တိုင်တည်ခွင့်

ယု…

            ကိုယ့်လက်ရေးကို မင်းမြင်ရတဲ့အချိန်မှာ တုန်လှုပ်သွားလိမ့်မယ် ထင်တယ်။ မယုံကြည်နိုင်လောက်အောင် အံ့သြသွားလေမလားဘဲ။ ကိုယ် မင်းဆီကို စာရေးဖို့ ရည်ရွယ်ခဲ့တာတော့ မဟုတ်ပါဘူး။ ကိုယ့်ရင်ထဲမှာ ရှိတဲ့ ခံစားချက်တွေဆိုတာထက် ဒုက္ခ သုက္ခတွေကို မင်းဆီမှာ ဖွင့်ဟပြောဖို့ဆိုတာ မင်းအတွက် မတရားဘူးလို့ထင်တယ်။ ကိုယ်ဟာ မင်းကို အဖန်ဖန်တလဲလဲ နာကျင်မှုတွေ ပေးနေတဲ့သူ မဖြစ်ချင်ပါဘူး။ အနည်းဆုံးတော့ ကိုယ် မြိုသိပ်ထားနိုင်ရမှာပေါ့။ ဒါပေမဲ့ ယုရယ်၊ ခုချိန်ခါမှာ ကိုယ် စကားတွေ အများကြီးပြောချင်နေတယ်။ ယုမဟုတ်တဲ့ တခြားတစ်ယောက်ယောက်ကို ပြောချင်နေတာ မဟုတ်ဘူး။

            ယုမျက်နှာကိုကြည့်ပြီး ပြောဖို့ဆိုတာ၊ ကိုယ် တွေးကြည့်မိခဲ့ပါသေးတယ် ယု။ နောက်ဆုံးတော့ ကိုယ် စာရွက်နဲ့ ဘောပင်ကိုပဲ ကောက်ကိုင်ခဲ့မိတယ်။ ကိုယ်ရေးနေကျ ဖောင်တိန်ကို ယု မကြိုက်တာ ကိုယ် သတိရနေဆဲပါ။ "ယုဆီကို စာရေးရင် ဘောပင်နဲ့ပဲရေးပါ ကို၊ မင်စိုဆိုရင် ရေထိမခံဘူး။ မျက်ရည်ထိရင်ပဲ စာတွေက ပျက်ကုန်ရော၊ ကို့ကိုလွမ်းရင် ယုက ကိုရေးတဲ့စာတွေ ခဏခဏ ပြန်ဖတ်ဖြစ်လို့ပါ"

            ကိုယ့်စာဟာ ယုကို မျက်ရည်ကျစေဖို့ မဟုတ်ပါဘူး ယု။ ကိုယ့်အပြစ်တွေကို ၀န်ခံဖို့ သက်သက်ပါ ယု။ ကိုယ့်အပြစ်တွေအတွက် ပြစ်ဒဏ်ကျစေတော့ရယ်လို့ ရင်ထဲမှာ ဘယ်တုန်းကမှ မရှိဘူးဆိုတာ ကိုယ်ယုံပါတယ် ယုရယ်။ ကိုယ့်အပေါ် အစဉ်အမြဲ ထောက်ထားငဲ့ညှာတတ်တဲ့ ယုဟာ ကိုယ့်ကို ဘယ်လိုနှစ်သိမ့်မှုမျိုးပေးလေမလဲလို့ ကိုယ် တွေးကြည့်နေမိတယ်။ ယု မှတ်မိဦးမှာပါ။ ယုကို ကိုယ်နှုတ်ဆက်ခဲ့တဲ့ ညနေခင်းလေးတစ်ခုကိုပေါ့။

            "ယှဉ်စရာ နှစ်ခု ရှိလာတဲ့အခါ ကိုယ် ပိုပြီး မက်မောတဲ့အရာတစ်ခုကို ရွေးချယ်ရာမှာ ဓမ္မတာပါပဲကို၊ အဲဒီ ရွေးချယ်မှုအတွက် ကိုယ့်ကို တစ်သက်လုံး ကျေနပ်ပျော်ရွှင်စေချင်တာ ယု ဆန္ဒအမှန်ပါ"

            ယုရဲ့ အပြစ်ကင်းစင်လှတဲ့ မျက်နှာလေးကိုကြည့်ပြီး ကိုယ် တွေဝေသွားခဲ့ဖူးပါတယ်။ ဒါပေမဲ့ ကိုယ့်အတ္တက အနိုင်ယူသွားခဲ့ပြန်တယ်။ "ယုကို တစ်သက်လုံး ကျေးဇူးတင်နေမှာပါ" ဆိုတဲ့ စကားတစ်ခွန်းနဲ့ ကိုယ် ယုကို နှုတ်ဆက်ခဲ့မိတယ်။ အဲဒီတုန်းက ကိုယ်ဟာ ယုကို သနားရကောင်းမှန်း မသိခဲ့ဘူး။ ကိုယ့်ဘာသာလည်း ရှက်ရကောင်းမှန်းမသိခဲ့ဘူး။ ယုနန္ဒာဆိုတဲ့ ချစ်သူတစ်ယောက်ကို လက်လွတ်ဆုံးရှုံးခဲ့တာ နစ်နာမှုတစ်ခုလို့ ကိုယ် မမြင်နိုင်ခဲ့ဘူး။ ကိုယ့်အပေါ် နားလည်မှုအပြည့်ပေးပြီး ကိုယ့်ရဲ့ လွတ်လပ်ခွင့်အပေါ် နည်းနည်းလေးမှ မစွက်ဖက်ခဲ့တဲ့ ယုကို ကိုယ်ကျေးဇူးပဲ တင်တတ်ခဲ့တယ်။ တကယ်တမ်းပြောရရင် ယုမသိအောင် ရွေးချယ်ထားလိုက်ပြီဖြစ်တဲ့ ကိုယ့်ရဲ့ ရွေးချယ်မှုကို ယုက ထိပါးလာမှာ စိုးရိမ်နေခဲ့တာပဲ ရှိတာကိုး။

            ယုမှာ လုပ်ပိုင်ခွင့်တွေ အများကြီးရှိနေခဲ့တာ ကိုယ်သိပါတယ်။ ကိုယ်တို့နှစ်ယောက် ချစ်သူတွေအဖြစ် ငါးနှစ်ကျော်ကာလ တွဲခဲ့ကြပြီးပြီ။ တစ်ချိန်ချိန်မှာ ရန်နောင်စိုးနဲ့ လက်ထပ်မယ့်သူလို့ ယုကို ကိုယ်တို့နှစ်ယောက်လုံးရဲ့ ပတ်ဝန်းကျင်က သတ်မှတ်ခဲ့ပြီးပြီ။ ကိုယ် မိုးသိင်္ဂီနဲ့ မသိကျွမ်းခင် အချိန်ထိပေါ့။ တကယ်တော့ မိုးသိင်္ဂီဆိုတဲ့ နာမည်ကို ယု စကြားဖူးတဲ့အချိန်ဟာ ကိုယ်နဲ့ မိုးသိင်္ဂီ စေ့စပ်ဖို့ ရက်ပိုင်းပဲလိုတော့တဲ့အချိန်ပါ။ ကိုယ့်ရဲ့ပိရိမှုအတွက် ယု အကြီးအကျယ် အံ့သြခဲ့ဖူးတယ်လေ။ အဲဒီတုန်းက ယုရော ကိုယ်ပါ အလုပ်တွေ ရှုပ်နေခဲ့ကြတယ်။ ယုက ၁၀တန်းဖြေမယ့် ကလေးတွေအတွက် အပင်ပန်းခံနေရသလို ယု ကိုယ်တိုင်ဖြေရမယ့် အလုပ်စာမေးပွဲအတွက်လည်း ကြိုးစားနေခဲ့ရတဲ့အချိန်။

