လမင်းဖတ်ဖို့စာ

 (၁)

"၈နာရီ ထိုးတော့မယ် ဖေဖေ"

ဖေဖေ့စားပွဲပေါ်မှာ တင်ထားတဲ့ နာရီပေါက်စလေးကို လှမ်းကြည့်ရှုး ပူစူး မရဲတရဲပြောလိုက်တယ်။ ဒီနေ့ ပူစူး စာမေးပွဲနောက်ဆုံးနေ့လေ။ ၉ နာရီထိုးရင် ပူစူး၊ စာမေးပွဲဖြေရတော့မှာ။ ၈ နာရီထိုးပြီးတာနဲ့ ပူစူး စာကျက်စခန်းသိမ်း၊ ရေချိုး၊ အ၀တ်လဲပြီး ကျောင်းသွားဖို့ပြင်ဆင်နေကျ။ ဒါပေမယ့် "စာတွေ အကုန်နွှေးပြီးပြီလား၊ ကျောင်းသွားဖို့ပြင်တော့" ဆိုတဲ့ ဖေဖေ့အမိန့်ရမှသာ စာကြည့်စားပွဲက ပူစူးခွာရတာပါ။ ဒီနေ့တော့ စာမေးပွဲနောက်ဆုံးနေ့မို့ ပူစူး စိတ်တွေလှုပ်ရှားနေမိတယ်။ ကျောင်းကိုလည်း အစောကြီး သွားချင်နေမိတယ်။

"စာတွေပြီးပြီလား၊ ပြင်တော့လေ၊ ဒီနေ့ ဖေဖေလိုက်မပို့နိုင်ဘူး၊ အလုပ်တွေမပြတ်သေးလို့၊ ဆိုက်ကားနဲ့သွား၊ အပြန်လည်း ဆိုက်ကားနဲ့ပြန်လာခဲ့"

"ဟုတ်ကဲ့"

ပူစူး အရမ်းဝမ်းသာသွားတယ်။ ပူစူးကို ဖေဖေလိုက်မပို့ဘူးတဲ့။ ဆိုက်ကားနဲ့ကျောင်းကို သွားရမှာတဲ့။ ပူစူး ပျော်လိုက်တာ၊ ပူစူးက ဆိုက်ကားစီးရတာကို သိပ်သဘောကျတာ။ ဒါထက် ပိုသဘောကျတာကတော့ဖေဖေမပါဘဲ ကျောင်းသွားရတာကိုပေါ့။ ခါတိုင်းဆို ဖေဖေက ကျောင်းတက်သံချောင်းခေါက်ခါနီးမှ ကျောင်းလိုက်ပို့တာ။ ပြီးတော့ ကျောင်းဆင်းခေါင်းလောင်းမထိုးခင် လာကြိုတယ်။ ဖေဖေ လာမကြိုနိုင်တဲ့နေ့တွေဆိုရင် ဖေဖေ့မိတ်ဆွေ ဆိုက်ကားသမား ဦးလေးညိုက ပူစူးတို့ ကျောင်းရှေ့မှာ အဆင်သင့်စောင့်နေတော့တာပဲ။ ဒါပေမယ့် ပူစူး ပျော်တယ်။ ဦးလေးညိုလာကြိုရင် ပူစူးရယ်၊ ပူစူးသူငယ်ချင်းတွေရယ် ဆိုက်ကားအတူစီးကြရတာ။ ဖေဖေ့စက်ဘီးနောက်မှာက ပူစူး တစ်ယောက်တည်းလိုက်ရတာ၊ ဆိုက်ကားနဲ့ဆို ပူစူးတို့ သူငယ်ချင်းလေးယောက်တော့ အသာလေးစီးလို့ရတယ်။

ကြည့်ပါဦး၊ စာမေးပွဲပြီးတဲ့နေ့မှာ ပူစူး သူငယ်ချင်းတွေနဲ့ တပျော်တပါး ဆိုက်ကားစီး ပြန်ရမှာတဲ့။ ဘယ်လောက် ပျော်စရာကောင်းလိုက်မလဲ။

"ပူစူး ဘာတွေလုပ်နေတာလဲ၊ ဦးလေးညိုရောက်နေပြီ"

"ဟုတ်ကဲ့ ပြီးပါပြီ ဖေဖေ" အိမ်ရှေ့မှာ ဆိုက်ကားရောက်နေပြီတဲ့။ ပူစူး အိမ်ပေါ်က ပြေးဆင်းခဲ့တယ်။ ဟော့တော့… ပူစူးလွယ်အိတ်ထဲမှာ ကွန်ပါဘူးမထည့်ရသေးဘူး။ ပူစူး အိမ်ပေါ်ပြန်တက်ရပြန်တယ်။ ပူစူး အရပ်ထက်ပိုမြင့်တဲ့ ဆိုင်းဘုတ်ကြီးရှေ့မှာ စုတ်တံတွေ၊ ဆေးဘူးတွေနဲ့ အလုပ်ရှုပ်နေတဲ့ ဖေဖေမမြင်အောင် ကွန်ပါဘူးပြန်ယူဖို့ တိတ်တိတ်ကလေး အိမ်ပေါ်ပြန်တက်ရတယ်။ ဒါပေမယ့် ဖေဖေက ပူစူးကွန်ပါဘူးကို ယူလာပြီးဖြစ်နေပြီ။

"ဟိုလေ… ပူစူး"

"ငါ ဒီလောက်ပြောနေတဲ့ကြားထဲက မေ့မေ့လျော့လျော့ပေါ့ပေါ့ဆဆအကျင့်တွေ မဖျောက်နိုင်သေးဘူးလား၊ ဘာကိုမှ အလေးအနက်မထားချင်တဲ့ ပေါက်လွတ်ပဲစား အကျင့်တွေကိုပဲ နင်က အမွေယူထားတာလားဟင်၊ ပေတံရော ပေတံပါပြီလား"

"ဟုတ်…ဟုတ်ကဲ့ ကွန်ပါဘူးက လွယ်အိတ်အောက်ရောက်နေလို့ မေ့သွားတာပါ"

"ဆင်ခြေမပေးနဲ့၊ စာမေးပွဲပြီးတာနဲ့အိမ်တန်းပြန်လာနော်၊ ပြန်မေးလို့ မဖြေနိုင်ရင် အသေပဲ။ စာပြန်မေးလို့မရရင် သော့ပိတ်ထားမယ် သွားတော့"

ဖေဖေလှမ်းပေးတဲ့ ကွန်ပါဘူးကို ပူစူး ကတုန်ကယင်နဲ့ လှမ်းယူလိုက်တယ်။ ပြီးတော့ ဆိုက်ကားပေါ် ပြန်တက်တယ်။ ဆိုက်ကားပေါ်ကနေ ကြောက်ကြောက်လန့်လန့်နဲ့ အိမ်ရှေ့ဝရန်တာကို လှမ်းကြည့်မိတော့ ဒေါသတကြီး စူးစူးရဲရဲစိုက်ကြည့်နေတဲ့ ဖေဖေ့မျက်လုံးတွေရယ်လေ။

