဟုတ်လား။ ကျွန်မ အတွက်တော့ ပိတ်လိုက်တဲ့ သော့ခလောက်တစ်လုံးကို ပြန်ဖွင့်ဖို့ သော့တံတစ်ခုမလိုအပ်ဘူးလေ။ ကျွန်မက ရာသက်ပန်ပိတ်ခြင်းအထိမ်းအမှတ်နဲ့ သော့ခတ်ခဲ့တာ။ ဒါကြောင့် အဲဒီသော့တံကို ကျွန်မလည်ပင်းမှာ ဆွဲထားဖို့လည်းမလိုဘူး။ ခါးကြားမှာထိုးထားဖို့လည်း မလိုဘူးလေ။ ရှင် သိပ်ဖတ်ချင်တယ်ဆိုရင် ဖြစ်တဲ့ နည်းနဲ့ ဖွင့်ဖတ်လို့ရပါတယ်'

ကျွန်မရဲ့ မှတ်တမ်းစာအုပ်ကို သူ ဒေါသတကြီး ကိုင်ပေါက်ပစ်လိုက်တယ်။ အဲဒီအဖြစ်အပျက်ဖြစ်ပြီး ဆယ်ရက်မြောက်တဲ့နေ့မှာ ကျွန်မတို့နှစ်ယောက် တရားဝင်ကွာရှင်း ပြတ်စဲလိုက်ကြတယ်။

(၈)

သူနဲ့ကျွန်မ ကွာရှင်းပြီးမကြာခင်မှာ ဖေဖေ ဆုံးပါးသွားတယ်။ လောကကြီးမှာ တစ်ခုလပ် အမျိုးသမီး တစ်ယောက် တင့်တယ်စွာ ရပ်တည်နိုင်နေနိုင်လောက်တဲ့ စည်းစိမ်ဥစ္စာတွေ ကျွန်မ ပိုင်ဆိုင်ခွင့်ရခဲ့ တယ်။ ဖေဖေ့ရဲ့ ဇာတိရွာကလေးမှာ ဖေဖေ့အတွက် ရည်စူးပြီး စာသင်ကျောင်းဆောင်လေး တစ်ခု ဆောက်လုပ်လှူဒါန်းပေးခဲ့တယ်။ ကျန်တဲ့ငွေနဲ့ ပစ္စည်းအားလုံးကို မေမေ့လက်ထဲ လွှဲအပ်ပေးလိုက် တယ်။ ပြီးတော့ ကိုကိုကြီးရှိတဲ့ ဖားကန့်မြို့လေးကို ရောက်လာခဲ့တယ်။

ကျောက်စိမ်းတုံးဆိုတာတွေကို လမ်းခင်းတဲ့ကျောက်တုံးအဖြစ်သာမြင်ကြည့်တတ်ခဲ့တဲ့ ကျွန်မဟာ အဲဒီကျောက်တုံးတွေရဖို့ သက်စွန့်ကြိုးပမ်း အလုပ်လုပ်နေကြရတဲ့ ကျောက်တူးသမားတွေရဲ့ ဘ၀ကို စိတ်ဝင်စားလာမိတယ်။ ငွေသိန်းတစ်ရာရှိရာကနေ သိန်းတစ်ထောင်ရှိအောင်၊ သန်းတစ်ထောင်ရှိအောင် သဲသဲမဲမဲကြိုးစားနေတဲ့ လူချမ်းသာတွေရဲ့ စိတ်ဝိညာဉ်တွေကို ကျွန်မအံသြတကြီး စူးစမ်းနေမိ တယ်။ မြန်မာပြည်က မြို့ကလေးတစ်မြို့လို့တောင် မထင်ရတဲ့ ဖားကန့်မြို့လေးရဲ့ စည်ကားမှုကို ရင်သပ်ရှုမောငေးကြည့်နေမိခဲ့တယ်။ ဥရုချောင်းရေဟာ ကျွန်မရဲ့ ညစ်ညူးနောက်ကျနေတဲ့စိတ်တွေကို ကြည်လင်လန်းဆန်းလာအောင် ကုစားပေးနိုင်ခဲ့တယ်။ ဖားကန့်ဟာ ကျွန်မကို ရင်ခုန်စေခဲ့တဲ့ မြို့လေး တစ်မြို့ပါပဲ။ အစ်ကိုရဲ့အရှိန်အ၀ါနဲ့ ကျွန်မဟာ ဖားကန့်မြို့ရဲ့ နေ့ညမပြတ်ဆူညံနေတဲ့ အသံတွေကြားမှာ ဣနြေ္ဒရရမျောပါနိုင်ခဲ့တယ်။