            ကိုယ်ကတော့ Ph.D ၀င်ခွင့်အတွက်က နည်းနည်း၊ မိုးသိင်္ဂီအတွက်ကများများ အချိန်ပေးနေရတဲ့အချိန်။ ယုကတော့ မအားတဲ့ကြားကပဲ ကိုယ့်ဆီကို ရောက်ရောက်လာတတ်ခဲ့ပါတယ်။ "ယု ဘာလုပ်ပေးရဦးမလဲ၊ စာကူကျက်ပေးဖို့ လိုသေးလား" လို့ ယု မေးခဲ့တယ်လေ။ မိုးသိင်္ဂီ နေ့စဉ်လိုလို ကိုယ့်ဆီလာနေတာမို့ ယုနဲ့ ဆုံသွားမှာ ကိုယ်စိုးရိမ်နေခဲ့တယ်။ ဒီတော့ ယု စာကျက်ပေးဖို့မလိုကြောင်း ကိုယ် ငြင်းခဲ့မိတယ်။ မဟာသိပ္ပံတက်ခဲ့တဲ့ ကာလတလျှောက် ယုနဲ့အတူ စာကျက်ရတာကို သိပ်ပျော်ရွှင် ကျေနပ်နေခဲ့ဖူးတဲ့ ကိုယ်ဟာ မလုံမလဲစိတ်တွေနဲ့ ကိုယ့်အနားမှာ ယု အချိန်ကြာကြာရှိနေမှာကို ကြောက်နေခဲ့တယ်။

            ကံချင်းမတူလို့ ယုနဲ့ကိုယ် တူတူဖြေဖူးခဲ့တဲ့ တက္ကသိုလ်နည်းပြဆရာအလုပ်ကို ကိုယ် စောပြီးရခဲ့ပေမယ့် တကယ်တမ်း စာသင်ကောင်းတာက ယုပါလို့ ကိုယ် ပြောခဲ့ဖူးပါတယ်။ အဲဒီလို ပြောရင်တော့ ယု ပါးချိုင့်လေးတွေ ခွက်ဝင်အောင် ပြုံးရယ်ရင်း ကျေနပ်နေတယ်နော်။

            "အဲဒါတော့ ဟုတ်တယ်၊ တခြားသူတွေနဲ့တော့ မယှဉ်ပါဘူး။ ကိုနဲ့ပဲ ယုက ပြိုင်မှာ။ ယုက သူများကို လက်ဆင့်ကမ်းပေးတဲ့ အရည်အချင်းမှာ ကို့ထက် ပိုကျွမ်းကျင်တယ်။ ကိုယ်က သူများပေးတာကို အကုန်ရအောင် ယူတတ်တယ်။ သင်ယူဖို့လွယ်တယ်။ ဖြန့်ဝေဖို့ကျတော့ ဘယ်လိုပြောရမလဲ၊ ကိုယ်နားလည်သလောက် သူများနားလည်အောင် မရှင်းပြနိုင်ဘူး ဖြစ်နေတယ်။ ဒီတော့ ကိုယ် ဆရာလုပ်ဖို့ မကောင်းဘူး။ ဘယ်လိုလဲ ကိုယ်နဲ့ယုတို့ နေရာချင်းလဲရအောင်လေ"

            ကိုယ် မှတ်မိနေဆဲပါ ယု၊ အလုပ်စာမေးပွဲ အောင်စာရင်းတွေထွက်တော့ ယု နာမည်ပါမလာတဲ့အခါ ယု ၀မ်းပန်းတနည်း ငိုခဲ့တာလေ။ ပြီးတော့ ယု မျက်ရည်သုတ်ရင်း "ယု ဒီလိုငိုနေလို့ ဘယ်တရားပါ့မလဲနော်။ ကို အောင်တာကိုပဲ ယု ပျော်နေသင့်တာပေါ့။ ယု တကယ်ပြောတာပါ ကိုရဲ့၊ ကို အလုပ်ရတာကို ယု တကယ်ပျော်ပါတယ်။ ကို အလုပ်ရတာ ယု အရမ်းပျော်ပါတယ် ကို" ပျော်ခြင်းတစ်ဝက်၊ ၀မ်းနည်းခြင်းတစ်ဝက်နဲ့ ယောက်ယက်ခတ်နေတဲ့ ငိုမဲ့မဲ့ အပြုံးမျက်နှာလေးကို ကိုယ် မြင်ယောင်နေဆဲပါ ယု။ နောက်တော့လည်း စိတ်ဓာတ်ကြံ့ခိုင်ထက်မြက်တဲ့ ယုဟာ ကိုယ် မနှစ်သိမ့်ခင်မှာ ယု ဘာသာ ပြန်နှစ်သိမ့်ပြီး ကျေနပ်နေခဲ့ပြန်ပါရော။

            "ဒီတစ်နှစ်မရတော့လည်း နောက်နှစ်တွေ ရှိသေးတာပဲ ကိုရယ်၊ ဒီနှစ် ယု ၁၀တန်းကလေး ၃ ယောက် စာသင်ဖို့ လက်ခံထားတာ ရှိတယ်လေ။ နောက် ၂ နှစ် ၃ နှစ် မှ အလုပ်ဝင်ရင်တောင် ယုက စာသင်တဲ့နေရာမှာ သမ္ဘာကြီးဖြစ်နေပြီ ဆရာ။ အဲဒီအခါ ကိုနဲ့ယု ပြိုင်မယ်လေ။ ယုအတန်းက ကျောင်းသားနဲ့ ကို့အတန်းက ကျောင်းသား ဘယ်သူ ပိုများသလဲလို့။"

            ယုဟာ ပြောတဲ့အတိုင်း လုပ်နိုင်တဲ့သူပါ။ ခုဆိုရင် ယုနန္ဒာအတန်းတွေဆို တကယ် ဆရာမကြီးအတန်းကျနေတာပဲ၊ တန်းလုံးပြည့်ဆိုတဲ့ သတင်းစကားတွေ ကိုယ်ကြားခဲ့ရပါပြီ ယု။