အိုး… ပူစူး ကြောက်လိုက်တာ။

(၂)

"ကလေးမ ငြိမ်လှချည်လား"

"ပူစူး ကြောက်ပါတယ်၊ ပူစူး တကယ်ကြောက်တာပါ ဖေဖေရဲ့"

"ပူစူးမ၊ ငါပါဟ" ပူစူး ပခုံးပေါ်ကိုကျလာတဲ့ လက်ကြမ်းကြီးကို ပြူးကြောင်ကြောင် ကြည့်မိသွားတယ်။ ဟင်…ဖေဖေလည်း မဟုတ်ပါလား၊ ဟုတ်ပါရဲ့။ ဖေဖေ့လက်ကလေးတွေက နုနုကလေးရယ်၊ ဖေဖေ့အသည်းနှလုံးကသာ။ "ပူစူးမရာ နင်ကလည်း ကြောက်စရာမဟုတ် ကြံဖန် ကြောက်နေတော့တာပဲ။ နင့်အဖေအကြောင်းလည်း နင်သိသားပဲ။ ပါးစပ်က ခြိမ်းခြောက်နေတာပါ။ နင့်ကို ဘယ်နှစ်ခါ ရိုက်ဖူးလို့လဲ။ နင့်အမေရှိတုန်းကမှ နင် ခဏခဏ အရိုက်ခံရသေး။ ခင်သန်းမြိုင်ကတော့ ထစ်ခနဲဆို တွေ့ရာနဲ့ကောက်ရိုက်လိုက်တာ။ ခင်သန်းမြိုင်က ဟောဟောဒိုင်းဒိုင်း စိတ်ထင်ရာလုပ်တဲ့သူ။ သစ်ဥိးက အနုပညာသမား၊ စိတ်ထားကလည်း ခပ်နုနု၊ အင်းလေ… ဒါကြောင့်လည်း ဒီလို ဖြစ်ခဲ့ကြတာပေါ့။ ခင်သန်းမြိုင်ကိုက မိုက်တာပါဟာ၊ နင့်အဖေ နာမယ်ဆိုလည်း နာလောက်ပါတယ်။ သမီးလေး မျက်နှာမှမထောက်"

ဦးလေးညိုက ချိုင့်ခွက်တစ်ခုကို ရှောင်ရင်းပြောလိုက်တယ်။ သူက ဖေဖေ့ဘက်တော်သားပဲ။ ဘယ်တုန်းကများ မေမေ့ကို အကောင်းပြောခဲ့ဖူးလို့လဲဟင်၊ မေမေကရော သူ အကောင်းပြောရလောက်အောင် ကောင်းခဲ့သူမို့လား။ သိပါတယ်။ ပူစူး သိပါတယ်လေ။ ဖေဖေပြောသလိုပဲ မေမေဟာ…

"နင် မြဲမြဲမှတ်ထား ပူစူး၊ နင့်အမေဟာ ကျီးအာသီးလို မိန်းမတစ်ယောက်ဆိုတာ မြဲမြဲမှတ်ထား၊ ကျီးအာသီးဆိုတာ အပေါ်ယံကသာ အရောင်စိုစိုလှလှလေးနဲ့ လူကို မြှူဆွယ်နိုင်တာ။ အထဲကတော့ ဘာမှအနှစ်သာရရှိတာမဟုတ်ဘူး။ တန်ကြေးမရှိတဲ့အရာတွေက အပေါ်ယံ ဟန်လုပ်တဲ့နေရာမှာတော့ ပထမတန်းစားပဲ၊ နင့်အမေက အဲသလိုမိန်းမ"

"စာမတတ် ပေမတတ် အသိဥာဏ်ဆင်ခြင်တုံတရားမရှိတဲ့ မိန်းမတစ်ယောက်ကို ငါက အပေါ်ယံလေးကြည့်ပြီး မက်မောခဲ့မိလို့ နင်ဖြစ်လာရတာ။ နင့်အမေသွေးတွေ နင့်ကိုယ်ထဲမှာ တစ်စက်မှမကျန်အောင် ဖောက်ထုတ်ပစ်ရမယ်"

ဖြစ်နိုင်မှာလားဟင်၊ ပူစူးရဲ့ ခန္ဓာကိုယ်ထဲမှာ မေမေ့ရဲ့သွေးတွေ တစ်စက်မှမကျန်ရစ်အောင် လုပ်ပစ်ရမယ်ဆိုတာ ဖြစ်နိုင်ပါ့မလား။

ဒါပေမယ့် ပူစူး နားလည်ပါတယ် ဖေဖေရယ်၊ မေမေ့လို အလုပ်မျိုး ပူစူး ဘယ်တော့မှ မလုပ်ဘူး။ ဖေဖေ့ကို ပူစူး ဘယ်တော့မှ ခွဲထွက်မသွားပါဘူး ဖေဖေ။ ဖေဖေမုန်းသလိုပဲ ပူစူးလည်း မေမေ့ကို မုန်းတယ်။ ဖေဖေ့လိုပဲ မေမေ့ကို ပူစူး ဘယ်တော့မှ ခွင့်မလွှတ်ဘူး။ ခွင့်မလွှတ်ချင်ပေမယ့် သတိတော့ ရပါရစေလား ဖေဖေ။ ဖေဖေ ပူစူးကို ဒေါသတကြီးဆူပူတဲ့အခါ မေမေ့ကို ပိုသတိရတယ်။ မေမေ့မျက်လုံးတွေက ဖေဖေ့မျက်လုံးတွေလို ကြောက်စရာမကောင်းဘူး။ ပူစူးကျောကို မေမေ တံမြက်စည်းနဲ့ကောက်ရိုက်တာက ပူစူးပခုံးကို ဖေဖေဆုပ်ကိုင်လှုပ်တာလောက် မနာကျင်ရဘူး။ မေမေ ပူစူးကို အော်ဆဲတာက ဖေဖေပူစူးကို မျက်ခုံးရှုံ့ကြည့်တာလောက် ကြောက်စရာမကောင်းဘူး။ ပြီးတော့လေ…

လမ်းမကြောင်းပေါ်မှာ ထမင်းဇလုံကိုင်ပြီး မေမေ ခွံ့ကျွေးခဲ့ဖူးတဲ့ ထမင်းဆီဆမ်းဟာ စားပွဲပေါ်မှာ ဖေဖေနဲ့ပူစူး ကြက်သားဟင်းနဲ့စားရတဲ့ ထမင်းထက် စားလို့ကောင်းတယ်။ မေမေနဲ့အတူ သွားခဲ့ဖူးတဲ့ ဗွီဒီယိုရုံဟာ ဖေဖေလိုက်ပြတဲ့ ပန်းချီပြပွဲတွေထက် ပိုစိတ်ဝင်စားဖို့ကောင်းတယ်။ အဲဒါလေးတွေကို ပူစူး သတိရမိရုံလေးပါ ဖေဖေ။