အစ်ကိုက ဖားကန့်မှာ အောင်မြင်တဲ့ စီးပွားရေးသမားတစ်ဦးအဖြစ် ခိုင်ခိုင်မာမာ ရပ်တည်နိုင် ခဲ့ပြီလေ။ကျောက်တူးသမားလေးဘ၀ကနေ အရောင်းအ၀ယ် ကျောက်ကုန်သည် တစ်ယောက်ဖြစ်လာစ အချိန်မှာပဲ ဖားကန့်မြို့မှာ အခြေကျနေတဲ့ ကျွန်မယောက်မ ဆရာဝန်မနဲ့ ဖူးစာဆုံခဲ့တာလို့ အစ်ကိုက ပြောပြခဲ့တယ်။ ကျွန်မယောက်ကဟာ အစ်ကို့ကိုတော်တော်ချစ်နိုင်တဲ့ အမျိုးသမီးတစ်ယောက် ပါ။ မိန်းမကောင်းပီသတဲ့ တကယ်တော်တဲ့ ဇနီးသည်တစ်ယောက် ဖြစ်တယ်ဆိုတာ အစ်ကို့အိမ်မှာ သုံး,လေးရက်နေရုံနဲ့ ကျွန်မသိခဲ့ရတယ်။

လူ့လောကကြီးထဲက တစ်ချို့အဖြစ်အပျက်တွေဟာ မယုံကြည်နိုင်လောက်အောင် အံ့သြဖို့ကောင်းလှတယ်။ ငါ့မိန်းမက ရေဆိုရင် ခပ်ပြီးသား၊ ငါးခြောက်ဆိုရင် ဖုတ်ပြီးသားလို့ ပြောတုန်းက အစ်ကို့စကားကို ကျွန်မရယ်မောနေခဲ့မိတယ်။ တကယ်တမ်း ကျွန်မမျက်မြင်ကိုယ်တွေ့ကြုံရမှ အစ်ကို့အမျိုးသမီးရဲ့အဖြစ်တွေ ကို ကျွန်မယုံကြည်နိုင်ခဲ့တာ။ အစ်ကိုဟာ အဘက်ဘက်ကပြည့်စုံတဲ့ မိန်းမတစ်ယောက်ကို ဘာအတွက် အလကားနေရင်း နိုင်စားနေရတယ်ဆိုတာ ကျွန်မဘယ်လိုမှ စဉ်းစားလို့မရနိုင်အောင်ဖြစ်ရ တယ်။ ယောက်မဘက်က မပြောပလောက်တဲ့ ချွတ်ယွင်းချက်တစ်ခုခုဖြစ်ခဲ့ရင် မပြီးနိုင်မစီးနိုင် ဆူပူနေ တတ်တဲ့ အစ်ကိုဟာ အရင်တုန်းကအိမ်မှာ မေမေဆူပူရင် နားငြီးတယ်ဆိုပြီး ထွက်သွားတတ်တဲ့လူမျိုးပါ။