            "ရန်ကုန် ရန်ကုန်နဲ့ လူတွေက ဖြစ်နေလိုက်ကြတာ၊ ယုတော့လေ ဘယ်ဒေသကကျောင်းပဲဖြစ်ဖြစ် သွားလိုက်ချင်တာပဲ။ နယ်မှာဆို Lecture ခန်းတွေ စောဝင်ရမှာ ကိုရဲ့။ ယုနဲ့ကို တက္ကသိုလ်၊ ကောလိပ် တစ်ခုတည်းရရင်တော့လေ သိန်းထီကြီး ဆယ်ခါပေါက်တာထက်တောင် ပျော်ဦးမှာ၊ ဘုရားသိကြားမလို့ ဘယ်နေရာရောက်ရောက် ကိုနဲ့အတူ အလုပ်ဝင်ခွင့်ရပါရစေရှင်"

            ကိုယ်နဲ့အတူ အလုပ်ဝင်ခွင့်ရဖို့ကို ယု သိန်း ၃၀၀ ထီပေါက်တာထက် ပိုမက်မောခဲ့တာ ကိုယ်တကယ်ယုံပါတယ် ယု။

            ယုဟာ ဂုဏ်ပကာသနတွေ၊ ငွေကြေးဥစ္စာတွေကို မြတ်နိုးမက်မောတတ်သူ မဟုတ်ဘူးဆိုတာ ကိုယ် ယုံပါတယ်။ ယုသာ ဂုဏ်ဓနတွေကို မက်ခဲ့ရင် ကိုယ်တို့နှစ်ယောက် မဟာသိပ္ပံ နောက်ဆုံးနှစ်အတွက် စာတမ်းပြုစုတော့ ယုကိုနှစ်သက်မြတ်နိုးခဲ့တဲ့ လူချမ်းသာ ဆရာတစ်ယောက်ကို ယု ရွေးချယ်နိုင်ခဲ့သားပဲ။

            အဲဒီတုန်းက ကိုယ်ဟာ မနာလိုဝန်တိုမှုတွေနဲ့ ယုကို တားဆီးပိတ်ပင်မှုတွေ အမျိုးမျိုးလုပ်၊ အမိန့်တွေထုတ်လို့ မဆုံးနိုင်အောင် ရှိခဲ့တယ်။

            ကိုယ်မဟုတ်ဘဲ တခြားတစ်ယောက်ကို ယု ရွေးချယ်သွားမှာ စိုးကြောက်ခဲ့တယ်။ ယုအတွက် ကိုယ်က ဘာတွေ ဘယ်လောက်ထိ လုပ်ပေးနိုင်သလဲ။ ဘယ်နေရာမှာ ဘယ်လောက်တောင် ကောင်းနိုင်သလဲလို့ ကိုယ့်ဘာသာ ပြန်မေးကြည့်ဖို့လည်း ကိုယ် သတိမရခဲ့ဘူး။ ကိုယ်ဟာ ယုဘေးမှာ နေပြီး ကိုယ့်ကိုကိုယ် တခြားသူတစ်ယောက်နဲ့ ယှဉ်မကြည့်တတ်ခဲ့ဘူး။ မိုးသိင်္ဂီ ကိုယ့်အနားရောက်မလာသေးခင်အချိန်ထိပေါ့ ယုရယ်။ အဲဒီနောက်တော့ ကိုယ်ဟာ ကိုယ့်ကိုကိုယ်ထက် ကိုယ့်ဘေးမှာရှိနေတဲ့လူတွေကို ယှဉ်ကြည့်တတ်သူ ဖြစ်လာခဲ့တယ်။ ကိုယ့်လောဘတွေ၊ ကိုယ့်အတ္တတွေက ကိုယ့်ဘ၀ကို ပြောင်းလဲဖန်တီးခဲ့တာပါ ယု။

            ကိုယ် မိုးသိင်္ဂီကို ရွေးချယ်ခဲ့တယ်။ ကိုယ့်ကိုသိပ်ချစ်တဲ့ ယုကို ပစ်ပယ်ထားရစ်ပြီး မိုးသိင်္ဂီဘ၀ထဲကို ဇွတ်တိုးဝင်ခဲ့တယ်။ ယုရဲ့ခံစားချက်၊ ယုရဲ့ရပ်တည်မှုနဲ့ ကိုယ့်အပေါ်ထားတဲ့ သဘောထားအားလုံးကို ကိုယ် လျစ်လျူရှုခဲ့တယ်။ ကိုယ်ဟာ ကိုယ်ကိုယ်တိုင်ရဲ့ ခံစားချက်အစစ်အမှန်ကိုတောင် ဥပေက္ခာပြုခဲ့မိသူပါ။ ကိုယ် ၀န်ခံပါရစေ ယု။ အဲဒီအချိန်တုန်းက ကိုယ့်ဦးနှောက်ထဲမှာ မိုးသိင်္ဂီဆိုတာ ယုနန္ဒာထက် အစစအရာရာ သာလွန်တဲ့ မိန်းမတစ်ယောက်ဆိုတဲ့ ဆုံးဖြတ်ချက်တစ်ခုပဲ ရှိနေခဲ့တာကိုပေါ့။ မိဘနှစ်ပါးမရှိတော့ပေမယ့် စီးပွားရေးလုပ်ငန်းတစ်ခုကို အောင်အောင်မြင်မြင် လုပ်ကိုင်နိုင်စွမ်းတဲ့ မိန်းမတစ်ယောက်အဖြစ် ရုပ်ရည်ချောမောလှပတဲ့ အမျိုးသမီးတစ်ယောက်အဖြစ်၊ သွက်လက်ထက်မြက် လူဝင်ဆံ့လှတဲ့ မိန်းမတစ်ယောက်အဖြစ် မိုးသိင်္ဂီအပေါ် အထင်ကြီးခဲ့တယ် ယု။ ကိုယ်ဟာ မိန်းမတစ်ယောက်ကို အထင်ကြီးမှုတစ်ခုတည်းနဲ့ ရွေးချယ်လက်ထပ်ခဲ့တဲ့ ခပ်ညံ့ညံ့ယောက်ျား တစ်ယောက်ပါ။

            မိုးသိင်္ဂီနဲ့ ယုကို မိတ်ဆက်ပေးခဲ့ချိန်က ကိုယ့်ရဲ့ သူငယ်ချင်းကောင်း တစ်ယောက်အဖြစ် ကိုယ့်ဘေးမှာ ဣနြေ္ဒရရ အပြုံးလေးနဲ့ ယု ရပ်တည်ပေးခဲ့တာကို ကိုယ် ဘယ်တော့မှ မမေ့နိုင်ပါဘူး။ ကိုယ် မတရားခဲ့ပါဘူး ယု။ တကယ်တော့ ကိုယ်ဟာ ယုနဲ့ထိုက်တန်တဲ့ ယောက်ျားတစ်ယောက်မဟုတ်လို့သာ ယုနဲ့ လွဲခဲ့သူပါ။ မိုးသိင်္ဂီနဲ့ ကိုယ်ဟာ ကျောင်းသားဟောင်းများ မိတ်ဆုံစားပွဲတစ်ခုမှ စတင်တွေ့ခဲ့ကြတယ်။ ၅နှစ်ကျော်ကာလ လက်တွဲခဲ့ဖူးတဲ့ ချစ်သူကို စွန့်လွှတ်ပြီး ငါးလတာ ကာလတိုလေးအတွင်း ရင်းနှီးပတ်သက်ခွင့်ရခဲ့တဲ့ မိန်းမတစ်ယောက်ကို ကိုယ့်စိတ်သဘောနဲ့ကိုယ် လက်ထပ်ယူခဲ့တယ်။ ပြောရရင်တော့ ယု ငိုကြွေးနေမှာဖြစ်တဲ့အချိန်တွေမှာ ကိုယ် ကျေနပ်နေခဲ့တယ်။ ကိုယ်လိုချင်တဲ့ဘ၀၊ ကိုယ်မက်မောတဲ့ဘ၀ကို မိုးသိင်္ဂီက ပေးနိုင်လိမ့်မယ်လို့ ကိုယ်ထင်ခဲ့တယ်။