"ပူစူးမ ဘာတွေ ဒီလောက်တွေးနေတာတုန်းဟ၊ ဟောဗျာ ညည်းက ငိုနေတာကိုး၊ ငါကလည်းငါပါပဲ။ စိတ်မကောင်းစရာတွေ အစဖော်မိပြန်ပြီ။ ကဲပါဟာ ပြီးခဲ့တာတွေ ပြန်တွေးမနေပါနဲ့တော့။ စာတွေမေ့ကုန်လိမ့်မယ်။ ဒီနေ့ နောက်ဆုံးနေ့မဟုတ်လား။ အပြန်ငါပဲလာကြိုရမှာ။ ညည်း သူငယ်ချင်းတွေရောခေါ်ခဲ့ ကြားလား၊ ကဲ… သွားတော့"

ပူစူး ဆိုက်ကားပေါ်က ခုန်ဆင်းလိုက်တယ်။ ကျောင်းဝင်းထဲမှာ ကျောင်းသားတွေ အတော်များများရောက်နေကြပြီ။ ပူစူး သူငယ်ချင်းတွေကို ရှာကြည့်မိတယ်။ စောသေးလို့ထင်ပါရဲ့။ သူတို့ မရောက်ကြသေးဘူး၊ ဟင့်အင်း ပူစူး သူတို့နဲ့လည်း စကားမပြောချင်ပါဘူး။ တိတ်တိတ်လေးတစ်ယောက်တည်းပဲ ထိုင်နေချင်တယ်။ တိတ်တိတ်ကလေးမှ ဘယ်သူမှမသိအောင် တိတ်တိတ်ကလေးပါပဲလေ။ မေမေ့ကို ပူစူး သတိရလိုက်တာ။

(၃)

"အချိန်ပြည့်တော့မယ်နော်။ မိနစ် ၂၀ပဲလိုတော့တယ်။ ကိုယ့်အဖြေလွှာတွေကိုယ် သေချာပြန်စစ်ကြပါ"

စာမေးပွဲအခန်းစောင့် ဆရာမရဲ့အသံဟာ ပူစူးဘေးက ကပ်ဝင်လာတာဖြစ်တာကြောင့် ပူစူး ကိုယ်လေး ဆတ်ခနဲတောင် တုန်သွားတယ်။

"သမီးသိပ်ဖြေနိုင်တာပဲလား" ပူစူးကိုသိနေတဲ့ ဆရာမက တကုပ်ကုပ်ရေးနေတဲ့ ပူစူး အဖြေလွှာစာရွက်ကို တစ်ချက်ငုံ့ကြည့်ရင်း ပြုံးပြုံးလေးမေးတယ်။ ဆရာမကို ပူစူး ပြူးကြောင်ကြောင် ပြန်မော့ကြည့်ရင်း ခေါင်းညိတ်ပြလိုက်တယ်။

"အို…ကလေး ဘာတွေရေးနေတာလဲ"

ဆရာမက ပူစူးစာရွက်ကို အလန့်တကြားဟန်နဲ့ ဆွဲယူကြည့်ရင်း မေးလိုက်တာ။ ဆရာမဟာ ပူစူးရဲ့အဖြေလွှာစာရွက်တွေကို တဖျပ်ဖျပ်မြည်အောင်လှန်ကြည့်ရင်း အလွန်အမင်း အံ့အားသင့်နေတယ်။ ပူစူးက "မပြီးသေးဘူး ဆရာမ"လို့ ပြောပြီး အဖြေလွှာစာရွက်ကို ခပ်တည်တည်ပဲ ပြန်ဆွဲယူလိုက်တယ်။

အခန်းစောင့်ဆရာမဟာ ပူစူးအနားကခပ်မြန်မြန်ပြေးထွက်သွားပြီး အခန်းပြင်က ဆရာမတစ်ယောက်နဲ့ စကားတွေ တတွတ်တွတ်ပြောနေကြတယ်။ ခဏနေတော့ ဆရာမနှစ်ယောက်စလုံး ပူစူးအနား ရောက်လာကြပြန်ရော။

"သူ ကိုသစ်ဦး သမီး မဟုတ်လား"

"ဟုတ်တယ်၊ ခြောက်တန်းဘီက ပူစူးမလေ"

"ဖြစ်မှ ဖြစ်ရပလေဟယ်"

ဆရာမနှစ်ယောက်ဟာ ပူစူးအနားမှာရပ်ပြီး ဘာတွေပြောနေကြတယ်မသိဘူး။ အချိန်ပြည့်ခေါင်းလောင်းထိုးလို့ အဖြေလွှာစာရွက်ကို ပူစူး အပ်လိုက်တဲ့အချိန်မှာ ဆရာမနှစ်ယောက်က မျက်စိပျက်မျက်နှာပျက် ပုံစံနဲ့ ပူစူးကို စိုက်ကြည့်နေကြတယ်

"သမီး ဘာတွေရေးနေတာလဲကွယ်၊ ဒါ စာမေးပွဲခန်းလေ၊ ဒီမေးခွန်းထဲက မေခွန်းတွေကို ဖြေပေးရမှာလေ သမီးရဲ့"

စာမေးပွဲအဖြေလွှာတွေကို အခန်းစောင့်ဆရာမဆီ အပ်ပြီး အောက်ဟစ်ခုန်ပေါက်ပြေးထွက်သွားကြတဲ့ ကျောင်းသားတွေကို ပူစူး လိုက်ကြည့်နေမိတယ်။

"ပူစူး" ပူစူးရဲ့အဖြေလွှာကို သိမ်းမယူသေးဘဲ ပူစူးအနား လာရပ်နေတဲ့ဆရာမကို ပူစူး စိတ်တိုတိုနဲ့ ပြန်ကြည့်လိုက်တယ်။

"ပူစူး သမီး ဆရာမကို သိတယ်နော်"

ဆရာမကို ပူစူး ခေါင်းတစ်ချက်ညိတ်ပြလိုက်တယ်။ ပူစူး အဖြေလွှာကို ပူစူး ပြန်ငုံ့ကြည့်လိုက်မိတယ်။ ဘုရား…ဘုရား ပူစူး နှစ်နာရီလုံးလုံး ဘာတွေရေးနေခဲ့မိပါလိမ့်။ ဒါ စာမေးပွဲဖြေနေတာလေ။ ဟုတ်ပါတယ်။ ဒါ စာမေးပွဲပဲဥစ္စာ၊ ပူစူးဘဝအကြောင်း ပူစူးခံစားချက်တွေကို ရေးပြလိုက်တဲ့ စာမေးပွဲလေ။