တကယ်ဆို အစ်ကို ဒီလိုအခြေအနေရောက်လာခဲ့အောင် ယောက်မကအများကြီး ပံ့ပိုးပေးခဲ့တာပါ။ ဒီလောက်ကောင်းတဲ့ မိန်းမမျိုးကိုရထားနိုင်ပါလျက် အစ်ကို့ရဲ့ယောက်မအပေါ် နိုင်ထက်ကလူပြုမှုတွေ ကို မြင်ရတော့ ကျွန်မ အစ်ကို့ကိုမကျေမနပ် ဖြစ်လာတယ်။ ယောက်မက 'သူက ဒီလိုပါပဲ' ဆိုတဲ့ စကားကို အပြုံးမပျက်ပြေတော့ ကျွန်မအံ့သြမဆုံးဖြစ်နေရတယ်။ 'ကျွန်မလို မိန်းမသာဆို အစ်ကို့လိုယောက်ျားမျိုး ကို နှစ်လပြည့်အောင် ပေါင်းမနေနိုင်ဘူး' လို့ ပြောတော့ 'ဒါကြောင့် ညီမလေး တစ်ခုလပ်ဖြစ်လာတာပေါ့' လို့ အစ်ကိုက ရယ်မောပြောခဲ့သေးတယ်။

တစ်ခုလပ်ဖြစ်ရမှာစိုးတာနဲ့တော့ စိတ်ဆင်းရဲခြင်းနွံထဲမှာ တစ်သက်လုံးအနစ်မြုပ်မခံနိုင်ပါဘူးလို့ ကျွန်မဆိုတော့ ကျွန်မကို ကလေးတစ်ယောက်ကိုကြည့်ပြီး အစ်ကိုနဲ့ယောက်မ ရယ်မောနေကြတယ်။ ကျွန်မမေ့လျော့နေခဲ့မိတာကိုး။ ကျွန်မယောက်မက အစ်ကို့ကိုအရူးအမူးချစ်ပြီးမှ လက်ထပ်ယူခဲ့သူ။ ကျွန်မကတော့ အချစ်ဆိုတာ လုံးဝမပါဘဲ ယောက်ျားတစ်ယောက်ကို လက်ထပ်ခဲ့ရသူ။ အခြေအနေချင်းမှ မတူခဲ့တာကို ကျွန်မထည့်မတွက်မိခဲ့ဘူးလေ။

ယောက်မကတော့ဆိုခဲ့တယ်။ ကျွန်မတို့နှစ်ယောက်ဟာ အတူတူပါပဲတဲ့။ 'မိန်းမတွေဟာ မိုက်မိုက်မဲမဲ သတ္တိရှိတဲ့နေရာမှာ ယောက်ျားတွေထက် ပိုတတ်ကြတယ် ညီမလေးရဲ့၊ ညီမလေး အစ်ကိုကို မမ လက်ထပ်တုန်းက တစ်ဆွေလုံးတစ်မျိုးလုံးကို တိုက်ပွဲဝင်ခဲ့ရတာ၊ မမမိသားစုကို စွန့်လွှတ်ပြီးမှ သူ့ကိုယူခဲ့တာ၊ မမ ဂုဏ်သိက္ခာတွေကို အထိခိုက်ခံပြီး သူ့ကိုယူခဲ့တာ၊ ညီမလေးလည်း ဘာထူးလို့လဲ၊ ယောက်ျားတစ်ယောက်ကို ကိုယ့်သဘောနဲ့ကိုယ် ကွာရှင်းပြီး ပတ်ဝန်းကျင် တစ်ခုလုံးရဲ့ ဝေဖန်ကဲ့ရဲ့သံတွေကို ရင်ဆိုင်ခဲ့တာပဲမဟုတ်လား၊ ကိုယ့်ရဲ့ စိတ်ဝိညာဉ်လွတ်လပ်မှုအတွက် ဂုဏ်သိက္ခာဆိုတာတွေကို အထိခိုက်ခံနိုင်ခဲ့တာပဲမဟုတ်လား' တဲ့။ ကျွန်မစဉ်းစားကြည့်မိတယ်။ မိန်းမတွေဟာ ယောက်ျားတွေထက်ပိုပြီး မိုက်မိုက်မဲမဲ သတ္တိရှိကြတယ်ဆိုတာ ဟုတ်ရဲ့လားလို့လေ။

(၉)