            "ဆရာ" လို့ ခေါ်တဲ့ မိုးသိင်္ဂီရဲ့ အသံနဲ့ ဦးညွှတ်မှုအပေါ် ကိုယ် သာယာယစ်မူးခဲ့မိတယ်။ ပြီးတော့ ကိုယ့်ရဲ့မိတ်ဆွေ အပေါင်းအသင်း မိသားစုတွေကြားမှာ ကိုယ် မော်ကြွားနေချင်ခဲ့တယ်။ ဘ၀ကို ခက်ခဲပင်ပန်းစွာ ရုန်းကန်ဖို့ ကြောက်ခဲ့တဲ့ကိုယ်ဟာ သာတောင့်သာယာရှိတဲ့ Ready Made ဘ၀လေးထဲမှာ ပျော်ရွှင်ကျေနပ်နိုင်လိမ့်မယ်လို့ ထင်ခဲ့တယ်။ ကိုယ်မှားခဲ့ပါတယ် ယု။ ကိုယ့်အထင်တွေ၊ မျှော်လင့်ချက်တွေ တက်တက်စင် လွဲခဲ့ရတာပါ။

            အပေးအယူဆန်တဲ့ ကိုယ်တို့နှစ်ယောက်ရဲ့ အိမ်ထောင်ရေးဟာ စတင်ပြီဆိုကတည်းက အက်ကြောင်းပါလာခဲ့တာပါ။ နာမည်ကြီးဟိုတယ်တစ်ခုမှာ ကျင်းပခဲ့တဲ့ ကိုယ်တို့နှစ်ယောက်ရဲ့ မင်္ဂလာပွဲကတော့ ထည်ဝါခမ်းနားမှုတွေနဲ့ လှလှပပ ပြီးဆုံးခဲ့တာပါပဲ။ မင်္ဂလာပွဲမှာ ကိုယ့်ရဲ့မိတ်ဆွေ အပေါင်းအသင်းတွေ နည်းပါးရကောင်းလားရယ်လို့ အားငယ်မှုလည်း ကိုယ့်မှာမရှိခဲ့ပါဘူး။ ကိုယ့်မိတ် သူ့မိတ် ယှဉ်ကြည့်စရာလို့လည်း ကိုယ် မသိခဲ့ပါဘူး။ ဒါပေမဲ့ ယုရယ်၊ မင်္ဂလာပွဲပြီးလို့ ငွေကြေးကိန်းဂဏန်းတွေကို စာရင်းလုပ်တွက်ချက်ကြည့်တဲ့အခါမှာတော့…

            သူ့ဘက် ကိုယ့်ဘက် မညီမျှလွန်းတဲ့ ကိန်းဂဏန်းတွေရဲ့ကြားမှာ ကိုယ် အနာတရ စဖြစ်သွားခဲ့ရပါတယ် ယု။ ပြောရရင် ကိုယ်ဟာ မတွက်တတ်တဲ့လူ မဟုတ်ပါဘူး ယု။ ရန်နောင်စိုး ဘယ်လောက်အတွက်အချက် ကောင်းလဲဆိုတာ ယု ကောင်းကောင်းသိခဲ့မှာပါ။ ဒါပေမဲ့ ကိုယ် ထည့်မတွက်ခဲ့တဲ့ ကိစ္စရပ်တွေဟာ ကိုယ့်ကို ပြန်တွက်လာခဲ့တယ် ယု။

            လိုင်းကားတိုးစီးရမှာစိုးလို့ ချောင်တဲ့ကားကိုမှ အချိန်ယူစောင့်စီးတတ်ခဲ့တဲ့ကိုယ်ဟာ မိုးသိင်္ဂီမောင်းပို့တဲ့ ကိုယ်ပိုင်ကားကို သက်သောင့်သက်သာစီးပြီး ကျောင်းလာခွင့်ရခဲ့တယ်။ ဘာကြာလို့လဲ ယုရယ်။ တစ်လလောက်ရှိတာနဲ့ မိုးသိင်္ဂီဆီက ညည်းချင်းရှည်တွေကို ကိုယ်ကြားခဲ့ရပါရောလား။ မနက်မိုးလင်းက မိုးချုပ် ကိုယ်ပိုင်ကားကို ကိုယ်တိုင်မောင်းပြီး စီးပွားရေးလုပ်နေတဲ့ မိုးသိင်္ဂီအတွက် ကိုယ်ဟာ ၀န်ထုပ်ဝန်ပိုးကြီးတစ်ခု ဖြစ်လာခဲ့တယ်။ ကားမမောင်းတတ်တဲ့ကိုယ့်ကို ကားမောင်းသင်ဖို့ ပြောလာပြန်တော့ ကိုယ် ကားမောင်းသင်ခဲ့တာပါပဲ။ အသက် ၃၀ ပြည့်တဲ့အထိ ကိုယ်ပိုင်ကားနဲ့ မရင်းနှီးဖူးတဲ့လူတစ်ယောက်အတွက် မိုးသိင်္ဂီရဲ့ အဖိုးတန် ဇိမ်ခံကားကြီးကို ရဲရဲတင်းတင်းမောင်းနှင်ဖို့ဆိုတာ ပင်ပန်းခက်ခဲနေတယ် ယု။

            မိန်းမသားတွေ ကားမောင်းနေတဲ့ခေတ်ကြီးထဲမှာ ယောက်ျားတစ်ယောက် ကားမောင်းတတ်ဖို့ ဘာခက်သလဲလို့ ပြောစရာရှိပါတယ်။ ဒါပေမဲ့ ယု၊ အတတ်ပညာတစ်ခုဆိုတာ အတွေ့အကြုံရယ်၊ အချိန်ကာလရယ် မပါဝင်ဘဲ ရှင်သန်ဖို့ဆိုတာ ခက်ခဲတတ်စမြဲ မဟုတ်လား။ ကားမောင်းခြင်း အတတ်ကို ကိုယ် မကျွမ်းကျင်သေးတာမို့ မိုးသိင်္ဂီ အခက်အခဲမဖြစ်ရအောင် ကိုယ့်ကျောင်းကို လိုင်းကားစီးပြီး ကိုယ်သွားခဲ့တယ်။ ကိုယ်ပိုင်ကားရှိလျက်နဲ့ လိုင်းကားစီးတာ လူမြင်မကောင်းပါဘူးလို့ ဆိုလာပြန်တယ် ယု။ ကားကိစ္စနဲ့ ပတ်သက်ပြီး သူနဲ့ကိုယ် မပြေမလည် ဖြစ်ကြရပြန်တယ်။