"ဘယ်လိုလုပ်ကြမလဲ ကလေးရယ်၊ ဆရာမတော့ မကြံတတ်တော့ပါဘူး"

ပူစူးရဲ့ အဖြေလွှာစာရွက်ကို ကိုင်ထားတဲ့ ဆရာမမျက်ရည်တွေ ၀ဲတက်လာတယ်။ ပူစူးကတော့ မေးခွန်းစာရွက်ကိုပဲ ငေးစိုက်ကြည့်နေမိတယ်။ အိုး… ဟုတ်ပါရဲ့၊ ပူစူး စာမေးပွဲဖြေရဦးမှာပါလား။ ဟုတ်တယ်၊ ကျောင်းမှာ စာမေးပွဲဖြေပြီးတိုင်း ဖေဖေ့ဆီမှာ ပူစူး စာမေးပွဲထပ်ဖြေနေကျမဟုတ်လား။

"သမီး သိပါတယ် ဆရာမရဲ့၊ သမီး စာမေးပွဲဖြေရမှာကို"

"မဟုတ်ဘူးလေ ကလေးရယ်၊ စာမေးပွဲက အခုပြီးသွားပြီ။ ဒီနေ့ စာမေးပွဲနောက်ဆုံးနေလေ။ ခုပဲ အဖြေလွှာတွေအားလုံး အပ်ကြတော့မှာ။ ထပ်ဖြေလို့မရတော့ဘူး"

ဆရာမကို ပူစူး ခေါင်းယမ်းပြလိုက်မိတယ်။

"ဟင့်အင်း၊ ပူစူး စာမေးပွဲဖြေရဦးမှာပါ။ ပူစူး သွားတော့မယ်နော်"

မေးခွန်းစာရွက်ကို ကိုင်ပြီးထွက်လာတဲ့ ပူစူးကို ဆရာမနှစ်ယောက်က အံ့သြထိတ်လန့်နေတဲ့မျက်နှာတွေနဲ့ကြည့်ရင်း ကျန်ရစ်ခဲ့တယ်။ ပူစူးစာမေးပွဲဖြေရတော့မယ်။ ဘာတွေဖြေရမှာတဲ့လဲ။ မေးခွန်းတွေကိုလေ ဒီစာရွက်ထဲက မေးခွန်းတွေကိုလေ ဒီစာရွက်ထဲက မေးခွန်းတွေကိုပဲ ပူစူးပြန်ဖြေရမှာ။ ဘာတွေ မေးထားတာပါလိမ့်။ ပူစူး ဘာတွေဖြေခဲ့ရတာလဲ။ ဟုတ်တယ်။ ပူစူး ဖြေခဲ့တာတွေကို ဖေဖေကသိချင်တာ။ စာမေးပွဲခန်းထဲမှာ ပူစူးဖြေခဲ့တဲ့အဖြေတွေ အားလုံးကို တစ်လုံးမကျန်ဖေဖေက သိချင်တာ။ ပူစူးဖြေခဲ့တဲ့ အဖြေတွေကို ဖေဖေ့ရှေ့မှာ ပြန်ရွတ်ပြရမှာ။ သင်္ချာတွေဆိုလည်း ပြန်တွက်ပြရဦးမှာ။ ဘယ်လောက် မုန်းစရာကောင်းလိုက်သလဲ။ ပူစူးသူငယ်ချင်းတွေကတော့ မေးခွန်းစာရွက်ထဲက စာလုံးတွေကို စ,ဖတ်ဖတ်ချင်း အရမ်းကြောက်သွားတာပဲတဲ့။

ဟင့်အင်း မေးခွန်းထဲက စာလုံးတွေက ကြောက်ဖို့မကောင်းပါဘူးနော်။ ဖေဖေ့မျက်နှာက မျက်လုံးတွေကသာ ကြောက်စရာကောင်းလိုက်တာ။ အိုး…သူတို့အဖေတွေကို သူတို့မကြောက်ကြပါဘူး။ သူတို့အဖေတွေက မေးခွန်းတွေကို ယူကြည့်တာမှမဟုတ်တာ။ မိတုတ်ရဲ့အဖေဆို စာတောင် မဖတတ်တတ်ဘူးတဲ့။ စုစုအေးရဲ့အဖေကလည်း A.B.C.D တောင် မရဘူးတဲ့။ ဖြေနိုင်လားလို့မေးရင် "ဖြေနိုင်တယ်" လို့ ပြောလိုက်ရုံပဲတဲ့။ မဖြေနိုင်ရင်လည်း ဖြေနိုင်တယ်လို့ ညာပြောလို့ ရသေးသတဲ့။ မရဘူး၊ ဖေဖေ့ကိုတော့ ပူစူး ညာပြောလို့မရပါဘူးလေ။

ဖေဖေက စာတွေ အများကြီးတတ်တာ။ အင်္ဂလိပ်စာတွေလည်း အများကြီးတတ်တာ၊ မေသူဇာရဲ့ အဖေကလည်း စာတွေအများကြီးတတ်တယ်တဲ့။ ဘွဲ့နှစ်ဘွဲ့တောင်ရတာတဲ့။ ဒါပေမယ့် မေသူဇာကိုတော့ စာသင်မပေးပါဘူးနော်။ ဖေဖေကသာ ပူစူးကို စာသင်ပေးတာ၊ စာသင်နေတုန်း လမ်းမပေါ်ကို လှမ်းကြည့်မိရင် ပူစူးစာအုပ်တွေကို ဒေါသတကြီး ကိုင်ပေါက်လွှင့်ပစ်တတ်တာ။ "ကျောင်းစာကို စိတ်မဝင်စားဘဲ မဟုတ်မဟတ်တွေ စိတ်ဝင်စားနေတာကိုး၊ နင့်အဖေရဲ့ ဗီဇဆိုးတွေ နင့်ဆီမှာ မကျန်အောင် နင့်တစ်ကိုယ်လုံးကို သွေးသစ်လဲပေးရမှာလား ပူစူး" ဆိုပြီး ဖေဖေ တအားအော်ဟစ်တော့တာ။ ပူစူးကို ဖေဖေစာသင်တိုင်း ပူစူးမငိုရတဲ့နေ့ ရှိခဲ့လို့လား။ ဖေဖေ့ကိုကြောက်လွန်းလို့ တုန်နေတဲ့ ပူစူးဦးနှောက်ထဲကို စာတွေ ၀င်နိုင်ဦးမှာတဲ့လား ဖေဖေ၊ ဖေဖေ့ကိုကြောက်လို့ မျက်ရည်တွေ တပေါက်ပေါက်ကျလာတဲ့ ပူစူးကို ဖေဖေ ပိုဒေါသထွက်ပြန်ရော။ အဲဒီအခါ "အသုံးမကျတဲ့ဦးနှောက်၊ အမှတ်သည်းခြေမရှိတဲ့ အထုံအထိုင်းမ"ဆိုပြီး စာအုပ်တွေကို ပစ်ပေါက်ပြီး ဖေဖေစိတ်ဆိုးသွားတော့တာ။ အဲဒါ ဖေဖေနဲ့ပူစူးကြားက မရိုးအီနိုင်တဲ့ ပဋိပက္ခပဲ။ တကယ်တော့ ဖေဖေထင်သလောက် ပူစူးမညံ့ပါဘူးနော်။ ကျောင်းပေါင်းစုံ စာစီစာကုံးပြိုင်ပွဲတွေမှာ ပူစူး ခဏခဏ ပထမဆုရနေတာပဲ။