ကြာတော့ဖားကန့်ကို ကျွန်မငြီးငွေ့လာတယ်။ ဖားကန့်မှာ ကျွန်မအတွက်နေရာမရှိဘူးလေ။ ကျွန်မအတွက် ဖားကန့်မြို့ဟာ ခဏတစ်ဖြုတ်လောက်သာ နေချင်စရာကောင်းတဲ့နေရာတစ်ခုဖြစ်နေတာကိုး။ ကျွန်မ ဖားကန့်မြို့မှာ ဘယ်လိုမှဆက်မနေချင်လောက်တဲ့ အကြောင်းအရာတစ်ခုကို ရင်ဆိုင်လိုက်ရတဲ့နေ့ကတော့ ကျွန်မလက်ထဲကို သော့တွေရောက်လာတဲ့နေ့ပါပဲ။ အစ်ကိုက ယောက်မကိုအပ်ရမယ့် သော့တွေကို ကျွန်မလက်ထဲလာထည့်ပေးခဲ့တယ်။

လူတွေဟာ သော့တွေကို ဘာလို့ဒီလောက်အရေးတယူ လုပ်နေကြရတာလဲ။ သစ္စာမရှိတဲ့ လူတွေကြောင့် သော့တွေပေါ်လာခဲ့ကြတာတဲ့လား။ သော့တွေအများကြီး ပိုင်ဆိုင်ခွင့်ရဖို့ ဘာလို့ဒီလောက် ကြိုးစားနေနေကြတာလဲ။ သူတို့လက်ထဲက သော့တံတွေကို တစ်စုံတစ်ယောက်က လုယူသွားမှာကို အသေအလဲ ကြောက်နေကြတာ ရယ်စရာမကောင်းဘူးလား။ တစ်ခါတုန်းက ကျွန်မရဲ့ခင်ပွန်းသည်ကို ရှင့်ရဲ့သော့တွေကို ဘယ်မှာမှလိုက်ရှာစရာမလိုအောင် လည်ပင်းမှာဆွဲထားရင်ကောင်းမယ်ထင်တယ်လို့ အကြံပေးမိတဲ့အတွက် သူ အကြီးအကျယ် စိတ်ဆိုးသွားခဲ့ဖူးတယ်။

တကယ်တော့ လူတွေဟာ ဥစ္စာရူးတွေပဲဆိုတဲ့ စကားကိုတော့ သူ့ကို ကျွန်မမပြောဖြစ်ခဲ့ဘူး။ ငါ ဥစ္စာရူးခဲ့လို့ မင်းကို ဒီလိုထားနိုင်တယ်မှတ်ပါလို့ သူကပြောလာရင် ကျွန်မမှာ ပြန်ပြောစရာစကားရှိမနေတဲ့အတွက်ပေါ့။ ဘာပဲဖြစ်ဖြစ် သူဟာ ကျွန်မတို့မိသားစုရဲ့ ကျေးဇူးရှင်တစ်ယောက်ဖြစ်ခဲ့တယ်ဆိုတာ ကျွန်မဘယ်လိုမှ မငြင်းနိုင်ပါဘူး။ ချောက်ထဲကျလုနီးနီးဖြစ်ခဲ့ရတဲ့ ဖေဖေ့ရဲ့ဘ၀နဲ့ မိသားစုတစ်ခုလုံးကို ကယ်တင်ခဲ့သူ ဟာဖေဖေ့ကို အလွန်ချစ်ကြောက်ရိုသေတဲ့ အလိုလောဘအင်မတန်နည်းတဲ့ဖေဖေ့ရဲ့ သမက်ကျောင်းဆရာ မဟုတ်ခဲ့ဘူး။ဖေဖေ့ကို မိတ်ဆွေတစ်ဦးလိုပေါင်းသင်းဆက်ဆံခဲ့တဲ့ အင်မတန်လောဘကြီးတဲ့ ဥစ္စာရူးလို့ ကျွန်မယူဆသတ်မှတ်ထားခဲ့တဲ့ ကျွန်မရဲ့ ခင်ပွန်းသည်ဖြစ်ခဲ့တယ်။