            မိုးသိင်္ဂီအလုပ်က အချိန်မရွေး သူ့အနားမှာ ကားရှိနေမှ အဆင်ပြေတယ်။ ဒီကြားထဲက ကိုယ့်ကို ကြားဖောက် ကျောင်းအကြိုအပို့လုပ်လာရတဲ့အခါ သူ့လုပ်ငန်းတွေ ထိခိုက်မှု ရှိလာခဲ့တယ်။ ကားမောင်းသမားတစ်ယောက် ခေါ်ထားလိုက်ရင် ပြီးရောပေါ့လို့ ယု ထင်လေမလားဘဲ။ တချို့ပြဿနာတွေက ဘယ်လိုနည်းနဲ့မှ ဖြေရှင်းလို့မရတာတွေ ရှိသေးတယ် ယု။ ကိုယ့်ကိုအထင်သေးလာပြီဖြစ်တဲ့ မိုးသိင်္ဂီဟာ ကိုယ့်အပေါင်းအသင်း ကိုယ့်အသိုင်းအ၀ိုင်းကိုပါ အထင်မကြီးနိုင်ဘူး ဖြစ်လာခဲ့တယ်။

            ကိုယ့်မိတ်ဆွေ သူငယ်ချင်းတွေထဲမှာ သူရောင်းတဲ့ ရတနာပစ္စည်းကို ၀ယ်နိုင်သူမရှိသလောက် ရှားနေတာကပဲ ကိုယ့်မှာအပြစ်ကြီးတစ်ခု ဖြစ်နေခဲ့တယ် ယု။ ယုကတော့ ရယ်ချင်နေမလားဘဲ။ "စိန်ဟာ ဆန်မှ မဟုတ်ဘဲ မိုးရယ်" လို့ ကိုယ်ပြောခဲ့တာကို သူကနာပြန်သေးတယ် ယု။ ကိုယ်တို့ရတဲ့ လစာငွေနဲ့ စိန်ဝယ်ဖို့ ကိစ္စဟာ၊ ဒါဆိုရင် ဒီအလုပ်ကို ဘာလို့ လုပ်နေသလဲလို့ ဆိုပြန်တယ် ယု။

            တက္ကသိုလ်ဆရာဆိုတာ သူဌေးတွေလို့ သူ ထင်မှတ်ခဲ့တယ်နဲ့တူပါရဲ့။ PhD တက်နေတဲ့ ကိုယ့်ကို ဒေါက်တာဘွဲ့ရရင် လစာဘယ်လောက်တိုးမလဲလို့ မေးလာတဲ့အခါ၊ ကိုယ် သက်ပြင်းသာ ချနေရတော့တယ် ယု။ ငွေနောက်သည်းကြီးမည်းကြီး လိုက်နေတဲ့ မိန်းမတစ်ယောက်။ အဲဒီမိန်းမကိုမှ အထင်ကြီးမက်မောမိခဲ့တဲ့ ခပ်ထူထူ ယောက်ျားတစ်ယောက်။ ကိုယ်တို့ ဘာကြောင့် ဆရာလုပ်သလဲဆိုတာ သူ စဉ်းစားမရအောင် ဖြစ်နေခဲ့တယ်။

            ကိုယ့်ရဲ့ ရည်ရွယ်ချက်တွေ၊ မျှော်လင့်ချက်တွေကို ပြောပြဖို့ရာတောင် အခွင့်မသာခဲ့ပါဘူး။ ကိုယ် မျှော်လင့်မထားတဲ့ မိသားစုဘ၀ဆိုတာလည်း ပိုလို့သာ ဝေးလာခဲ့ပါတယ်။ ၁၀နှစ်ကျော်ကျော် ကလေးမလေးတစ်ယောက် ချက်ကျွေးတဲ့ ထမင်းကိုစားပြီး ကိုယ် ရောင့်ရဲနေခဲ့ရတယ်။ ကြေးအိုး၊ ခေါက်ဆွဲကြော်၊ ကြာဆံကြော် စတဲ့ အစားအသောက်တွေ၊ တရုတ်ထမင်းဟင်းတွေကို ပါဆယ်ဝယ်လာပြီး မိုးသိင်္ဂီက ကိုယ့်ကိုကျွေးတဲ့အခါ ယု သုပ်ကျွေးဖူးတဲ့ လက်ဖက်သုပ်၊ မြင်းခွာရွက်သုပ်၊ ရှောက်သီးသုပ်လေးတွေကို ကိုယ် သတိရနေခဲ့တယ်။

            "ကျွန်မ ထမင်းဟင်း မချက်တတ်ဘူးနော် ဆရာ" ဆိုတဲ့ စကားနဲ့ သူက ကိုယ့်ကို အနိုင်ပိုင်းထားပြီးသား ဖြစ်နေတယ် ယု။ လောကကြီးမှာ ငွေကြေးဥစ္စာနဲ့ အလဲအထပ် လုပ်ယူလို့မရနိုင်တဲ့အရာ သိပ်မများပါဘူးလို့ ကိုယ်ထင်ခဲ့ဖူးတယ် ယု။ ငွေကြေးဥစ္စာနဲ့ လဲလှယ်ယူလို့မရတဲ့အရာတွေ မထင်မှတ်နိုင်လောက်အောင် များနေမှန်း ကိုယ်သိလာရတဲ့အချိန်မှာ ကိုယ်တို့နှစ်ယောက်ရဲ့ အိမ်ထောင်ရေးအက်ကြောင်းဟာ ဖုံးဖိမရအောင် အထင်းသားပေါ်နေခဲ့ပါပြီ။

            ဘယ်သူ့ကိုမှ ရင်ဖွင့်စရာမရှိ၊ ချောင်ပိတ်မိနေတဲ့ဘ၀ထဲမှာ အရက်ကို သူငယ်ချင်းဖွဲ့ခဲ့မိတဲ့ ကိုယ့်ကို ယု အပြစ်တင်ချင်လေမလားပဲ။ အရက်ကလေးနည်းနည်းဝင်လာတာနဲ့ အာသွက်လျှာသွက် ဖြစ်လာတဲ့ ကိုယ်ဟာ မိုးသိင်္ဂီကို ဝေဖန်ရေးလုပ်ရင်း ထွက်ပေါက်ရှာခဲ့မိပြန်တယ်။ ကျောင်းဆရာလုပ်ပြီး အရက်သောက်ရကောင်းလားရယ်လို့ မိုးသိင်္ဂီ ဒေါသပုန်ထ ပေါက်ကွဲတော့တာပေါ့။ လူတစ်ယောက်ကို တကယ် အထင်မကြီးနိုင်ဘဲနဲ့ အထင်ကြီးဟန်ဆောင်ခဲ့တဲ့ မိုးသိင်္ဂီကို ကိုယ်စိတ်ပျက်လာခဲ့တယ်။ ပြီးတော့ အထင်မကြီးသင့်တဲ့အရာကိုမှ အထင်ကြီးမိခဲ့တဲ့ ကိုယ့်ကိုကိုယ်လည်း မုန်းတီးလာမိတယ်။