ဖေဖေကတော့ ပူစူး စာညံ့လို့ဆိုပြီး ဘယ်တုန်းကမှ မျက်နှာသာမပေးခဲ့ဘူး။ အဆိုးဆုံးကတော့ စာမေးပွဲတွင်းတွေမှာ မှတ်မှတ်ရရ ပူစူးလေးတန်းဖြေပြီးတဲ့နေ့၊ စာမေးပွဲနောက်ဆုံးနေ့မှာ ပူစူး အရှင်လတ်လတ် ငရဲကျခဲ့ရဖူးတာ။ ဖေဖေပြန်မေးတဲ့ မေးခွန်းတွေကို ပူစူး မဖြေနိုင်တော့လို့ ကြောက်စရာအကောင်းဆုံး ပြစ်ဒဏ်တစ်ခု ပေးခဲ့ဖူးတယ်။

"နင့်ကို အဲသလို အရှက်အကြောက်ရှိအောင်ဆုံးမထားမှ တော်ကာကျမှာ"တဲ့။ ပူစူးက ဘာကိုရှက်ရမှာလဲ။ ဖေဖေ့ကိုကြောက်ရလွန်းလို့ စာတွေမေ့ကုန်တာ ရှက်ရမှာလား။ ဒီကမ္ဘာကြီးမှာ စာမေးပွဲမေးခွန်းတစ်ခုတည်းကို နှစ်ခါထပ်ဖြေရတဲ့ ကျောင်းသားရှိလို့လားဟင်။ ဖေဖေမေးတဲ့ စာမေးပွဲမေးခွန်းကို မဖြေနိုင်တဲ့ ပြစ်မှုနဲ့ တစ်လောကလုံးက ကလေးတွေ စာမေးပွဲဖြေပြီးလို့ လွတ်လပ်ပျော်ရွှင်နေတဲ့အချိန်မှာ -

"နင်စာမေးပွဲကျမှာပဲ" ဆိုပြီး ရေချိုးခန်းထဲမှာ ပိတ်လှောင်ထားခြင်းခံခဲ့ရတဲ့ ပူစူးဟာ အဲဒီနှစ်က စာမေးပွဲကို ပထမအဆင့်နဲ့ အောင်ခဲ့တယ်လေ။ အဲဒီအတွက် ပူစူးကို ဖေဖေပေးခဲ့တဲ့ ဆုလက်ဆောင်ကတော့ "ဒါ ခပ်ညံ့ညံ့ကျောင်းမှာမို့ ရတာ။ အနူတောမှာ လူချောဖြစ်ရတာကို ဟုတ်လှပြီမထင်နဲ့။ နင့်အရည်အချင်းကို ငါ အသိဆုံး"ပါတဲ့။ စာမေးပွဲဖြေပြီးတာနဲ့ ဘာသာရပ်တိုင်းကို ဖေဖေ့ဆီမှာ ပြန်အစစ်ခံရတယ်။ စာမေးပွဲအောင်စာရင်းမထွက်ခင်ရက်တွေမှာ ပူစူးကို ကစားခွင့်မပေးဘူး။ အိမ်ထဲမှာပဲ တစ်ချိန်လုံး စာတွေ ဖတ်နေရတယ်။ ပုံပြင်တွေ ၀တ္ထုတွေကို ပူစူး စိတ်ဝင်စားပေမယ့် "ဒီစာအုပ်တွေဖတ်"လို့ ဖေဖေက စာအုပ်တစ်ထပ်ကြီးချပေးတဲ့အခါ စာအုပ်တွေကို ပူစူးမုန်းသွားတယ်၊ အဲဒီအချိန်မျိုးဆို ပူစူး မေမေ့ကိုသတိရလိုက်တာ။ မေမေက ဖေဖေ့လိုစာအုပ်တွေ မဖတ်ဘူး။ ဗီဒီရုံပဲအမြဲတမ်းသွားတတ်တာ။ ညတိုင်းညတိုင်း ထမင်းစားပြီးတာနဲ့ ဗွီဒီယို သွားကြည့်နေကျလေ။ ခုတော့ ကြာခဲ့ပါပြီ။ ပူစူးနဲ့ဖေဖေ့ကို မေမေထားရစ်ခဲ့တာပဲ ၅ နှစ် ကျော်ခဲ့ပါပြီ။ ဗီဒီယိုမင်းသား မင်းသမီးတွေ နာမည်ကိုတောင် ပူစူး မသိသလောက်ဖြစ်နေပြီလေ။

တစ်ခါတုန်းက နေကြာစေ့ထုပ်၊ ဆီးသီးထုပ်တွေထဲက မင်းသမီး၊ မင်းသားလှလှလေးတွေရဲ့ ရုပ်ပုံစာရွက်လေးတွေကို ပူစူးသိမ်းထားတာ ဖေဖေတွေ့သွားခဲ့တယ်။ ယွန်းသေတ္တာလေးထဲက ရုပ်ပုံလှလှလေးတွေကို ပြန့်ကျဲနေအောင် လွှင့်ပစ်ပြီး ပူစူးဆံပင်တွေကို ဆွဲဆောင့်လိုက်တာ။ ပြီးတော့ 'တန်ကြေးမရှိတာတွေကို စိတ်ဝင်စားနေ၊ ဘာမဟုတ်တဲ့အလုပ်'တဲ့။ ဖေဖေပြောတာတွေကို ပူစူးနားမလည်ပါဘူး။ ပူစူးသူငယ်ချင်းတွေလည်း ဒီလိုပဲ ရုပ်ပုံလှလှလေးတွေ စုကြတာပဲ။ သူတို့က ချစ်စရာကောင်းကြတယ်လေ။ မင်းသမီးလေးတွေများ လှလိုက်တာ။ မေမေ့ထက်တောင် ပိုလှသေးတယ်။ ပူစူးကိုလည်း အမြဲပြုံးပြကြသေးတာ။ မင်းသမီးလှလှလေးတွေကို ပူစူး သိပ်ချစ်တာပဲ။ ဒါပေမယ့် ပူစူး ဖေဖေ့ကိုကြောက်ပါတယ်။ ဖေဖေမကြိုက်တဲ့အလုပ်မျိုးကို ပူစူး ဘယ်တော့မှ မလုပ်ပါဘူးနော်။ ဒီနေ့တော့ ပူစူး မေမေ့ကို သတိရပါရစေဖေဖေ။ ဟုတ်တယ်။ ပူစူး မေမေရှိတဲ့နေရာကို သွားရမယ်။ တိတ်တိတ်ကလေး သွားမယ်။ ခဏလေးပါ ဖေဖေရယ်၊ မေမေ့ကိုမြင်ရရုံ ခဏလေးပဲ။ ပူစူး မေမေ့ကိုမခေါ်ပါဘူး။ လုံးဝမခေါ်ပါဘူး ဖေဖေ၊ မေမေ့ကို ဖေဖေ့လိုပဲ ပူစူးလည်း မုန်းတယ်လေ။