စည်းစိမ်ဥစ္စာတွေကို လိုလေသေးမရှိ ပိုင်ဆိုင်ခွင့်ရဖို့ ဘယ်တုန်းကမှ ဆုတောင်းဖူးခြင်းမရှိခဲ့တဲ့ ကျွန်မဟာ လူတော်တော်များများအားကျမက်မောလောက်တဲ့ စည်းစိမ်ဥစ္စာတွေကို ပိုင်ဆိုင်ခွင့်ရခဲ့တယ်။ မေမေ ကတော့ ဆိုခဲ့တယ်။ ဒါဟာ ရွှေဝါခိုင်ဆိုတဲ့ မိန်းမတစ်ယောက် အရင့်အရင်ဘ၀ကပြုခဲ့တဲ့ ကုသိုလ်ကံရဲ့ အကျိုးဆက်တွေကြောင့်တဲ့။ ဒါပေမယ့် ရွှေဝါခိုင်လိုလားတောင့်တခဲ့တဲ့ဘ၀မျိုးကို ပိုင်ဆိုင်ခွင့်မရခဲ့တာ ကတော့ ကျွန်မရဲ့ ကံဆိုးမှုတစ်ခုသာဖြစ်မှာပေါ့။ လူတွေက ကျွန်မ ပိုင်ဆိုင်ခွင့်ရလိုက်တဲ့ စည်းစိမ်ဥစ္စာတွေ ကိုကြည့်ပြီး ရွှေဝါခိုင် တစ်ခုလပ်ဖြစ်ခဲ့ပေမယ့် မြတ်လိုက်ပါတယ်လို့ ဆိုချင်ကြတယ်။ ကျွန်မအရှုံးကို ကျွန်မကလွဲပြီး ဘယ်သူမှ မမြင်နိုင်ခဲ့ကြဘူး။ ကျွန်မ အနှစ်နှစ်အလလ စောင့်စားမျှော်လင့်ထားခဲ့တဲ့ အိပ်မက်ထဲက ချစ်သူတစ်ယောက်ကို စွန့်လွှတ်လိုက်ရတာကို သူတို့ မမြင်ကြဘူး။ လက်တွေ့ဘ၀ထဲမှာ ကျွန်မတကယ်တမ်း ချစ်မက်မြတ်နိုးခဲ့ရတဲ့ချစ်သူတစ်ယောက်ကို စွန့်လွှတ်ခဲ့ရတာ မမြင်ခဲ့ကြဘူး။ ပြီးတော့ ကျွန်မရည်မှန်းတမ်းတခဲ့တဲ့ အနာဂတ်ကြီးတစ်ခုလုံး ပြိုကျသွားခဲ့တာကိုလည်း မမြင်နိုင်ကြဘူး။ အားလုံးဟာ ကျွန်မရင်ထဲက ခံစားချက်တွေကို မြင်မကြည့်တတ်ကြသူတွေသာ ဖြစ်နေခဲ့တယ်။

လူတွေဟာ ရွှေဝါခိုင့်အပေါ် တစ်မျိုးတည်းသော မှတ်ချက်တစ်ခုနဲ့ တီးတိုးတီးတိုး စကားတင်း ဆိုနေခဲ့ကြ တယ်။ အေးသလိုလိုနဲ့ တော်တော်လည်တဲ့မိန်းမတဲ့။ သူတို့အားလုံး မြင်တွေ့ခဲ့တာက ရွှေဝါခိုင်ဆိုတဲ့ တစ်ခုလပ်မိန်းမတစ်ယောက် ပိုင်ဆိုင်ခွင့်ရလိုက်တဲ့ သော့တွေပဲဖြစ်ခဲ့တာကိုး။ သိန်းနှစ်ဆယ်ဝန်းကျင် တန်ဖိုးရှိတဲ့ ကားသော့တစ်ချောင်းရယ်၊ သိန်း၅၀အောက် မလျော့နိုင်တဲ့ တစ်ထပ်တိုက်ပြာလေး တစ်လုံးရဲ့သော့တစ်ချောင်းရယ်၊ နောက် အဲဒီတိုက်အိမ်လေးထဲက အဖိုးတန် သေတ္တာလေးတစ်လုံးကို ဖွင့်ဖို့ သော့တစ်ချောင်းရယ်၊ ပြီးတော့ မြို့လည်လမ်းမပေါ်က ဆိုင်ခန်းတစ်ခုရဲ့ သော့တစ်ချောင်းရယ်။ ဒါတွေကို သူတို့ မြင်တွေ့ခဲ့ကြတယ်လေ။