            ကိုယ်ဟာ မိုးသိင်္ဂီကို မချစ်ခဲ့လို့လား၊ မိုးသိင်္ဂီက ကိုယ့်ကို မချစ်ခဲ့လို့လား။ မုန့်လုံးစက္ကူကပ်နေခဲ့တယ် ယု။ နေမကောင်းဖြစ်ပြီး အိပ်ရာထဲက မထနိုင်လို့ အနားယူနေရတဲ့ ကိုယ့်အနားမှာ သူတစ်နာရီပြည့်အောင် မနေနိုင်ခဲ့ဘူး ယု။ ကိုယ့်ရင်ထဲက နာကျင်မှုတွေဟာ တနင့်တပိုး တိုးသာလာတယ်။

            ကိုယ် ငွေမက်ခဲ့ဖူးပါတယ် ယု။ ယုမှာ မရှိတဲ့အရာတွေနဲ့ မိုးသိင်္ဂီဆီမှာ ရှိတဲ့အရာတွေကို ယှဉ်ကြည့်ခဲ့ဖူးပါတယ်။ ကိုယ် မသိခဲ့တာတော့ မဟုတ်ပါဘူး ယုရယ်။ နောက်ဆုံးနှစ် စာမေးပွဲဖြေခါနီး ကိုယ့်မှာ ငွေမရှိတော့ ယုရဲ့ တစ်ကွင်းတည်းသော လက်စွပ်လေးကို ချွတ်ရောင်းပြီး ကိုယ့်ကို ဖြည့်ဆည်းပေးခဲ့တဲ့ အဖြစ်အပျက်လေးကို မှတ်မိနေဆဲပါ ယု။ "ယု လက်စွပ် ဘာလို့မ၀တ်သလဲ" လို့ မေးတော့ လက်ဆေးရင်း ကျွတ်ကျပျောက်သွားတယ်လို့ ယု ဖြေခဲ့တယ်လေ။ ယုရယ် ပြန်တွေးမိရင် ကိုယ့်ကိုကိုယ် ရွံမုန်းလာမိပါတယ်။

            ကိုယ့်အပေါ် ယု အများကြီးကောင်းခဲ့ဖူးလျက်နဲ့ ကိုယ့်ဦးနှောက်ထဲ ထင်ထင်ရှားရှားရှိနေတာက ယုရဲ့ အားနည်းချက်တွေပဲ ဖြစ်နေခဲ့တယ်။ ယုမှာ မရှိတာတွေကို ဖြည့်ဆည်းပေးနိုင်ဖို့ ကိုယ် မကြိုးစားခဲ့မိဘူး။ ကိုယ့်ရဲ့လိုအပ်ချက်တွေကို ဖြည့်ဆည်းပေးနိုင်မယ့် တစ်စုံတစ်ယောက်ကိုပဲ ရှာဖွေခဲ့မိတယ်။ အပေါ်ယုံ ဂုဏ်ပကာသနာတွေကိုမှ ကိုယ် အထင်ကြီး မက်မောခဲ့တယ်။ ရယ်စရာကောင်းပါတယ် ယု။ ကိုယ်က မိုးသိင်္ဂီရဲ့ အသိုင်းအ၀ိုင်းကို ငွေမျက်နှာတစ်ခုပဲ ကြည့်သူတွေလို့ သုံးသပ်လာမိတဲ့အချိန်မှာ သူတို့ကလည်း ကိုယ့်ကို ပညာတစ်ခုသာရှိပြီး ဘာတစ်ခုမှမရှိတဲ့ ဟန်ဆောင်အခွံသမားရယ်လို့ သတ်မှတ်လာခဲ့ကြတယ်။

            ကိုယ့်လို ကျူတာပေါက်စတစ်ယောက်က မဟာရန်ကုန်လို မြို့ကြီးမှာ ဆရာ့ဆရာကြီးတွေကိုယှဉ်ပြီး ဘယ်လိုလုပ် ငွေရှာနိုင်ဦးမလဲ ယု။ ပညာရပ်တစ်ခုကို အသုံးချပြီး စီးပွားရေးလုပ်ဖို့ဆိုတာ အချိန်တစ်ခုတော့ လိုဦးမှာ မဟုတ်လား။ မိုးသိင်္ဂီကတော့ ကိုယ့်ကို အချိန်ကုန် ငွေကုန်ခံပြီး ပင်ပန်းမှုကို ရှာယူနေသူလို့ ထင်နေခဲ့တယ်။ ကိုယ့်ရဲ့ ပညာကို အသိအမှတ်ပြုမှုဟာ မင်္ဂလာဆောင်ဖိတ်စာ တစ်ခုပေါ်မှာပဲ ရှိခဲ့တယ်ယု။

            ကိုယ်ဟာ သူအားကိုး အထင်ကြီးမိခဲ့သလို တကယ့်လက်တွေ့ဘ၀ထဲမှာ အားကိုးလို့ မရသူပါလားလို့ သူ ထင်မှတ်လာတယ်။ အရှည်ကို တွေးမကြည့်မိခဲ့တဲ့ ကိုယ်ဟာ အနာဂတ်ကို ကြိုမကြည့်တတ်သူနဲ့ ဆုံခဲ့ရတာပါ။ ကိုယ်နဲ့သူရဲ့ အကြီးမားဆုံး ပြဿနာကတော့ သူဆင်ပေးထားတဲ့ စိန်လက်စွပ်တစ်ကွင်း ပျောက်သွားခဲ့ခြင်းပါပဲ။ စိန်ကိုးလုံးပါတဲ့ အဖိုးတန်စိန်လက်စွပ်ဟာ ဘယ်နေရာမှာ ချွတ်ခဲ့မိမှန်းမသိဘဲ ရှာမရအောင် ပျောက်ဆုံးသွားခဲ့တယ်။ ဒီစိန်လက်စွပ်ဟာ ကိုယ်မက်မောလို့၊ ကိုယ်ဝတ်ချင်လို့ ၀တ်ထားတဲ့ စိန်လက်စွပ် မဟုတ်ပါဘူး။ ကိုယ်ဟာ နာရီတစ်လုံးကလွဲပြီး ဘာတစ်ခုမှ အပိုဝတ်ချင်တဲ့လူမဟုတ်ဘူးဆိုတာ ယု သိပါတယ်။ ဒါပေမဲ့ ကိုယ့်အလုပ်အကိုင်နဲ့ ဂုဏ်ရှိအောင် ၀တ်ပါလို့ ဇွတ်ဝတ်ခိုင်းတာကြောင့် မိုးသိင်္ဂီဆန္ဒအတိုင်း ကိုယ် ၀တ်ထားခဲ့တာပါ။ သူ ဆင်ထားတဲ့ပစ္စည်းကို တန်ဖိုးမထားရကောင်းလားရယ်လို့ သူက စိတ်ဆိုးတဲ့အပြင် ပစ္စည်းရဲ့တန်ဖိုးကိုပါ တွက်ချက်ပြခဲ့တယ်။ စိန်တွေရဲ့တန်ဖိုးကို ကိုယ် နားမလည်ပါဘူး ယု။