 

(၄)

အို…ကြည့်စမ်းပါဦး။ လူတွေဟာ ပျော်နေလိုက်ကြတာ။ အဖေတွေ၊ အမေတွေက သူတို့သားသမီးတွေရဲ့လက်ကိုဆွဲလို့ ခရီးထွက်သွားကြတာ ဘယ်လောက်ပျော်ဖို့ကောင်းလိုက်သလဲနော်။ ဟော ဟိုက သင်္ဘောကြီးကိုစီးသွားရင် မေမေရှိတဲ့အရပ်ကိုရောက်မှာ။ ဦးလေးညိုကပြောဖူးတယ်လေ။

"ခင်သန်းမြိုင်ကို ကမ်းနားမှာ ခဏခဏတွေ့တယ်ဟ၊ သူက ဟိုဘက်ကမ်းမှာနေတာထင်တယ်။ ငါကလည်း ခရီးသည်နဲ့မို့ နှုတ်ဆက်ချိန်မရလိုက်ပါဘူးဟာ။ သူ့ပုံစံကလည်း ရေးကြီးသုတ်ပျာနဲ့ မော်တော်မီအောင် မနည်းအချိန်လုနေရတဲ့ပုံပါပဲ"

ဟုတ်တယ်၊ မေမေ ဟိုဘက်ကမ်းမှာပဲ နေတာဖြစ်မှာပါ။ ဟိုမှာ စက်လှေပေါ်က ဆင်းလာတာမေမေလားမသိဘူး။ မဟုတ်သေးပါဘူး။ မေမေက အသားဖြူဖြူလေးပါ။ ပြီးတော့ မေမေက အမြဲတမ်းနှုတ်ခမ်းနီ ရဲရဲဆိုးထားတတ်တာ။

ဟော ဟိုကျောက်တုံးကြီးနားနားမှာ ရေချိုးနေတဲ့ မိန်းမကရော။ အောင်မယ် သူက ယောက်ျားတစ်ယောက်ကို ဂျီး(ချေး)တွေတွန်းပေးနေသေးရဲ့။ သူတို့ဘေးနားမှာ ဆော့နေတဲ့ကလေးဟာ သူတို့သားလေးပဲဖြစ်မှာ။ ဟင့်အင်း မေမေ့မှာ ပူစူးအပြင် ကလေးမရှိပါဘူး။ ဒီကလေးလေးက ငယ်ငယ်လေးပဲရှိသေးတာ။ ဟိုလူကြီးနဲ့ ထပ်ရတဲ့ကလေးဖြစ်ရင် ဖြစ်မှာနော်။ ဒါပေမယ့် ဒီမိန်းမက ဆံပင်ရှည်တွေနဲ့ပါ။ မေမေက ဆံပင်အတိုကို အမြဲကောက်ထားတတ်တာ။ ကောက်ထားတဲ့ဆံပင်တွေပြေလာရင် ပိုက်ဆံမရှိတာတောင် ဖေဖေမသိအောင် အကြွေးသွားကောက်သေးတာနော်။ ဆံပင်မကောက်ရရင် မေမေနေတတ်မှာမဟုတ်ပါဘူး။ အဲဒါ မေမေမဟုတ်ပါဘူး။

ဟိုးက ကျောက်ပြားကြီးပေါ်မှာ အ၀တ်လျှော်နေတဲ့ အမျိုးသမီးကရော အသားဖြူတယ်လေ။ နည်းနည်းတော့ နီသလိုပဲ။ ဒါ နေရောင်ထိုးနေလို့ ဖြစ်မှာပါ။ အို မေမေက ဒီမှာနေတာမှမဟုတ်ဘဲ ဘယ်လိုလုပ် ဒီဘက်ကမ်းမှာ အ၀တ်လာလျှော်မှာလဲ။ ပြီးတော့ မေမေက ဒီမိန်းမလောက် အားမသန်ပါဘူး။ မေမေ အ၀တ်လျှော်တဲ့အခါ အားမထည့်ဘဲဖြစ်သလိုလျှော်တတ်လို့ ဖေ့ဖေ့အင်္ကျီဖြူတွေ ၀ါညစ်ညစ် ဖြစ်ကုန်ရတာတဲ့။

အ၀တ်ကလေးကိုမှ ဖြူစင်အောင် မလျှော်ဖွပ်နိုင်ဘူးတဲ့။ ဖေဖေကသာ အ၀တ်တွေကို ဖွေးစင်နေအောင် လျှော်တတ်တာ။

"မှတ်ထား ပူစူး၊ အရွယ်ရောက်လာတဲ့အထိ ကိုယ်ဝတ်တဲ့ အ၀တ်လေးကိုမှ ဖြူစင်အောင် မလျှော်နိုင်တဲ့လူမျိုးဟာ ညစ်ညမ်းတဲ့ဘ၀မျိုးကနေ ဘယ်တော့မှ ရုန်းထွက်နိုင်မယ့်လူမျိုး မဟုတ်ဘူး။ သူတို့လျှော်တဲ့အ၀တ်တွေလိုပဲ လျှော်လေ ညစ်လေ ဖြစ်လာမှာ" လို့ ဖေဖေ ပြောခဲ့ဖူးတယ်။ ပူစူးကတော့ အ၀တ်တွေကို ဖြူစင်အောင် လျှော်တတ်ပါတယ်နော်။ ပူစူးကို ဖေဖေသင်ပေးထားတာပဲ။ အ၀တ်ဟာ အချိန်ကြာလာလို့ ဟောင်းချင်ဟောင်းမယ်။ စုတ်ချင်စုတ်လာမယ်။ ဒါပေမယ့် ပေပေရေရေ အညစ်အကြေးတွေမရှိဘဲ သန့်ရှင်းစင်ကြယ်ပြီး ပြောင်စင်နေရမယ်လေ။