အဲဒီသော့တွေကို ကျွန်မ မမက်မောဘူးဆိုတာကို သူများတွေဝေးလို့ ကျွန်မကိုမွေးထုတ် ခဲ့တဲ့ မေမေကတောင် မယုံကြည်နိုင်ခဲ့ဘူး။ တစ်နေ့တော့ သမီး အိမ်ထောင်သစ် ထူမိဦးမှာပါ၊ သမီးအသက်ဟာ ငယ်ငယ်လေးရှိသေးတာ၊ ဒီ ပစ္စည်းဥစ္စာတွေကို သမီးပဲ ထိန်းသိမ်းထားသင့်တယ် တဲ့။ ရွှေဝါခိုင်ဆိုတဲ့ မိန်းမဟာ ဘ၀တစ်သက်တာ ကာလတစ်ခုတည်းမှာ ယောက်ျားနှစ်ယောက်ကို ဘယ်လိုအကြောင်းကြောင့်မှ နှစ်ခါလက်ထပ်မယ့်သူမဟုတ်ဘူးဆိုတာ မေမေကတောင် မယုံကြည်နိုင်ဘူး တဲ့လေ။ မမကလည်း ဆိုခဲ့တယ်။ 'မိဝါ နှစ်သက်တဲ့လူတွေ့ရင် အိမ်ထောင်ပြုပါ၊ တစ်ခုလပ် မိန်းမတစ်ယောက်ကို လူတွေက အရိုအသေတန်ကြတယ်၊ ကိုယ့်အပေါ်ကောင်းမယ့်သူတွေ့ရင် စဉ်းစားပါ' တဲ့။

ခုတော့ ကိုကိုကြီးနဲ့ ယောက်မကလည်း ဆိုလာပြန်ပြီ။ 'ညီမလေး သဘောကျတဲ့သူတွေ့ရင်ပြောပါ၊ သင့်မသင့် ကြည့်ရတာပေါ့၊ မရှိရင်လည်း သင့်တော်မယ့်ထဲက မမတို့ ရှာပေးလို့ရတယ်၊ ညီမလေး ရုပ်နဲ့ဆို လူပျိုကလေးတောင် အသာလေးရနိုင်ပါသေးတယ်' တဲ့။ လူတွေဟာ ကံမကောင်းအကြောင်းမလှလို့ တစ်ခုလပ်ဖြစ်ခဲ့ရတဲ့ မိန်းမတွေကို ဘယ်လိုမျက်လုံးမျိုးနဲ့ ကြည့်နေတာတဲ့လဲ။ တစ်ခုလပ်မိန်းမတစ်ယောက် ဟာ သာမန် မိန်းမပျိုတစ်ယောက်လိုပဲ ဣနြေ္ဒရရ ဂုဏ်သိက္ခာရှိစွာ တစ်ယောက်တည်း ရပ်တည်နိုင်ခြင်း အပေါ် လေးစားဂုဏ်ယူဖို့ မကောင်းတော့ဘူးလား။

စိတ်ဝင်စားစရာကောင်းလှတဲ့ အကြောင်းအရာမျိုးစုံနဲ့ ကျွန်မကို အချိန်အတော်ကြာ ဆွဲဆောင်ထားနိုင်တဲ့ မြို့ကလေးကနေ ပြေးထွက်ဖို့ ကျွန်မ ကြိုးစားရပြန်တယ်။ ရွှေဝါခိုင်ဆိုတာ ရုပ်ရည် အတော် အသင့်ချောမောတဲ့ လွတ်လပ်သူ မိန်းကလေးတစ်ယောက်အဖြစ် လူအများက စိတ်ဝင်စားလာကြပြန်တယ်။ ဒါပေမယ့် သူတို့ကိုတော့ ကျွန်မ ကြာရှည်စိတ်ဝင်စားကြည့်လို့ မရနိုင်ခဲ့ဘူး။ ကိုကိုကြီးနဲ့ပတ်သက်ပြီး ခင်မင်ခွင့်ရခဲ့တဲ့ ကျွန်မရဲ့ မိတ်ဆွေသစ်တွေဟာ ကျွန်မရဲ့ ခင်ပွန်းဟောင်းနဲ့ ထပ်တူနီးပါးတူတဲ့ သူတွေ ဖြစ်နေခဲ့တာကိုး။ ကျွန်မကို အချိန်အတော်အတန် ကြာအောင် ဖြားယောင်းထားနိုင်ခဲ့တဲ့မြို့ကလေး ကို နှုတ်ဆက်ဖို့ ဆုံးဖြတ်လိုက်မိတယ်။