            သူဆင်ထားတဲ့ စိန်လက်စွပ်ဟာ ကိုယ့်ရဲ့ ၁၀နှစ်စာ ၀င်ငွေမကတန်တယ်လို့ ဆိုလာခဲ့တယ်။ ကိုယ့်ရဲ့ဂုဏ်သိက္ခာတွေ မာနတရားတွေဟာ စိန်လက်စွပ်တစ်ကွင်းလောက်တောင် အရေးမပါနိုင်လောက်အောင် ဖြစ်သွားခဲ့တယ်။ ဘာအတွက် သူ့ကို လက်ထပ်ခဲ့တာလဲလို့ ကိုယ် မစဉ်းစားတတ်အောင် ဖြစ်လာတယ်။ ချိုးနှိမ်ထားခဲ့တဲ့ ကိုယ့်မာန၊ ကိုယ့်ဂုဏ်သိက္ခာတွေကို ထပ်တလဲလဲ စော်ကားခံရတဲ့အခါ ကိုယ်ဟာ မြွေပွေးတစ်ကောင် ဖြစ်သွားခဲ့ရတယ်။ ငွေဟာ အရာရာတိုင်းကို ဖန်တီးလို့မရဘူးဆိုတာ သူ သိအောင် ကိုယ် ပြောပြခဲ့ပါတယ်။

            "ငွေဟာ အရာရာတိုင်းကို ဖန်တီးလို့မရဘူးဆိုပေမယ့် ရှင် ကျွန်မကို လက်ထပ်ခဲ့တာတော့ ငွေကြောင့်ပဲ မဟုတ်လား" လို့ သူက ဆိုလာတယ်။ ကိုယ် မိုးသိင်္ဂီရဲ့ ပါးကို ခပ်ကြမ်းကြမ်း ဖြတ်ရိုက်ချပစ်ခဲ့တယ် ယု။ "ရှင့်လုပ်စာကို တစ်ပြားတစ်ချပ်မှမစားတဲ့ မိန်းမတစ်ယောက်ကိုတောင် ရှင်က ပါးရိုက်ရဲတယ်ပေါ့" ဆိုတဲ့ နာကြည်းဒေါသနဲ့ မိုးသိင်္ဂီ ကိုယ့်ကို မုန်းတီးသွားခဲ့တယ်။ မိန်းမတစ်ယောက်ရဲ့ပါးကို စိတ်လိုက်မာန်ပါ ရိုက်ပစ်ခဲ့မိတဲ့အတွက်  ကိုယ် နောင်တရနေတာ မဟုတ်ပါဘူး ယု။ ဒါဟာ ကိုယ်တို့နှစ်ယောက်ရဲ့ ဇာတ်သိမ်းခန်းဖြစ်လို့ ကိုယ် ကျေနပ်လိုက်ပါပြီ။ ဆက်ရန်မရှိတော့တဲ့ ဇာတ်သိမ်းပိုင်းဝတ္ထုကြီးဟာ ဒီနေရာမှာတင် ပြီးဆုံးသွားခဲ့ပါပြီ။ မိုးသိင်္ဂီရဲ့ အိမ်ပေါ်ကနေ အပြီးတိုင်ဆင်းခဲ့ပါပြီ။

            ကိုယ့်ကို အထင်အမြင်သေးစွာ အခါခါ စော်ကားဖူးခဲ့တဲ့ မိန်းမတစ်ယောက်ကို ကိုယ်လွမ်းနေစရာ မလိုတော့ပါဘူး။ ကိုယ်တို့နှစ်ယောက်ကြားမှာ လွမ်းရလောက်တဲ့ သံယောဇဉ်လည်း မရှိခဲ့လို့ ဖြစ်ပါလိမ့်မယ်။ ကိုယ့်ရင်ထဲမှာ ခါးသီးနာကြည်းမှုတွေပဲ ရှိနေခဲ့တယ်။ ခံရခက်တဲ့ အောင့်သက်သက်ဝေဒနာတွေဟာ ကိုယ့်ရင်ထဲမှာ ကျန်ရစ်ခဲ့တယ်။ ခြေဦးတည့်ရာကိုသာ ကိုယ် လျှောက်သွားနေချင်တယ် ယု။ မိုးသိင်္ဂီနဲ့ ဝေးချင်တယ်။ လူတွေနဲ့ ဝေးချင်တယ်။ ကိုယ့်အရှုံးတွေကို လူတွေ ဝေဖန်ကဲ့ရဲ့ကြမှာ ကိုယ် စိုးရိမ်တာပေါ့ ယုရယ်။

            ကိုယ် သတိရတမ်းတနေမိတဲ့လူဟာ ယုတစ်ယောက်ပဲ ဖြစ်နေတယ်။ ကိုယ့်အပေါ် ယု ဘယ်လိုဝေဖန်ချက်တွေ ပေးမှာလဲလို့ ကိုယ် သိချင်နေမိတယ်။ ယောက်ျားဆိုတာ လှေကားသုံးထစ်ဆင်းရင် လူပျိုပြန်ဖြစ်တယ်ဆိုတဲ့ စကားမျိုးကြောင့် ကိုယ် အိမ်ပေါ်က ဆင်းလာခဲ့တာ မဟုတ်ပါဘူး။ ကိုယ် တည်ဆောက်ခဲ့တဲ့ အိမ်ထောင်တစ်ခုကို ကိုယ် မဖျက်ဆီးချင်ပါဘူး။ ဒါပေမဲ့ ကိုယ့်မှာ ဒါပေမဲ့တွေ အများကြီးရှိနေခဲ့ပြီ ယု။ ပြန်ပြင်လို့မရတဲ့ အမှားဆိုတာလည်း ကိုယ် သိခဲ့ပါပြီ။ ကိုယ့်ရဲ့အတ္တကြောင့် ကိုယ့်တစ်ကိုယ်လုံးကို အလောင်မြိုက်ခံလိုက်ရခြင်းပဲ မဟုတ်လား။ အတန်းပညာတွေ၊ စာတွေ အများကြီးကို အချိန်တွေအကြာကြီး အကုန်ခံသင်ယူထားပါလျက်နဲ့ပဲ မမှားသင့်တဲ့အမှား၊ မလုပ်သင့်တဲ့အလုပ်မျိုးကို ကိုယ်လုပ်ခဲ့မိတယ်။