နေပါဦး ကြည့်စမ်းပါဦး။ ဟိုမှာ မိန်းမတစ်ယောက် ရေချိုးတော့မှာ ထင်တယ်။ ဟော့တော် ထဘီရင်မလျားရသေးဘဲနဲ့ သူ ရေကူးနေပြီ။ မေမေက ရေမှမကူးတတ်တာနော်။ ပြီးတော့ မေမေက ဒီဘက်ကမ်းကို တစ်ခါတလေမှလာမှာပါ။ ဘုရားရေ၊ သေချာကြည့်ပါဦး။ ကြိမ်ခြင်းတောင်းကြီး ဆွဲထားတဲ့ မိန်းမကိုလေ။ သူ…သူ၊ မေမေပဲ၊ ဟော စက်လှေပေါ်တက်နေပြီ။ သူ သွားတော့မှာ။ အို စက်လှေထွက်တော့မှာပဲ။ သူ သွားတော့မှာ။ ဒီမှာ ဈေးလာဝယ်ပြီး ပြန်တာပဲဖြစ်မှာနော်။ ကြည့်စမ်း၊ သူ ဒီကိုလှမ်းကြည့်နေပြီ။ ဟယ် နှုတ်ခမ်းနီရဲရဲ ဆိုးလို့ပါလား မေမေ၊ ဒါ ပူစူး မေမေ အစစ်၊ မြစ်ဆိပ်က အုတ်လှေကားထစ်လေး တစ်ခုမှာထိုင်နေရင်း ပူစူး ထ,ရပ်လိုက်တယ်။ လှေကားထစ်တွေကို ခုန်ပေါက်ကျော်လွှားပြီး ကမ်းခြေရောက်အောင် ပြေးဆင်းရတာပေါ့။ လှေကားထစ်တွေကလည်း များလိုက်တာ။

စက်လှေက စက်နှိုးနေပြီ။ ဆူညံနေတဲ့ စက်လှေအင်ဂျင်သံကြားမှာ 'မေမေ၊ မေမေ' လို့ ပူစူး အဆက်မပြတ် လှမ်းအော်လိုက်တယ်။ မေမေက ပူစူးကို ကြည့်နေတာနော်။ ဟင်…မေမေ့မျက်လုံးတွေက တစိမ်းဆန်လိုက်တာ။ ပူစူးကိုတောင် မေမေ မမှတ်မိတော့ဘူးလား၊ ပူစူးဟာ မေမေ့သမီးလို့ ပြောစရာမလိုအောင် မေမေ့ရုပ်နဲ့ ချွတ်စွပ်တူတဲ့သမီးဆို။

"မေမေ၊ မေမေ" စက်လှေက လူးလွန့်ထွက်ခွာစပြုနေပြီ။ မေမေ ပါသွားတော့မှာ။

"မေမေ၊မေမေ၊ ပူစူးလေ၊ ပူစူး ဒီမယ်"

"လုပ်ကြပါဦးရှင်၊ ကလေး…ကလေး…အို… မလိုက်ခဲ့နဲ့လေ"

"ခင်ဗျားတို့ကလေးလား"

"မဟုတ်ဘူး၊ စက်လှေပေါ်က ကလေးမဟုတ်ဘူး၊ လူမှားတာ ထင်တယ်"

"လုပ်ကြပါဦးဗျာ၊ ကလေးကို ဆွဲထားပေးလိုက်ကြပါ"

"လုပ်ပါဦး၊ လုပ်ပါဦး၊ ကလေး ရေထဲနစ်နေပြီ"

"အဲဒါ ပန်းချီဆရာကိုသစ်ဦး သမီးလေးတော့ ဟုတ်ပါရဲ့၊ သူ့ အမေထင်လို့နေမှာ၊ သူ့အမေက ဟိုဘက်ကမ်းမှာရှိတယ်ကြားတာပဲ၊ လွန်ခဲ့တဲ့ လေးငါးနှစ်ကတည်းက လင်ငယ်နောက်လိုက်သွားတာ၊ ကြာ,ကြာလှပေါ့"

ဘာတွေပြောနေကြတာလဲ၊ စက်လှေပေါ်က လူတွေကလည်း ပူစူးကို ဘာတွေလှမ်းပြောနေတာလဲ၊ ကမ်းခြေကလူတွေ အသံကလည်း ကျယ်လိုက်တာ၊ မေမေရော၊  မေမေ သမီးလို့တောင် တစ်ခွန်းမှ မခေါ်ပါလား၊ နားအူလိုက်တာ၊ အို ပူစူး အသက်ရှူလို့မရတော့ဘူး၊ ရေတွေ၊ ရေတွေ ငန်လိုက်တာ၊ ဖေဖေရေ…ဖေဖေရေ၊ မေမေ့နောက်ကို ပူစူး ဘယ်တော့မှ မလိုက်တော့ပါဘူး။ ဖေဖေ့ကိုတစ်ယောက်တည်း ပူစူး မထားရစ်ခဲ့ပါဘူးနော်၊ ဖေဖေရေ။

(၅)

"ဟော…သတိရလာပြီ၊ ကလေး သတိရလာပြီ"

"ပူစူး…သမီး၊ ဆရာမလေ… ဆရာမကို သမီးသိလားဟင်"

"ပူစူးမ၊ ဦးလေးညို ရှိတယ်နော်၊ သမီး သိလား"

ပူစူး ဘယ်ရောက်နေတာလဲ၊ ဒါ ပူစူးအိမ်မဟုတ်ပါဘူး၊ ကျောင်းလား၊ ဆရာမတွေလည်း ရှိနေတယ်လေ၊ ဒါပေမယ့် ပူစူးတို့ကျောင်းက အုတ်နံရံတွေမရှိဘူးလေ။ ပန်ကာတွေလည်း မရှိပါဘူးနော်။

"စိတ်ပူလိုက်ရတာ ပူစူးမရယ်၊ သမီး တစ်နေ့လုံး တစ်ညလုံး သတိမေ့နေတာ"

'ဆရာမ'။ ပူစူး နဖူးကို ဖွဖွလေး ကိုင်ကြည့်နေတဲ့ ပူစူးတို့ အတန်းပိုင်ဆရာမကို ပူစူးပြုံးပြလိုက်မိတယ်။ ဟင်…ဆရာမ… စာစီစာကုံးပြိုင်ပွဲဝင်တိုင်း ပူစူးကို အချက်အလက်ထုတ်ပေးတဲ့ (၈)တန်း (A)က အတန်းပိုင် ဆရာမလေ။ မြန်မာစာ သိပ် အသင်အပြကောင်းတဲ့ ဆရာမပေါ့။