'မိဝါကိုခွင့်လွှတ်ပါ ကိုကြီး၊ ဒီမှာနေရတဲ့ အခိုက်အတန့်လေးမှာ ကိုကိုကြီးရဲ့ အရိပ်အငွေ့ကြောင့် မိဝါ ဂုဏ်သိက္ခာမပွန်းပဲ့ခဲ့ရတဲ့အတွက် ကိုကိုကြီးကို မိဝါအမြဲကျေးဇူးတင်နေမှာပါ။ မိဝါ မေမေတို့ဆီ ပြန်တော့ မယ်၊ ကိုကိုကြီးရဲ့ သော့တွေကို ထိန်းသိမ်းပြီး ကိုကိုကြီးရဲ့အလုပ်တွေကို ကူမလုပ်နိုင်တဲ့အတွက် မိဝါကို နားလည်ပေးပါ၊ ကိုကိုကြီးရဲ့သော့တွေကို မမက လိုလိုလားလား ထိန်းသိမ်းပေးနိုင်တာကိုပဲ ကိုကိုကြီး ကျေနပ်ပါနော်'

ကျွန်မ ဖားကန့်မြို့လေးကို စွန့်ခွာခဲ့တယ်။ ကိုကိုကြီးက မြစ်ကြီးနားလေဆိပ်အထိ လိုက်ပို့ပေးခဲ့ တယ်။ မြစ်ကြီးနားကနေ မန္တလေး။ မန္တလေးကနေ မကွေးထိ ကျွန်မ ခရီးဆက်ရဦးမယ်။ မကွေးမှာ ခေတ္တ ခဏနားခိုပြီးရင် ကျွန်မ ခရီးဆက်ရပါလိမ့်ဦးမယ်။ ဖေဖေနဲ့မေမေကို မွေးဖွားပေးလိုက်တဲ့ မကွေးမြို့နဲ့ ခပ်လှမ်းလှမ်းက ရွာကလေးတစ်ရွာဆီကိုလေ။

ဖေဖေ့ရဲ့ရွာကလေးမှာ ဖေဖေ့နာမည်နဲ့ ဆောက်လုပ်လှူဒါန်းထားတဲ့ မူလတန်းကျောင်းဆောင်လေး တစ်ဆောင်ရှိတယ်။ အဲဒီကျောင်းကလေးမှာ ကျွန်မအတွက် နေရာတစ်နေရာတော့ ရှိနေလိမ့်မယ် ထင်ပါတယ်။ အဲဒီ ကျောင်းလေးနဲ့ပတ်သက်တဲ့ တစ်စုံတစ်ယောက်က ကျွန်မကို သော့တံတစ်ချောင်းပေးတဲ့ အခါ ကျွန်မ ကျေကျေနပ်နပ်ပဲ လက်ခံယူရလိမ့်မယ်။ ကျွန်မချစ်တဲ့ စာသင်ခန်းတံခါးတွေကို ဖွင့်ဖို့ သော့တစ်ချောင်း ကျွန်မမှာ ရှိနေဖို့လိုတယ် မဟုတ်လားနော်။  ။

သပြေတေးမဂ္ဂဇင်း

မေလ၊ ၂၀၀၀

မေတ္တာဖြင့် - ယုဒါ

07042015 (10:55 PM)