            အချစ်ဆိုတာ ဘ၀ရဲ့အသေးငယ်ဆုံး အစိတ်အပိုင်းတစ်ခုလို့ ကိုယ် တွက်ဆခဲ့တယ်။ အချစ်မပါဘဲ တည်မြဲနေတဲ့ အိမ်ထောင်တွေ အများကြီးရှိသေးတယ်လို့ ကိုယ် ယူဆခဲ့တယ်။ ခုတော့ နားလည်မှုဆိုတဲ့ စကားလုံးသုံးလုံးရဲ့ အရေးပါအရာရောက်မှုကို ကိုယ် သိခဲ့ပါပြီ။ သွေးမတော် သားမစပ်တဲ့ လူသားနှစ်ယောက် အမိုးအကာတစ်ခုအောက်မှာ တစ်သက်တာ အတူတွဲနေထိုင်နိုင်ဖို့ဆိုတာ ချစ်ခြင်းမေတ္တာတရားကို အခြေခံတဲ့ နားလည်မှု မရှိမဖြစ် လိုအပ်ပါတယ် ယု။ ချစ်ခြင်းဆိုတဲ့ မျိုးစေ့မပါဘဲနဲ့ နားလည်မှု သစ်ပင်တစ်ပင် ရှင်သန်ဖြစ်ထွန်းလာနိုင်မှာ မဟုတ်ပါဘူး။ ဒါကို ကိုယ့်ဘ၀နဲ့ ရင်းပြီးမှ နားလည်သွားခဲ့ပါပြီ ယု။

            ဒီစာကိုဖတ်ပြီးတဲ့အခါ ကိုယ့်အပေါ် ဝေဖန်ချက်တစ်မျိုးမျိုး ပေးဖြစ်လေမလားဘဲ။ လူမှန်သမျှ ကိုယ်ပြုလုပ်ခဲ့တဲ့ အကြောင်းတရားရဲ့ ရလဒ်ကို မလွဲမသွေ လက်ခံယူရစမြဲပဲ။ ကိုယ့်ရဲ့စာဟာ ယုနန္ဒာဆိုတဲ့ ဣနြေ္ဒရှင်မိန်းမတစ်ယောက်ရဲ့ ဂုဏ်သိက္ခာကို ထိခိုက်စေမယ့်စာတော့ မဖြစ်စေချင်ပါဘူး။ ယုဆီက တစ်စုံတစ်ရာတော့ ရကောင်းပါရဲ့ဆိုတဲ့ မျှော်လင့်ချက်လေးနဲ့ ရေးတဲ့စာ မဟုတ်ဘူးဆိုတာ ယုံစေချင်ပါတယ်။ တစ်ချိန်က ယုအပေါ် ရက်စက်ခဲ့ဖူးတဲ့ လူတစ်ယောက်ဟာ ဒီလိုဇာတ်သိမ်းကိုပဲ ရသွားတယ်ဆိုတာ ယု သိစေဖို့ သက်သက်ပါ။

            ပြီးတော့ အရွယ်ရှိသေးတဲ့ ယုဘ၀အတွက် တစ်စုံတစ်ယောက်ကို ရွေးချယ်လက်ထပ်တဲ့အခါ၊ Sorry ယု၊ ယုနန္ဒာဟာ ကိုယ့်လိုအတ္တမျိုးနဲ့ အိမ်ထောင်တစ်ခု တည်ဆောက်မယ့်သူ မဟုတ်ဘူးလို့ ကိုယ် ယုံပါတယ်။ ဘာပဲဖြစ်ဖြစ်ပေါ့ ယုရယ်။ အနည်းဆုံးတော့ ယုအတွက် မဟုတ်ရင်တောင် ယုကိုချစ်တဲ့ ကလေးတွေအတွက်၊ ရန်နောင်စိုးဆိုတဲ့ ဇာတ်လိုက်ကြီးတစ်ယောက်ကို ပုံပမာပြပြီး တစ်ခုခုတော့ လက်ဆင့်ကမ်းမျှဝေပေးနိုင်မယ် မဟုတ်လား။ တစ်ချိန်တစ်ခါက ယု သိပ်ချစ်ခဲ့ဖူးတဲ့ ချစ်သူတစ်ယောက်ဆိုတာကို လျှို့ဝှက်ပြီး ကိုယ့်အကြောင်းကို ပြောပြနိုင်ပါတယ် ယု။

            ကိုယ် ကျေနပ်ပါတယ် ယုရယ်။ ကိုယ်နဲ့ထိုက်တန်တဲ့အရှုံးကို ကိုယ် လက်ခံရယူတာပဲမို့ နာကျင်မှုတွေအတွက် တစ်စုံတစ်ခုသော အတိုင်းအတာထိ ခံစားရပါလိမ့်ဦးမယ်။ ခွင့်လွှတ်နားလည်နိုင်မှု စွမ်းအားကြီးမားလွန်းလှတဲ့ ယုရင်ထဲက ချစ်ခဲ့ဖူးသူတစ်ယောက်ရဲ့ ကျရှုံးမှုအတွက် ဘယ်လိုမှု ၀မ်းမြောက်ဝမ်းသာ ရှိနေနိုင်မှာ မဟုတ်ပါဘူး။

            ဘယ်သူမပြု မိမိမှုပါ ယု။ ယုဆီက တစ်စုံတစ်ခုကို မျှော်လင့်မှုနဲ့ ဒီစာကို ရေးတာမဟုတ်ဘူး ဆိုတာလေးကိုပဲ ယု ယုံကြည်နိုင်ရင် ကိုယ်ကျေနပ်ပါပြီ။ ကိုယ့်ကို သိပ်ချစ်ခဲ့ဖူးတဲ့ ချစ်သူတစ်ယောက် ရှိခဲ့ဖူးတဲ့အတွက်ပဲ ကိုယ် ကျေနပ်နေမယ်။ ကိုယ်သိပ်ချစ်ခဲ့ဖူးတဲ့ ချစ်သူဟာ အင်မတန်ဖြူစင် မြင့်မြတ်တဲ့ မိန်းမတစ်ယောက်ဖြစ်နေတာကိုပဲ ကိုယ်ကျေနပ်တယ်။ ကိုယ့်အနားမှာ ဘယ်သူမှမရှိတော့တဲ့ ဒီအချိန်မျိုးမှာ ကိုယ့်ရင်ထဲက ယုနန္ဒာဆိုတဲ့ ချစ်သူတစ်ယောက်ကို တိုင်တည်ခွင့်လေးရှိနေသေးတဲ့အတွက်ပါ ယု။ ယု တစ်ယောက် စိတ်ရောကိုယ်ပါ ငြိမ်းချမ်းပျော်ရွှင်စွာနဲ့ အောင်မြင်မှုတွေ ရရှိနိုင်ပါစေ။

           

တစ်ချိန်က ယုရဲ့

ရန်နောင်စိုး

Beauty Max မဂ္ဂဇင်း

၂၀၀၅၊ ဒီဇင်ဘာလ

မေတ္တာဖြင့်

ယုဒါ

23092016 (FRI)