"သမီး နေကောင်းတယ်နော်၊ စိတ်ကို အေးအေးထားနော် သမီး၊ သမီးဘေးနားမှာ အားလုံးရှိကြတယ်" ဂျူတီကုတ် ဖြူဖြူလေးနဲ့ မမက လှလိုက်တာ၊ ဆရာဝန်မလေးထင်ပါရဲ့၊ ဒါဆို ဒါ…ဒါ ဆေးရုံလား၊ ပူစူး စာမေးပွဲဖြေရဦးမှာ၊ ဖေဖေရော၊ ဖေဖေ စောင့်နေတော့မှာ။

"ဖေဖေရောဟင်"

"သမီး ဖေဖေလား၊ ရှိတယ် သမီး၊ မကြောက်နဲ့နော် သမီး စာမေးပွဲဖြေပြီးပြီနော်၊ သမီးဖေဖေက သမီးကို ဘာမှမမေးဘူးတဲ့၊ သမီးကို ဖေဖေကသိပ်ချစ်တာ သိလား ပူစူးမ၊ သမီးကိုချစ်တဲ့လူတွေ အများကြီးရှိတယ်၊ ဆရာမတွေအားလုံးကလည်း ပူစူးကိုချစ်ကြတယ်နော်"

"ပူစူး ဘာဖြစ်လို့လဲဟင်"

"သမီး ကမ်းနားမှာ ရေနစ်တယ်၊ ပြီးတော့ သတိမေ့နေတာ၊ ဟိုမှာ သမီးဖေဖေလည်းရှိတယ်၊ သမီး ဖေဖေကို သမီး မကြောက်နဲ့နော်"

ပူစူးအိပ်နေတဲ့ ခုတင်နားကို ဖြည်းဖြည်းလေးလျှောက်လာတဲ့ ဖေဖေ့ကို ပူစူးငေးကြည့်နေမိတယ်။ ကြည့်ပါဦး ဖေဖေ့မျက်နှာက ထူးခြားလိုက်တာ၊ မျက်လုံးတွေ၊ ဖေဖေ့မျက်လုံးတွေက ခါတိုင်းနဲ့လည်း မတူပါလား၊ ဖေဖေ ညက မအိပ်ဘဲ ပန်းချီထိုင်ဆွဲနေခဲ့လို့များလား။

"သမီး…သမီးလေး" ဖေဖေက ပူစူး လက်ဖ၀ါးနှစ်ဖက်ကို ဆုပ်ထားတယ်။ ဖေဖေ့လက်ကလေးတွေက နွေးနွေးထွေးထွေးလေးနော်"

"ဖေဖေ"

"သမီးရယ်" ပူစူးကို ငုံ့ကြည့်နေတဲ့ ဖေဖေ့မျက်လုံးတွေထဲမှာ မျက်ရည်တွေနဲ့ပါလား။ ဟင်… ဖေဖေ့မျက်ရည်တွေ ပူစူး ရင်ဘတ်ပေါ်ကျလာပြီ။ ဖေဖေ ငိုနေတာလား။ ဟုတ်ပါရဲ့။ ဖေဖေ ငိုနေတာ။ ဘယ်လောက် အံ့သြစရာကောင်းလိုက်သလဲနော် ဖေဖေက ပူစူးကို တစ်ခါမှမကြည့်ဖူးတဲ့မျက်လုံးတွေနဲ့ ငေးစိုက်ကြည့်ရင်း ငိုနေတာလေ။ ဖေဖေ့မျက်ရည်တွေက ပူစူးရင်ထဲထိ ၀င်ပြီး အသည်းနှလုံးကို ရောက်သွားကြပြီထင်တယ်။ အေးလိုက်တာ ဖေဖေရယ်။ ဆရာမတွေရယ်၊ ဦးလေးညိုရယ်၊ ပူစူး သူငယ်ချင်း မိဘုတ်တို့ သားအမိရယ်က ပူစူးနဲ့ဖေဖေ့ကို ၀ိုင်းကြည့်နေကြတယ်။ သူတို့ ပြုံးနေကြတာနော်။

"ပူစူး စာမေးပွဲဖြေရဦးမှာလားဟင်" ဖေဖေက မျက်ရည်တွေကြားက ပြုံးပြပြီး ခေါင်းယမ်းတယ်။

"ဖေဖေ့ဆီမှာ သမီး ဘယ်တော့မှ စာမေးပွဲပြန်မဖြေရတော့ဘူးနော်။ သမီးကို ဖေဖေ ယုံသွားပြီ။ ဒါပေမယ့် သမီးကျောင်းမှာတော့ စာမေးပွဲဖြေရမယ်နော်။ မေးခွန်းစာရွက်ထဲက မေးတာတွေကိုပဲ ဖြေပေးရမယ်နော် သမီး။ သမီးကို ဖေဖေဘယ်တော့မှ မရိုက်တော့ဘူး၊ သမီးက ဖေဖေ့စကားနားထောင်ပြီး လိမ္မာတာ ဖေဖေသိတယ်။ ကျောင်းကိုလည်း သမီး သူငယ်ချင်းတွေနဲ့ပဲ အမြဲသွားရမယ်"

"တကယ်ပြောတာလား ဖေဖေ"

"တကယ်ပေါ့ သမီးရဲ့။ ပူစူး ဆရာမတွေကို မေးကြည့်ပါလား"

ပူစူး ဆရာမတွေကို လှမ်းကြည့်လိုက်တယ်။ ပြုံးလက်နေတဲ့ မျက်ဝန်းတွေနဲ့ ငေးကြည့်နေတဲ့ ဆရာမတွေက ပူစူးကို ခေါင်းတဆတ်ဆတ်ညိတ်ပြလို့ ပူစူး ပျော်လိုက်တာ။ ပူစူး ကျေနပ်ပါပြီ ဖေဖေ။ ပြီးတော့ ပူစူး နားလည်ပါပြီ။ မရနိုင်တော့တဲ့ အရာတစ်ခုကို မရနိုင်မှန်းသိလျက်နဲ့ တမ်းတမျှော်ကိုးနေတာထက် ရနိုင်တဲ့ အခွင့်အရေးတစ်ခုကို ရအောင်ယူပြီး မြတ်နိုးတန်ဖိုးထားရမှာက ပူစူးအတွက် အကောင်းဆုံးဆိုတာကိုလေ။

ဒါပေမယ့် ပူစူးနဲ့ ဖေဖေ့ကြားမှာ ရင်းနှီးနွေးထွေးတဲ့ အပြုံးတွေ အမြဲရှိနေမှ ဖြစ်မယ်ဆိုတာကိုတော့ ဖေဖေ သိမှဖြစ်မယ်နော်။  ။

အောက်တိုဘာလ၊ ၁၉၉၉

မေတ္တာဖြင့် - ယုဒါ

22082015 (9:08 PM)